Educación destina 5,2 millones a la dixitalización de les aules

La conseyera d’Educación, Carmen Suárez, manifestó esti xueves pasáu na Xunta Xeneral qu’ensin dulda l’añu 2021 va tar entá condicionáu pola pandemia, polo qu’a la de falar de los presupuestos hai que “ser conscientes de qu’el nuesu horizonte tien de ser coraxosu pero prudente”, al tiempu que cuantificaba en 5,2 millones los destinaos a estender y ameyorar la dixitalización.

Mientres la so intervención la conseyera aportunó en numberoses ocasiones na necesidá de la unidá de tolos grupos pa poder sacar alantre les cuentes nunos momentos tan complicaos y esbilló los grandes oxetivos que se marca’l so departamentu coles cuentes programaes.

Manifestó que les cuentes d’Educación para 2021 xuben a 736 millones lo que supon un 6,12% más que n’anguaño. D’ellos 5,2 millones van destinaos a estender y ameyorar la dixitalización. “L’oxetivu ye preparar al sistema educativu para un futuru nel que les enseñances telemátiques van tener un protagonismu creciente”, esplicó la conseyera, que recibió les crítiques de la oposición por non dedicar un apueste más decidíu a la enseñanza presencial.

Los recursos pa la innovación educativa, dientro de los cualos inclúyense los fondos pa la digitalización, xuben a 6.941.654 euros. Esta cuantía complementa los 3,4 millones de recursos propios y los 1,7 millones de Rede.es invertíos yá anguaño na compra de dispositivos, tanto para dotar los mesmos centros como para vencer en préstamu al alumnáu y combatir la fienda dixital. Carmen Suárez indicó que l’alquisición d’estos equipamientos va dexar acelerar el tresformamientu del sistema educativu y acompaña l’esfuerzu realizáu pol profesoráu, l’alumnáu y les families dende l’entamu de la crisis sanitaria.

Resaltó tamién l’apertura del segundu tramu del Plan d’Evaluación Docente, que trata d’oldealos col restu del personal funcionario de l’Alministración. Los presupuestos acuten para esti fin 4,8 millones dientro de la Dirección Xeneral de Función Pública, que van ameyorar la retribución de 9.000 docentes. “Per otra parte, quiero destacar que’l costu / inversión adicional en personal covid para 2021, falamos namái de docentes de la pública, de más de 21 millones d’euros. Esta conseyería atendió de manera casi pionera n’España la dotación de grupos y profesoráu covid, para aquellos centros privaos con unidaes sosteníes por fondos públicos. Quiero recordar a les sos señoríes que nun ye tal esa inquina que circula polos faladeros de les noticies falses. Equí demostrar con diálogu y cifres”, dixo.

Según la responsable d’educación, l’impulsu a la Formación Profesional sigue siendo una de les prioridaes de la conseyería. Les cuentes de 2021 inclúin xuna partida inicial de 500.000 euros para construyir el centru d’innovación para enseñances profesionales, amestáu a la Milla de la Conocencia de Xixón. La conseyería va escoyer l’allugamientu definitivu dientro de los espacios disponibles na cortil de La Llaboral. Con idénticu propósitu de refuerzu de la FP, ta prevista xuna inversión de 1,2 millones en diversos equipamientos.