Carolin Emcke algama’l Premiu de la Paz de los Llibreros Alemanes

La periodista y ensayista alemana Carolin Emke va recibir el Premiu de la Paz de los Llibreros Alemanes polo que fixo colos sos llibros y los sos artículos, munches vegaes dedicaos a momentos críticos nos que’l diálogu amenacia con volvese imposible.

Asina lo anunció esta selmana’l presidente de l’Asociación de Llibreros Alemanes, Heinrich Riethmüller, demientres l’Asamblea de la organización en Leipzig (este d’Alemaña). Según Riethmüller, Emke describe nos sos ensayos y reportaxes de zones de guerra la forma en que la violencia y l’imposibilidá d’espresase camuden a la xente. “La obra de Carolin Emke ye un exemplu en tiempos en que nos conflictos políticos, relixosos y culturales munches vegaes faen imposible’l diálogu”, dixo Riethmüller.

Emcke nació’l 18 d’agostu de 1967 en Müllheim an der Ruhr (este d’Alemaña), estudió filosofía, ciencia política y hestoria en Londres, Frankfurt y Harvard . Ente 1998 y 2006 perteneció a la redacción de la revista “Der Spiegel” y tuvo como unviada especial en Kosovo, Afganistán, Pakistán, Iraq y la Franxa de Gaza.

A partir de les cartes escrites a los sos amigos dende zones de guerra ente 1999 y 2003 compunxo’l so llibru “De les guerres – Cartes a los amigos” y ente 2007 y 2014 collaboró col selmanariu “Die Zeit” con reportaxes sobre Iraq, Haití y la Franxa de Gaza y con numberosos ensayos.

En 2015 recibió’l Premiu Lessing del estáu federáu de Sajonia, en 2014 el Premiu Johann-Heinrich-Merck de Crítica Lliteraria y Ensayu y en 2008 el premiu Theodor Wolff. Pa ochobre espérase l’apaición d’un nuevu llibru de Emke, “Gegen dean Hass” (Contra l’odiu). que ye una confrontación ensayística col racismu y el fanatismu.

El premiu, como tolos años, va apurrise l’últimu día de la Feria del Llibru de Frankfurt que nesta ocasión va ser el 23 d’ochobre. Nel pasáu, el premiu foi recibíu, ente otros, por Ernesto Cardenal, Jorge Semprun, Mario Vargas Llosa, Orhan Pamuk y Swetlana Alexijewitsch.