Convócase’l VI Premiu de Pintura de la Xunta Xeneral

La Xunta Xeneral convoca’l VI “Premiu de Pintura Xunta Xeneral”, col oxetivu de favorecer la creatividá artística y promover la difusión de la pintura. A esti concursu puede concurrir cualquier persona, nun importando la edá, nacionalidá o residencia. Les técniques sedrán llibres, lo mesmo que la temática. El plazu d’almisión de les obres entama mañana y pesllaráse’l 17 de payares de 2006.
El Premiu ta dotáu con 12,000 euros pa la obra ganadora. Con independencia del mesmu, la Xunta Xeneral reservará un fondu de 6,000 euros empobináu a l’alquisición de les obres que sían consideraes de particular interés.
Una vegada que se peslle’l plazu, el xuráu fadrá una selección de les obres finalistes que sedrán asoleyaes na sede de la Xunta. Durante’l mes d’avientu, daráse a conocer la identidá del ganador o ganadora.
El xuráu, la so composición fadráse primero de la preselección de les obres, sedrá designáu pola Xunta Xeneral ente persones de reconocíu prestixu nel mundu del arte y la cultura. La Xunta Xeneral va solicitar la propuesta de nomamientu a entidaes ya instituciones d’ámbitu estatal venceyaes col arte, y n’especial cola pintura.
Les bases del Premiu de Pintura “Xunta Xeneral del Principáu d’Asturies” podrán garráse na sé de la Xunta, nes cases de la Cultura, y museos. Tamién puede accedese a les mesmes dende la páxina web de la Xunta Xeneral.

Web de la Xunta Xeneral