Berta Piñán algama’l Josefa Canellada de lliteratura infantil

La escritora Berta Piñán ye la primer ganadora que conocemos de los certámenes lliterarios añales del Principáu, la décima edición del Premiu “María Josefa Canellada” de Lliteratura Infantil y Xuvenil en llingua asturiana, que concede la Conseyería d’Educación y Cultura, y que se fallaba ayeri llunes en Santolaya de Cabranes.

El xuráu concedió por unanimidá’l premiu a la obra titulada “Vida nel campu”, reconociendo nel trabayu “una obra noble qu’escuende denuncia, pero que nun s’enllena con proclames innecesaries” y na que “el llector participa de los mesmos descubrimientos que los personaxes y dexa la valoración ética pal remate de la llectura”, según destaca l’acta.

El galardón de Lliteratura Infantil y Xuvenil en llingua asturiana que ta dotáu con 3.000 euros ye’l primeru en conocese de los que van dir fallándose a lo llargo de los próximos díes y que van entregase’l mes entrante na “Gala d’entrega de premios lliterarios en llingua asturiana 2017”. Con “La mio hermana ye una mofeta”, Berta Piñán ya algama’ra’l primer premiu na categoría de lliteratura infantil y xuvenil de los Premios Críticos de les Lletres Asturianes nel 2012.

Berta Piñán (Cangues d’Onís, 1963) ye una escritora de prestixu reconocíu dientro de la lliteratura asturiana y Miembru de Númberu de l’’Academia de la Llingua Asturiana dende 2008. De magar qu’en 1985 ganara’’l Premiu de Poesía de l’’ALLA por Al abellu les besties, tien publicaes numberoses obres que van del ensayu de temática sociollingüística o femenista, a la narrativa, pasando pela poesía, xéneru nel que collechó la mayor parte de los premios, ente los que descaca’’l Premiu de Poesía Teodoro Cuesta en 1991 por Vida Privada.

Dientro de la lliteratura infantil y xuvenil tien publicao Lula, lulina en 1995, Les coses que-y presten a Fran (2005), L’estranxeru (2005) y Arroz, agua y maíz (2010), publicaes estes tres últimes en versión castellana y asturiana.