asturnet

Esti llunes 10 de setiembre, tres representantes de la Xunta pola Defensa de la Llingua Asturiana tuvieron un alcuentru cola Conseyera d’Educación, Ana González; la Directora Xeneral de Política Llingüística, Ana Fueyo y l’asesor técnicu docente de llingua asturiana na educación, Xosé Lluis Remis, nel que foron esponiendo les principales reivindicaciones respecto al tratamientu, la proyección y l’estatus de la llingua asturiana.

Sigún informó la XDLA, nesti apartamiento afondóse en cuestiones como la situación del idioma dientro del sistema educativu, l’alministración, los medios de comunicación, o l’aplicación de la toponimia oficial. Pela so parte, los representantes gubernamentales treslladaron dalgunes de les sos intenciones dientro d’esta llexislatura. D’esta manera, la conseyera Ana González recordó, de primeres, los compromisos electorales del so partíu (FSA-PSOE) y reiteró la negativa del so grupu políticu a la reconocencia oficial del asturianu, porfiando, otra vuelta, na discriminación d’una parte de la sociedá asturiana, y dexando bien a les clares “les actitúes antidemocrátiques del partíu que representa que fai oyíos sordos a los mandaos internacionales qu’encamienten la reconocencia del idioma, asina como la llexislación vixente”, sigún quier dexar afitao la XDLA.

De siguío, la Conseyera “nun quixo dexar pasar la oportunidá d’alquirir dellos compromisos dientro d’esta llexislatura como la creación de la Especialidá de Llingua Asturiana pal profesoráu de Primaria y Secundaria, lo que tien de suponer la so implantación definitiva enantes de los dos próximos cursos; o la inclusión del asturianu nel currículu d’Educación Infantil, que ta en procesu d’elaboración y aprobación”.

Dende la XDLA solicitaron que s’informe de manera efectiva a tolos centros sobre l’aplicación ineludible de la sentencia xudicial qu’elimina la ratio mínima pa impartir Llingua Asturiana en Secundaria. De la mesma manera, pidióse una interpretación recta de la Llei d’Usu y Promoción pa minimizar el descensu xabaz de matriculaciones nel pasu de Primaria a Secundaria. Ello implicaría la modificación del decretu d’ordenación de la ESO, de manera que l’asignatura de Llingua Asturiana tuviere a lo menos la mesma consideración qu’en Primaria, y nun s’atope como optativa, en competición con otres a les que l’alumnáu tien que renunciar si quier formase n’asturianu, o presentase a la prueba específica (voluntaria) na PAU”.

Na XDLA recuerden que la LOE da-y abonda autonomía a l’alministración educativa asturiana pa poder facelo.

Otru llabor, al que Conseyera y Directora Xeneral, dixo que diben ponese yá, ye la continuación de los trabayos de la Xunta Asesora de Toponimia, col oxetivu de completar la oficialización de la toponimia de tolos conceyos d’Asturies. Respecto a los medios de comunicación públicos, aseguraron tar en contactu col director del Ente, Antonio Virgili, cola intención d’afalar el cumplimientu de la toponimia oficializada nos diferentes espacios y tamién, pa impulsar la presencia na programación de conteníos deportivos, informativos y de ficción n’asturianu.

No relativo a les actividaes avezaes de la Dirección Xeneral (premios lliterarios, Día de la Ciencia, Selmana Lletres…) falaron de da-yos nuevos enfoques qu’ameyoraren la percepción pública de los mesmos. Pela so parte, la XDLA remarcó la necesidá d’impulsar planes de normalización social qu’incidan de forma efectiva nel usu públicu del idioma, y enanchen les sos posibilidaes idiomátiques; del apoyu, control y espardimientu de los servicios de normalización de los conceyos, del establecimientu de convenios vinculantes cola alministración estatal pal cumplimientu de la toponimia oficial, d’afitar a los medios de comunicación públicos como referentes de la normalización social, de visibilizar y vehicular l’idioma en tolos departamentos de l’alministración, d’esparder l’usu del idioma nes actividaes, infraestructures y patrocinios deportivos; y de toa una riestra de midides que han tar presentes nuna planificación efectiva de la política llingüística.

Por mor d’ello, la XDLA quier llamar l’atención de que tres más de cien díes de gobiernu, nun se conoz l’adopción de nenguna midida en materia llingüística y, endagora, solo podemos falar de la disposición d’esti Gobiernu a solventar aquellos procesos yá entamaos, pero qu’en nengún casu suponen la planificación d’una serie de midíes coherentes que sienten les bases d’una normalización social de la llingua autóctona que vengan a superar los déficits nes funciones sociales del asturianu.