Portada Sociedá Vil.lar de Vildas, en Somiéu, algama’l premiu al Pueblu Exemplar d’Asturies por amestar tradición y modernidá

Vil.lar de Vildas, en Somiéu, algama’l premiu al Pueblu Exemplar d’Asturies por amestar tradición y modernidá

by asturnet

La llocalidá de Vil.lar de Vildas, allugada nel conceyu de Somiéu, algamó ayeri’l premiu al Pueblu Exemplar d’Asturies na so edición de 2004, galardón al qu’optaben venticinco núcleos de población o grupos humanos del Principáu, como reconocencia a la so capacidá p’amestar tradición y modernidá. El xuráu valoró’l llabor de los vecinos de Vil.lar nel caltenimientu de los sos teitos y de la so ganadería.

Asina, la llocalidá de Somiéu recibe’l premiu pola so versatilidá pa pasar del aisllamientu a primeros de los años noventa a constituyir anguaño un núcleu conectáu a Internet vía satélite, adaptáu al turismu rural y enfotáu en caltener en comuña tanto l’oficiu de teitador, como una valoratible cabaña de raza Asturiana de los valles.

El premiu, que pieslla l’actividá de los xuraos de la Fundación ‘Príncipe de Asturias’ hasta l’añu prósimu y entregaráse n’ochobre, ta concebíu pa distinguir al pueblu, aldega, núcleu de población o grupu humanu destacáu na defensa’l so entornu o patrimoniu, o na fechura de notables obres en comuña.

Al galardón optaben, ente otres, les candidatures de Tazones (Villaviciosa), Cabrales, Tereñes (Ribesella), La Piñera (Piloña) y Alles (Peñameyera Alta), el collectivu humanu de Cuideiru, Llugones, la comunidá de vecinos de la zona rural de Xixón, los Humanitarios de San Martín (Ayer), el pueblu uvieín de Priañes, el núcleu d’Insiertu (Mieres) y la villa llangreana de Ciañu.

Tamién te podria gustar