Avilés prepárase para recibir nel Teatru Palacio Valdés al ganador del Oscar Ryan Bingham

Avilés va acoyer el vienres 7 de xunu al músicu Ryan Bingham, una estrella internacional qu’enllena en cada unu de los recitales de la so xira mundial. Nel so nuevu álbum, “American love song”, el cantautor compon un frescu d’actualidá nel qu’entrepola los soníos más icónicos de la música estadounidense. Entá queden entraes disponibles nes canales habituales.

Al volver la esquina. Avilés y el Teatru Palacio Valdés prepárense para recibir, n’apenes 15 díes, a una nueva estrella de la música. Ryan Bingham, ganador del Oscar al meyor cantar en 2009, solo va ufiertar cuatro conciertos n’España dientro de la so xira mundial, al ritmu del so últimu álbum, “American love song”, una reivindicativa, llibre y contestataria declaración d’amor al so país. Va ser el vienres 7 de xunu a les 21 hores.

Van sonar los sos últimos cantares, una repasada a la tradición estadounidense, a l’americana music”, suenen a blues, a bluegrass, a gospel, a country, a folk, a música chicana… Pero tamién los sos clásicos, como’l “The weary kind”, que-y dexó alzar se nel 2009 cola acobiciada triple corona de la música cinematográfica, el Oscar, el Globu d’Oru y el Grammy al meyor cantar de cine, que nun cantaba él, sinón Jeff Bridges protagonista, y Oscar tamién pola so actuación, de Corazón Rebalbu”.

El músicu nacíu en Nuevu México, magar la so entá relativa mocedá (nació en 1981), cuenta con una dilatada y brillosa trayectoria a los sos llombos. Seis álbumes la jalonan, con guindes como los premios por “The weary kind”, o’l nomamientu como artista del añu 2010 pola Americana Music Association.