“Avilés Acción en 72 hores” covierte la villa en plató de cine

Cola participación de 87 alumnos y alumnes con curtiumetraxes proyectaos en www.avilesaccion.com “Avilés Acción en 72 hores” va covertir la villa en plató de cine. Toma’l relevu a l’antigua sección “Aules Móvil” col mesmu oxetivu: sofitar la formación en creación audiovisual de los más nuevos.

Avilés Acción cumple per séptimu añu consecutivu col so compromisu cola mocedá y failo anguaño al traviés de l’actividá “Avilés Acción en 72 hores”. Celébrase agora per primer vegada, como heredera d’Aules Móvil, la sección que, en collaboración colos institutos d’Avilés, anima a los estudiantes a rodar curtiumetraxes colos sos teléfonos móviles.

“Avilés Acción en 72 hores” caltién la intención de siguir potenciando la formación de los concursantes de cara a la creación y la collaboración colos institutos de la ciudá. Nesta actividá, los alumnos participantes son emplazaos a escribir, producir, rodar y montar un curtiumetraxe en 3 díes, con Avilés como escenariu. Pa ello, los participantes van cuntar con profesionales del sector que van acompañar mientres tol procesu creativu a los alumnos, ufiertándo-yos una tutoría personalizada al entamu de l’actividá y a la que se da continuidá al traviés d’un siguimientu nes fases de guión, grabación y montaxe.

Un total de 87 alumnos de trés centros educativos d’Avilés inscribiéronse a l’actividá: 24 alumnos del Colexu Santu Tomás, 9 alumnos del IES Virxe de La Lluz y 55 alumnos del IES Ramón Menéndez Pidal.

Esta selmana realizaron la parte correspondiente a la grabación y rodaxe de los sos curtios, acompañaos pola concejala de Cultura, Yolanda Alonso; el director del Festival, Javier Mediavilla y el tutor de los alumnos y alumnes, David Rodríguez. Los curtiumetraxes presentaos van ser emitíos na páxina web del Festival www.avilesaccion.com

El programa de mano, tola información sobro la XX edición, les inscripciones nes actividaes y la vienta d’entraes pa les proyecciones pueden atopase na páxina web del Certame www.avilesaccion.com