El Principáu pide interlocución ente la FP y la empresa «p’anovar n’emplegu»

El Principáu considera esencial caltener una «interlocución constante» ente les instituciones educatives y l’ámbitu empresarial pa poder desenvolver nueves titulaciones que, de la mesma, dexen crear nuevos perfiles profesionales nun ámbitu llaboral en constante evolución, sigún el Conseyeru de Ciencia.

«Nun sabemos qué empleos va haber d’equí a diez años», alvierte’l conseyeru d’Innovación, Ciencia y Universidá, Borja Sánchez. Por eso, «nun podemos llanzar o proponer nengún tipu de titulación ensin escuchar antes a les empreses y les sos demandes», destacó.

El conseyeru visitó esta selmanba les instalaciones del Centru Integráu de Formación Profesional de la Llaboral, acompañáu del director xeneral d’Enseñances Profesionales y exdirector d’esti institutu, Javier Cueli, y de l’actual directora del centru, María Goitia.

Nesti marcu, Sánchez destacó’l valor de la Formación Profesional, del que dixo «ye clave» y «tendría de tener el prestíu ya importancia que merez». El conseyeru aportunó en que «la innovación nun dexa de ser la teoría puesta n’acción y, principalmente, quien la fai ye’l personal técnico». Por eso, la estratexa del Principáu de cara al futuru horizonte llaboral pasa por «acompasar les nueves necesidaes del sector empresarial cola formación de los nuesos titulaos sía al traviés de la FP Dual o de la convencional».

Bona parte de les titulaciones que s’imparten en Formación Profesional presenten un altu grau d’insertamientu llaboral. Sicasí, el nivel de matriculación en delles d’elles nun ye l’esperáu. Esto debe, en bona parte, «al desconocimientu de la ufierta formativa esistente y de les sos salíes profesionales», asegura la directora del CIFP La Llaboral, María Goitia.

«Precisamos visibilizar lo que faemos, tamos metanes la Milla de la Conocencia y les empreses del parque nun saben lo que faemos y que pueden tener alumnos en práctiques dafechu cualificaos», afirma la directora del centru de FP. Pa ello, daqué que Goitia considera esencial ye que se llegue a ver l’equipamientu que tenemos, que ye’l mesmu qu’esiste na empresa, según toles families de titulaciones qu’impartimos».

El centru de FP La Llaboral cuenta con unos 1.200 alumnos, y una plantiya de 108 docentes. L’institutu imparte una ventena de titulaciones de FP tantu del sector industrial como’l de servicios. Toos ellos con una alta empleabilidá.