El Gobiernu da-y lluz verde al remocicamientu de Santa María’l Narancu y San Xuan de Prioriu

El templu prerrománicu de Santa María’l Narancu y la ilesia románica de San Xuan de Prioriu meyoren la so cara. El Conseyu de Gobiernu’l Principáu autorizó güei una inversión conxunta de 634.000 euros -unos cien millones de les vieyes pesetes- pa remocicar dambos edificios, allugaos nel conseyu d’Uviéu. Les obres foron encamentaes hai agora cinco meses pol Conseyu de Patrimoniu.

Na primer reunión plenaria d’esi muérganu na presente llexislatura autonómica, cellebrada’l 28 d’abril, aprobáronse les actuaciones qu’esta mañana algamaron el preste formal del Executivu autonómicu, lo qu’evidencia que la maquinaria burocrática del Principáu -inda tomando en cuenta’l ‘parón’ provocáu pol veranu- tarda varios meses n’iguar asuntos culturales rutinarios, pero d’envergadura.

Según les previsiones de la Conseyería de Cultura, el remocicamientu de Santa María’l Narancu rematará antes de fin d’añu y basaráse na renovación de la cubierta y na igua de los pavimentos, que tán enforma deterioraos por mor de l’alta afluencia de visitantes al templu. Nesti aspectu, y énte la dificultá de cuidar con normalidá’l prau qu’arrodia el monumentu, el palaciu-templu quedará circundáu por una pavimentación de cantu rodáu na superficie esterior más averada al edificiu, pola que’l públicu accede al interior.

Pol so llau, l’otru monumentu que sedrá remocicáu, la ilesia de San Xuan de Prioriu, allugada a 9 quilómetros d’Uviéu y contruyida a partir del sieglu XII, caltién l’únicu tímpanu hestoriáu del románicu asturianu.

Na so xuntanza ordinaria de güei, el Conseyu de Gobiernu alcordó amás declarar como Bien d’Interés Cultural (BIC) el Palaciu de los García de Tinéu, colo que l’inmueble queda acoyíu a la másima protección prevista na Llei de Patrimoniu.