Cristian Crusat ganó con “Suxetu elípticu” el XLI Premiu “Tigre Juan”

Cristian Crusat vieno acabante ganar con “Suxetu elípticu” el XLI Premiu “Tigre Juan”, mentantu la novela “Los nomes de les coses” de Mariano Peyrou yera reconocida como finalista. El fallu diose a conocer col entamu d’Avientu nel Salón de Té del Teatru Campoamor nun actu presidíu pol Teniente d’Alcalde, Mario Arias.

La obra de Cristian Crusat, “Suxetu elípticu”, alzóse col  Premiu “Tigre Juan” de Narrativa 2019, y fízolo col votu unánime del xuráu nesta 41 edición.  El malagueñu recoyó’l premiu, dotáu con 10.000 euros, nun actu celebráu nel Salón de Té del Teatru Campoamor y que presidieron el Segundu Teniente d’Alcalde, Mario Arias, el  presidente de la Fundación Municipal de Cultura, José Luis Costillas, la conseyera de Cultura, Berta Piñán y el presidente de Tribuna Ciudadana, Pedro Manuel Sánchez Llazu. Como finalista, con un premiu de 5.000 euros, escoyóse la novela “Los nomes de les coses” de Mariano Peyrou.

Nesti actu apurriéronse tamién los galardones del III Certame Nuevu de Relatos Curtios, qu’anguaño ganó Reyes Noguerol pol so relatu “Mentirosa”. La sevillana unvió un vídeu d’agradecimientu por esta reconocencia, dotáu con  400 euros, que tuvo que recoyer  el so predecesor: Diego García. Tamién se fixo entrega de dos accésit (con dos talos premios de 200 euros) a la barcelonesa Etna Miró Escobar por “Les troyanes” y al valencianu Víctor Ortega Esquembre por “Anque nun sía lo más fayadizo”.

El xuráu quixo apurrir dos diplomes a otros dos relatos que llegaron a la última selección: La última xeneración que xubió a los árboles de l’alicantina Carmen Galvañ Bernabé, y Sempiternu, de la uvieina María Abella  Vázquez, que nun pudo tar presente nel actu.

El presidente de la Fundación Municipal de Cultura zarró l’actu deseyando “llarga vida al Tigre Juan”, sorrayando’l “inmensu trabayu que realiza Tribuna Ciudadana al visibilizar obres y talentos que nun pueden entrar nel trabancosu mundu del marketing y los trending topic” y estimando la participación de les “82 plumes que prefirieron siguir ximelgando conciencies” coles sos obres.

A la cita, amenizada pol grupu Tríu4Tercios, asistieron tamién dellos conceyales de gobiernu: Conchita Méndez, Cuadonga Díaz y Luis Pacho y los conceyales Wenceslao López, Marisa Ponga, Diego Valiño, Llucía Falcón, Anabel Santiago y Cristina Coto. Amás, tuvieron presentes el exalcalde Agustín Iglesias Caunedo y el exconceyal de Cultura, Roberto Sánchez Ramos.