Avilés festexa la so música nel XX aniversariu de la publicación de “Espíritu de rock & roll”

Avilés festexa la so música en conciertu nel XX aniversariu de la publicación de “Espíritu de rock & roll”. Promovíu pol autor del llibru, Béznar Arias, va axuntase a más de mediu centenar de músicos de bona parte de les bandes que conformen la rica hestoria de la escena musical de la ciudá de les postreres seis décades. El sábadu 7 de xineru, a les 20 hores nel Auditoriu de la Casa de Cultura, con entraes yá a la vienta a un preciu únicu de 8 euros.

Pasaron venti años de la publicación del llibro disco “Avilés. Espíritu de rock & roll. Más de 40 años alendando rock”, de Béznar Arias, obra clave pa entender la música popular n’Asturies. L’autor festexar con un conciertu en collaboración cola conceyalía de Cultura nel que va axuntar a más de 50 músicos de bandes fundamentales na hestoria de la ciudá hasta’l presente. El sábadu 7 de xineru, a les 20.00 hores na Casa de Cultura.

El conciertu “Avilés, espíritu de rock n roll” foi presentáu esta selmana pasada por Yolanda Alonso, concejala de Cultura d’Avilés, acompañada por el mesmu Béznar Arias, promotor d’un recital que, en palabres d’Alonso, “déxanos reivindicar una traza fundamental de la nuesa identidá como ciudá, la música en toles sos aguaes”.

“Más de 40 años alendando… rock”, rezaba’l subtítulu del llibru fai 20 años. Dos décades a sumar a una celebración única, nos que camudó l’aire, pero non la intensidá cola que se vive la música n’Avilés, y que podrá esfrutase nel escenariu con combos formaos por componentes de bandes de rock, folk, soul o jazz.

La portada del llibru reflexaba cómo yera l’Avilés que glosaba. Una vista tomada dende Valliniello qu’amburaba’l cielu de la ciudá a decenes de graos centígrados, y más allá, tres los fornos altos de Ensidesa, vivía una escena musical que, como recuerda Arias “foi dando tumbos dende les orquestes de los años 50, hasta los primeros conxuntos de música moderna, los grupos de baille, les primeres bandes de rock nos 70, los 80, la modernidá de los 90… Hasta güei”.

Dende aquellos pioneros Llobos cervales o Siders, a los contemporaneos Broken Roads o Alexandra in Grey, la música n’Avilés siempres foi d’acordies colos tiempos, abrazando la modernidá, al tantu del mundu, y ensin refalgar nenguna propuesta, hasta la más clásica del coru Contracanto.

Avilés pasó del cielu robrizu, duru, crudu, pero tamién brillosu y atélite, a la nitidez musical d’estos momentos, con cambeos inimaxinables entós, con visites de pernomaos músicos nacionales ya internacionales y la creación de nuevos espacios pal ociu musical, tantu públicos como privaos. “Un conglomeráu músicu cultural que convirtió a Avilés en muncho más que l’Atenes del Norte, términu acuñáu a mediaos del sieglu pasáu pa referise a la nuesa ciudá”, resaltó Arias.

Pero daqué nun camudó n’Avilés. Les tribus musicales siguen vives… unes más qu’otres. Na ciudá comparte la clásica col heavy, el rock col country, el jazz col folk. Y esa mezcolanza única podrá esfrutase n’escena, nuna güeyada al presente, al pasáu y al futuru, tal que lo encetaba aquel “Avilés espíritu de rock & roll”, y comprobar in situ, con componentes de 34 grupos, cómo esa escena musical que tantos grandes músicos dio al mundu sigue viva, vixente y feliz.