Portada Cine Carlos Navarro gana’l concursu de guiones de curtios d’Avilés con una crónica d’oportunidaes perdíes

Carlos Navarro gana’l concursu de guiones de curtios d’Avilés con una crónica d’oportunidaes perdíes

by asturnet

Carlos Navarro Suárez (Uviéu, 1968), llicenciáu en Ciencies Económiques y Empresariales ya esplorador de la realización cinematográfica, estrena’l palmarés del Concursu de guiones pa curtiumetraxes ‘Villa de Avilés’. El xuráu de la primer edición del certame premió la so obra ‘Último tren a Haití’ -una hestoria alredor de les oportunidaes perdíes y les consecuencies d’acciones pasaes- pol “aciertu” del autor uvieín nos diálogos, el bon desendolcu de los personaxes y la capacidá d’emocionar ensin cayer nel sentimentalismu.

Carlos Navarro, que yá caleyara poles siendes del guión y la dirección de cine en ‘La profecía’, ‘Truchas’, ‘El espejo’, ‘Al otro lado’ y ‘La neña los mios güeyos’ -esta última premiada en Portugal hai agora cuatro años- recibirá los 6.000 euros colos que ta dotáu el premiu y estrenará la so obra nel IV Certame Nacional de Curtiometraxes ‘Villa de Avilés’, que va cellebrase en 2005.

Les bases del concursu establecen asinamesmo que la pieza tien que se rodar a lo menos nun 60 por cientu en llocalizaciones d’Avilés, dos d’elles esteriores qu’han reconocese fácilmente.

A la final del concursu, al que concurrieron un total de 18 obres, llegaron amás los curtios ‘Una suma de certezas’, del avilesín Saúl Fernández; ‘La visita’, de la zaragozana Pilar Gutiérrez Aguado, y ‘Sesión continua’, de la uvieína Elena García Tamés.

Tamién te podria gustar