Portada Uncategorized Blanca Fernández Quintana gana’l primer premiu de Narrativa Moza

Blanca Fernández Quintana gana’l primer premiu de Narrativa Moza

by redacción asturnews

Blanca Fernández Quintana, cola obra No que cinca los seres de lleenda, resultó esti día la ganadora de la primer edición del Premiu «Enriqueta González Rubín» de Narrativa Moza n’asturianu. El gallardón, convocáu y concedíu pola Conseyería de Cultura, Política Llingüística y Turismu, tien una dotación de 3.000 euros y la publicación de la obra.

SIgún espublizaba ayeri’l portal de la Dirección Xeneral de Política Llingüística, los miembros del xuráu destacaron de la obra de Blanca Fernández Quintana «la so temática clásica, que pon en relación la tradición mitolóxica asturiana cola historia personal a partir de la idea de qu’esa mitoloxía vive en nós y s’espeya nes relaciones familiares, calteniéndose na tresmisión xeneracional». L’acta del xuráu concluye que «too esto permite a l’autora ufiertar una visión distinta de la lliteratura y la música populares, de los paisaxes y paisanaxes que nos envuelven, abriendo un camín novedosu dientro de la narrativa asturiana actual».

El xuráu encargáu de valorar los trabayos, reuníu baxo la presidencia del director xeneral de Política Llingüística, Antón García, tuvo formáu poles escritores María García y Solinca Turbón, los escritores y profesores Xuan Fernandi y Gonzalo Llamedo, y la traductora y profesora Aymara González Montoto, mentantu que Lourdes Álvarez, filóloga de la Dirección Xeneral de Política Llingüística, actuó como secretaria.

Blanca Fernández Quintana (Bimenes, 1994) ye graduada n’Estudios Clásicos y Románicos con Minor d’asturianu. Anguaño ye profesora nel IES Conceyu de Tinéu. Amás de diversos relatos publicaos na revista Formientu, nel 2021 publica la novela L’home les caparines, y llogra’l I Premiu de Novela de fantasía, ciencia ficción y terror de la Editorial Radagast cola novela Trovadoresca.

Tamién te podria gustar