El Conceyu Universitariu pol Asturianu “espera que s’apruebe la entrada del asturianu nes enseñances reglaes”

El Conceyu Universitariu pol Asturianu (CUPA), organización que cunta con representación nel Claustru de la Universidá d’Uviéu, espresó güei al traviés d’un comunicáu “el so deséu de que la Xunta de Facultá de Filoloxía de la Universidá d’Uviéu apruebe mañana xueves la propuesta d’entrada del asturianu nes enseñances reglaes” presentada pol decanu de la mesma. Nel mesmu reconocen “preferir el maior al minor” pero añaden “que la fórmula propuesta pol decanu va permitir un pasu hestóricu pal asturianu”.

Recuerden amás dende’l CUPA que d’aprobase’l minor quedaría “abierta la posibilidá de que la propia demanda del enseñu d’asturianu na Universidá, convierta’l ‘minor’ nun ‘maior’ nun futuru”.

Dende’l CUPA reconocen ser “conocedores de les dificultaes internes y esternes, que n’otres ocasiones yá echaron p’atrás les propuestes de reglar los estudios de Filoloxía Asturiana na Universidá d’Uviéu” y coinciden con otros axentes de la Universidá en que “de presentase y consiguir que s’aprobara la propuesta de ‘maior’, yá refugada na Xunta de Facultá enantes del branu, esta diba atopar el refugu de la insititución encargada d’aprobar los títulos en Madrid, como pasó n’otres ocasiones cola llicenciatura de filoloxía asturiana”.

El CUPA cree qu’esta selmana “va decidise ente que l’enseñu del asturianu tea na Universidá d’Uviéu o non”, yá que nun se tien conocencia de propuestes de ‘maior’, sinón de ‘minor’ o de desaniciu del enseñu del asturianu, propuesta esta última presentada pol profesor Félix Fernández de Castro.

Camienten dende’l CUPA que ye “perimportante’l pasu d’asitiar al asturianu dientro de les enseñances reglaes al mesmu nivel qu’otres llingües oficiales” y “esperen que la propuesta del Decanu José Antonio Martínez s’apruebe y l’asturianu dea esti pasu tan importante na so hestoria”, pa lo que piden “esponsabilidá y consensu a tolos miembros de la Xunta de Facultá”.