asturnet

El XXXV Día de les Lletres Asturianes d’esti 2014 entamó como davezu con un gaiteru enrriba del escenariu, nesti casu Diego Pangua que va interpretó la pieza: “Pasucáis de Julio Álvarez”. Pero l’actu amosó bien prontoi delles novedaes escéniques y visuales. Amás d’amosar un percorríu visual per Asturies, gracies a les imáxenes cedíes pola Editorial Nobel, los miembros del Plenariu de l’Academia de la Llingua Asturiana xuberon al escenariu dende’l patiu de butaques, mentantu sonaba la “Danza d’arcos” de Silvino Fernández, interpretada por Diego Pangua.

Falaron darréu les nueves académiques de númberu, Carme Muñiz Cachón y Cristina Valdés Rodríguez y, acordies col potrocolu afitáu pa esti actu, la Presidenta de l’Academia de la Llingua Asturiana fizo llectura del discursu institucional d’esti XXXV Día de les Lletres Asturianes.

La Xunta de Gobiernu de l’Academia de la Llingua Asturiana y los miembros de númberu dexaron depués l’escenariu pa siguir el restu d’actos d’esti XXXV Día de les Lletres Asturianes.

Próspero Morán y Sonia Avellaneda vamos recitaron darréu una pequeña esbilla de poemes d’estremaos autores qu’apaecen espublizaos na revista “Lliteratura” que güei se presentaba. Foron poemes d’Ángeles Carbajal “Al to cuerpu”, d’Elías Veiga “Últimes palabres” d’Ignaciu Llope “Where Have All the flowers Gone?”, d’Esther Prieto “Islla”, de MªJosé Fraga “Deixa que llamba os vidros”. Darréu tuvo llugar l’actuación del grupu “Felpeyu” con una emoción bien grande, darréu que la última vegada qu’esti grupu actuó nesti mesmu escenariu un Día de les Lletres, tovía taben con nós Ígor Medio y Carlos Redondo: “la nuesa alcordanza va pa ellos” dixeron los presentadores.

“Felpeyu” tocó les pieces “Sotronido”, “Ribeseta”, “La saya”, “Canteros”, “Chalaneru”, “EL vieyu” y “Llevantate neña”, percorriendo con ellos la so llarga tryeutoria nos escenarios. A lo cabero l’actu sonaba a la gaita el “Asturies patria querida” que tolkos presentes pudieron acompañar como ye vezu.

Tres de agradecer una vegada más la presencia’l públicu y convocar el XXXVI DÍA DE LES LLETRES ASTURIANES, pal próximu mayu del 2015 la xente empobinose a la espicha que tuvo llugar darréu nel “Llagar d’Herminio” en Cualloto.

L’actu institucional del Día de Les Lletres, ya ta a puntu con munches novedaes previstes. Dende’l puntu de vista de la “puesta n’escena”, el cambiu va ser radical: muncho más colorista, próximu, modernu” como adelantaba hai díes Xosé Antón González Riañu. Na semeya pue vese un instante del ensayu de l’actuación de “Felpeyu”, que tien tamién un significáu especial porque la última vez que’l grupu actuó nun Día de les Lletres taben ellí Igor Medio y Carlos Redondo…

Un grupu de docentes de l’asignatura de llingua asturiana de dellos centros educativos de los conceyos de Siero, Bimenes y Noreña van celebrar el Día de les Lletres Asturianes en La Pola Siero grabando un vidiu nel que visibilizar un llargu futuru a la llingua asturiana. Nesti actu amás de los centros educativos, el SNL de Siero, y la productora audiovisual Algamar, colabora la Xunta pola Defensa de la Llingua Asturiana. Ye esta entidá ciudana que llucha pola normalización llingüística y el respetu de los derechos civiles de los asturiano falantes quien proporciona los vasos, diseñaos pa la ocasión, que se van repartir nel actu y que servirán como elementu protagonista na grabación del vidiu.

Esta iniciativa naz de la propia comunidá educativa como proyectu didácticu qu’anime a fomentar l’usu del nuestru idioma ente la xente más mozo, cola vista puesta na problemática de la tresmisión xeneracional.

N’años anteriores fixéronse esperiencies didáctiques asemeyaes centraesnuna única escuela que tuvieron repercusión nos diferentes medios de comunicación. Nesta ocasión quier implicar al alumnáu de toles etapes educatives y collaborar con persones del mundu audiovisual, la música y la creación cultural.

Preocupa la situación de la llingua asturiana, empobinada a la desapaición y confinada a ámbitos mui rellacionaos colo tradicional, quier sacase d’esi furacu y da-y aire pa que respire, abriendo les ventanes del mundu a la llingua asturiana y demostrar que la tresmisión xeneracional ye la clave pal so pervivencia.

L’oxetivu d’esta iniciativa ye facer una versión asturiana la “Cup Song” que cuenta yá con millones de visites nes sos munchísimes versiones. Dende que la película “Pitch Perfect” y l’actriz Anna Kendrick contribuyeron a esparder esti fenómenu que combina música, percusión y participación social, la “Cup song” o “El Cantar del Vasu” convirtiose nun fenómenu de mases ente la xente mozo como sinónimu de la collaboración.

Asina lo fixeron yá dende l’espaciu escolar n’otros sitios con llingües pequeñes como l’asturiana, siendo los más nombraos el casu d’Irlanda y Navarra, onde mandaron un mensaxe de futuru y esperanza pal so idioma al restu del mundu.

Cola metáfora del vasu que pasa de mano en mano y la señardá por perder la esencia de lo que somos, dende Asturies, modestamente, esti vidiu quier contribuyir faciendo saber al restu del mundu qu’existe un sitiu que se llama Asturies que tien una llingua propia y en peligru. Y diciéndo-y a la sociedá asturiana que l’asturianu tien futuru.

Pa ello convidase a toles persones con interés na llingua asturiana y el so futuru a participar na grabación d’un videoclip esti sábadu 10 de mayo a les 11’30h. na Plaza Cubierta de La Pola Siero.