El ciclu de 0 a 3 entama con 3.209 neños y duldes sobro’l so futuru

Los más pequenos foron los primeros n’empezar el cursu: 3.209 ñácaros incorporense a les escueles de 0 a 3 años esta selmana. Les feches varien según los conceyos, pero en bona parte d’ellos el regresu va tener llugar el miércoles, día 6.

A falta de datos definitivos de matrícules, esos 3.209 (que son les cifres unviaes poles escueles en xunu a la conseyería) revelen qu’hai 96 inscritos más que’l cursu pasáu, cuando había 3.113 neños. Va Haber 102 más con serviciu de comedor (2.053 frente a 1.951) y 221 más escolarizaos a xornada completa (2.325 cuando’l cursu pasáu había 2.014).

Con esta medría de matrícula, Educación preve abrir diez aules nueves y alzar la plantiya en 33 técnicos más. Pa ello, per cada técnicu a xornada completa, va subvencionar otru nel mesmu réxime; lo mesmo va asoceder colos que tán a media xornada. L’entamu del cursu nesti ciclu producirase díes primero que la conseyería presente a los 38 conceyos con escueles de 0 a 3 l’informe qu’ellaboró sobro esti ciclu, que recueye dellos modelos de xestión, que pasen por siguir colos convenios suscritos colos conceyos o polo que proponen conceyos como los de Xixón, Siero, Llangréu y Mieres que yá dixeron que nun tán conformes con esti modelu. Piden que la conseyería asuma’l financiamientu ya integre les escueles na conseyería.