Cualloto promociona Asturies como’l país de los cuarenta quesos

L’Antigua Fábrica de l’Águila Negra de Cualloto acueye ente los díes 30 de mayu y 1 de xunu unes xornaes gastronómiques dedicaes a amosar la variedá de quesos artesanos que se producen na nuestra tierra. Organizaes poles empreses agroalimentaries Crivencar y Tierra Astur embaxo’l títulu de “Asturies, el país de los cuarenta quesos” van poder gustase toles modalidaes existentes, acompañaes con sidra de tonel y vino de Cangas; tamien ver cómo maestros artesanos maen dalgunos quesos de la especialidá típica d’Amieva conocida como “La Collada” y de metanes afondar na conocencia de la ellaboración y el calter d’un de los productos más ricos de la nuestra gastronomía.

El prósimu martes día 30 de mayu va tener llugar la inauguración d’estes xornaes, nun actu de presentación a les ocho la tarde nel Club de Prensa de la Nueva España nel que se va presentar el llibu “40 quesos, 40 platos” del que ye autor el cocineru Lluis Nel Estrada. Estrada va tar acompañáu na presentación pol etnógrafu Berto Álvarez Peña y d’Enrique Campomanes, en presentación de la editorial Picu Urriellu.

A les ocho y media la tarde, Jose Sariego va ser l’encargáu de presentar estes xornaes, pa dar pasu a una mesa redonda na que van intervenir Lluis Nel Estrada, Carlos Cuesta, , Javier Almendres y Marino González, amás del propiu Sariego, baxo la moderación de Cesar Suárez Junco, director xerente de Crivencar-Tierra Astur.

A lo llargo de los dos díes siguientes, na sidrería Tierra Astur de Cualloto van poder degustase menús ellaboraos coles 40 variedaes queseres asturianes, asina como conocer la ellaboración del quesu conocíu como “La Collada”, que ye típicu de Cirieñu (Amieva).

El xueves, día 1 de xunu, estes xornaes van tener un pieslle musical a cargu del grupu Rossaleda Jazz Quartet.