asturnet

El CSOA asoleya un comunicáu tres del desaloxu del edificiu n’Uviéu poniendo a les clares les actividaes que se facíen nel centru y el so enfotu d’espardeles pela ciudá d’Uviéu: “Cuando la situación económica condena a decenes de miles d’asturianes al paro, cuando los retayos afueguen el sistema públicu d’educación, y la cultura pública casi nun existe, el CSOA La Madreña úsase pa “fines sociales en beneficiu de la comunidᔠ(según afirmó’l xuez d’instrucción qu’aparó’l desagospiu del centru en marzu del 2014)”.

El comunicáu desplica que “les coses que se fixeron nel centru yeren munches y de toa triba (un sitiu pa criar neños y neñes de manera natural, teatru n’inglés, autodefensa feminista, clases de Wolof, taller de llectura anarquista, tienda de baldre, repartu de comida, conciertos, clases de música pa neñes, etc.), pero’l centru tamién sirvió pa qu’aconceyaren munchos grupos y mui diferentes; colectivos, plataformes, espacios onde guañen formes nueves d’organizase, pa dir texendo redes de solidariedá y cooperación ente los colectivos y de contestación al sistema capitalista que carecemos a diario”.

El restu del comunicáu diz que “el3 d’abril del 2014 a les 7:30 de mañana la policiá peslló’l centru y echó a la xente que taba dientro con un despliegue policial grande por demás, dafechu féxose una sentada frente por frente de La Madreña na cai Xeneral Elorza, nesi momentu unes cuantes compañeres acaben mancaes.

Darréu convocáse una manifestación pa les 19:00 hores pola defensa del CSOA y contra’l desagospiu. Otra vez la presencia de la policía ye grande por demás. Túvose dos hores andando peles cais d’Uviéu, pasando pelos sitios que meyor representen a los enemigos del centru, los culpables del desagospiu: la FSA-PSOE, que como fuercia política que gobierna Asturies tien un 60% de la empresa SEDES, que ye la dueña del edificiu abandonáu, a Gabino de Lorenzo, delegaú del gobiernu, y a la Xunta Xeneral del Principáu.

Al volver a la puerta del COSA los antidisturbios entámenla provocando, y escomencipen a tirar de porra machucando a los manifestantes. Algunes compañeres lleven una culema golpes. Sobremanera foi grave’l casu d’un compañeru nuestru que-y pegaron pela espalda, militante del Espaciu Comunista Aida de la Fuente, ente les mancadures hai una na parte d’atrás de la cabeza por un porrazu, cerca de la ñuca, que pudo acabar mal de da-y un poco más abaxo, lleváronlu de siguío n’ambulancia al Hospital Central d’Uviéu. Por suerte, el compañeru paez que sana de les mancadures.

Queremos amosar la nuestra solidariedá, el nuestru apoyu y ciñu a toles compañeres qu’ayeri atacaron los cuerpos de represión del Estáu, sobremanera al que más mancaron. Y queremos señalar a los culpables de la situación actual del centru: el gobiernu d’Asturies, la FSA y la Delegación del Gobiernu, queremos recordar tamién, que los que gasten porra, los que van con cascu y escudu a les manifestaciones como la d’ayeri “trabayen” por una paga que sal de toles ciudadanes (a les que pegaron ayeri, tamién), pero tamién nos alcordamos del cuerpu de bomberos d’Uviéu que dixo públicamente que nun diba participar nel desagospiu de La Madreña.

Nosotres nun vamos dexar de lluchar, tolo que nos llevó a recuperar l’edificiu abandonáu de lo que yera la Conseyería de Sanidá sigue tando ehí, l’edificiu yera del pueblu asturianu y foi abandonúa (n’especulando con él no que se conoz como “Operación de los Palacios” pal beneficiu de conocíes y poderoses empreses privaes) pa construyir más alantre viviendes de luxu que namás puen tener unos pocos. Agora somos munches más que cuando escomencipiemos, el pueblu d’Uviéu, y d’Asturies y de tol Estáu nun aparó de mandanos avisos de solidariedá y apoyu. La impresionante manifestación d’ayeri o la del pasáu 21 de mayu son namás dos amueses d’ello y la respuesta policial ye prueba del mieu que los poderosos tienen al pueblu”.

