El Centru Niemeyer acoyó la clausura del Proyectu Marcela

El Centru Niemeyer acoyó la clausura del Proyectu Marcela, nel que participaron 15 muyeres que desenvolvieron, dende agostu de 2017, competencies tresversales pa dotase d’autonomía ya independencia, y empoderarse col fin d’ameyorar el so nivel d’empleabilidá.

El conceyal de Promoción Económica, Manuel Riola, clausuró esti miércoles 19 d’avientu nel Centru Niemeyer el Proyectu Marcela. Nel intre del actu diéronse a conocer les resultancies del proyectu, empecipiáu n’agostu de 2017 y nel que participaron 15 muyeres desemplegaes. Mientres estos meses desenvolviéronse itinerarios d’insertamientu sociolaboral individualizaos que fueron complementaos con distintes acciones grupales, xornaes formatives y visites a empreses.

La duración del proyectu dexó que les participantes entrenen ya interioricen nueves conocencies y habilidaes, con una metodoloxía personalizada basada nel desenvolvimientu d’itinerarios d’acompañamientu llaboral d’alta intensidá. Xuntu col conceyal de Promoción Económica y de Ciudá tuvieron presentes nel actu María Luisa García Solar, psicóloga clínica del Programa d’Atención Psicosocial del Serviciu de Salú Mental d’Avilés; y María José López Bartolomé, coordinadora de la Área d’Acompañamientu Llaboral del Conceyu d’Avilés. Integrantes de l’Asociación de Muyeres “Latrébede” fueron les encargaes de presentar l’estudiu evaluativo del Proyectu Marcela. A lo último, proxectóse’l documental “Les Marcelas, muyeres que cunten”, cola presentación per parte de la so guionista y realizadora: la cineasta Ánxeles Muñiz Cachón.