El Conceyu d’Uviéu abre’l plazu pa les solicitúes de conciliación na Selmana Santa

El Conceyu d’Uviéu, al traviés de la conceyalía d’Educación empobinada por José Luis Costillas, abrió’l plazu pa les solicitúes de participación nel programa de conciliación  familiar d’apertura de colexos en Selmana Santa. El plazu qu’abrió Educación va enllargar hasta’l próximu 5 de marzu ya inclúi cinco centros escolares d’Uviéu.

El Baudilio Arce, La Ería, Lorenzo Novo Mier, Poeta Ángel  González y Fozaneldi, son los centros que, n’horariu de 7:30 de la mañana, pa los alumnos que rican serviciu d’almuerzu y atención temprana, y hasta les 16:30, pa los que soliciten serviciu de comedor, tienen abiertes les solicitúes.

La duración del programa de conciliación puestu en marcha pola conceyalía d’Educación, que la so delegación va asumir en próximos díes Lourdes García, va afacer al calendariu escolar y entiende trés díes d’apertura en periodu non lectivu, el 29, 30 y 31 de marzu.  El númberu máximu d’alumnos per centru ye de 70, con una ratio polos protocolos sanitarios d’un monitor por cada 10 alumnos n’infantil y primaria, y un monitor por cada 4 alumnos d’Educación Especial.

Los destinatarios d’esti programa de conciliación son  alumnos de 3 a 6 años n’infantil, de 6 a 12 años en primaria y  alumnáu d’Educación Especial de 3 a 12 años. Les solicitúes pueden presentase de manera telemática na see electrónica del Conceyu d’Uviéu y de manera presencial.

La conceyala de Centros Sociales, Lourdes García, qu’en próximos díes va asumir tamién la delegación d’Educación, señaló que “los programes de conciliación familiar son agora más necesarios que nunca, una y bones munchos padres nun pueden teletrabajar y los güelos son personal de riesgu a los que tenemos que protexer. Por eso les families d’Uviéu van cuntar de nuevu, como yá fiximos en Navidá y pel branu, con delles opciones para dexar a los sos fíos nes meyores manos mientres les vacaciones escolares”.