El Bloque critica los recortes n’Educación

El Bloque por Asturies vien de criticar nuna nota de prensa pela mañana’l fechu de qu’el cursu nuevu entame con “recortes, precarización y problema a la hora de solicitar les places d’interinidá”.

Pal BPA, “bien mal escomencipia’l cursu’l nuevu Conseyeru d’Educación, Hermininio Sastre, cola mengua de cerca 500 places de maestros interinos pa esti ciclo. Los recortes del gobiernu asturianu en servicios básicos supunxo a los trabayadores de l’alministración que-yos baxasen los sueldos, anque esto nun ye lo único que van tener que sufrir los maestros interinos. Con la convocatoria de places pal cursu que ta pa empezar, el Bloque por Asturies ve con preocupación que son munches menos les places que s’ufierten que les qu’había estos años atrás. Otra decisión de la Conseyería que nos abulta preocupante ye que munches d’eses places pasen de ser enteres a ser medies xornaes, lo que lleva a una precarización de los puestos de trabayu y de les condiciones de los maestros que les cubren”.

Por si too esto nun fuera abondo, “los dos primeros díes pa solicitar les places foi casi imposible facelo pel interné. Los responsables de la Conseyería d’Educación tán recomendando que se faiga en papel y de manera presencial. Esta midía obligó a munches persones a volver de vacaciones y en munchos casos facer cientos o miles de kilómetros pa ponese a la fila nel rexistru del Principáu”.