Güei martes, 3 de xunu, a les 19 hores, ta convocada una concentración n’Uviéu baxo’l nome ‘Recuperemos La Madreña’, después de que se desaloxare’l llunespacíficamente, tres de la odre judicial. Pela mañana, a primer hora, la Policía procedió al desallugu de seis persones que fixeron nueche nel edificiu como resistencia a la decisión tomada polo tribunales. Fuera, un grupu de xente cortó la cai en mou de protesta, lo que llevó a la intervención de les Fuercies de Seguridá del Estáu. La concentración d’esta tarde va tener llugar frente al propiu Centru Social Okupáu Autoxestionáu La Madreña.

L’asociación La Foz del Pielgu axuntóse la pasada selmana (Miercoles 28 de mayu) col concejal d’Urbanismu d’Avilés, Teófilo Rodríguez a raiz del zarru con bolardos per parte d’Arcelor-Mittal del vial públicu d’accesu al Apeaderu de Feve en Llaranes, perpendicular al AS-19 (Carretera Xixón-Avilés). Na mesma xunta Rodríguez manifesto a l’asociación cultural y medioambiental que señalizaren correchamente l’accesu al vial públicu pa los vecinos y viandantes de la zona al Apeaderu de FEVE tantu dende l’AS-19 como dende l’Apeaderu escontra’l barriu de Llaranes.

Per otru llau, La Foz del Pielgu considera qu’amás del USU PÚBLICU del vial, reconocíu pol Conceyu d’Avilés, la titularidá del mesmu tamién ye pública según documentos de sesiones plenaries de 1923 y nun esistir nengún tipu de desafectación nin compra del terrén en ningun momentu per parte d’Arcelor-Mittal. Nestos términos dende’l Conceyu d’Avilés comentaron desconocer anguaño la titularidá del vial, asuntu que va ser estudiáu per parte d’esti postreru.

El CSOA La Madreña convoca a la ciudadanía esti xueves pela tarde na Xunta Xeneral pa que “Apadrine a un diputáu” les 16,30 horas nun comunicáu bel que recuerden que Javier Fernández sigue sin recibilos. La convocatoria faise emplegando’l slogan que ya se ficiere famosu en rol Estáu: ¡La Madreña nun pieslla!

El CSOA La Madreña propón a los sos collacios y collacies y simpatizantes participar nesta aición en pro del fomentu de la llectura ente los nuesos representantes políticos, nos que” vemos bien de falta de cultura y, en xeneral, un déficit d’atención a les reivindicaciones populares”. Esti xueves a les 16.30 horas aprovechando la presencia de les sos señoríes nel Plenu de la Xunta Xeneral del Principáu vamos regalar a ca diputáu y diputada un llibru de la gran biblioteca del CSOA La Madreña.

Na asociación piensen que “la cultura y la llectura abren mentes y puen facer que recapaciten, sobremanera énte los miembros del gobiernu autonómicu del PSOE, pola so decisión de desagospiar el CSOA La Madreña. Nun ye un escrache cultural, ye un actu d’amor. Clásicos d’ayeri, güei y siempre, novela histórica, lliteratura de viaxes, folletinos románticos, pensamientu políticu, ensayu filosóficu y hasta dalguna obra erótica, que por qué non, van ser los regalinos que-yos daremos a los nuesos amigos y amigues”.

Esti miércoles dábase a conocer que la candidatura conxunta formada pol químicu valencianu Avelino Corma; l’inxenieru químicu estaounidense Mark Y. Davis y el químicu físicu estaounidense Galen D. Stucky algamaben el Premiu Príncipe d’Asturies Científicu Técnicu d’esti añu nuna candidatura conxunta “poles sos contribuciones al desarrollu de los materiales microporosos y mesoporosos y les sos aplicaciones”.

La candidatura propúnxola’l Conseyu de Gobiernu de la Universitat Politècnica de València y apoyada, ente otros, por Santiago Grisolía, Premiu Príncipe d’Asturies d’Investigación Científica y Técnica 1990.

El xuráu consideró que los trés químicos abrieron “nueves y importantísimes llinies de trabayu que s’ubiquen nes fronteres de la conocencia actual, con aplicaciones en campos bien diversos como l’amenorgamientu d’emisiones contaminantes de vehículos y fábriques, la meyora de los alimentos, la depuración d’agües, los procesos de refináu del petróleu y na industria químico polo general”.