Sociedá Uviéu acoyerá’l Congresu de Cultura Asturiana Mozo n’Ochobre by asturnet 2 de setiembre, 2013 Esti martes 3 de setiembre, a les 12 hores, nel Centru Empresarial d’Uviéu, allugáu na cai Covadonga 10 entesuelu, presentase’l CONGRESU DE CULTURA ASTURIANA MOZO que va cellebrase’l viniente 19 d’ochobre, col enfotu d’axuntar “a persones que, nel ámbitu la cultura asturiana, dedíquense a la creación cultural y trabayen nella”. Ente los so oxetivos tán proyectar a la nuesa sociedá la idea de qu’hai bien de xente creando y trabayando nel mundu la cultura asturiana y face-y visible esa realidá que, n’últimu términu, xenera empléu y riqueza; treslladar a la ciudadanía la evidencia de que la cultura asturiana ta arreyada a la modernidá y a les nueves tecnoloxíes (páxines web, facebook, twitter, radio, cine, televisión, productores, periódicos dixitales, mundu la escena…); motrar los cambeos enormes que se dieren nel mundu de la cultura más tradicional; evaluar l’estáu d’ánimu y les perspectives de los creadores y trabayadores mozos y la so visión de futuru; facer un repasu a la situación del empléu y la economía, de la situación de los trabayadores y de les empreses de la cultura; evaluar les relaciones económiques cola Alministración y el resultáu d’esa relación nos últimos años, asina como les perspectives de futuru. El Congresu desarrollaráse pelo llargo de tol día 19 d’ochobre, nel Auditoriu Palaciu de Congresos Príncipe Felipe d’Uviéu. 2 de setiembre, 2013 0 FacebookTwitterPinterestEmail
Patrimoniu Nueva campaña d’investigaciones nos yacimientos romanos de La Carisa by asturnet 30 d'agostu, 2013 La Conseyería de Cultura, Educación y Deportes va impulsar una nueva campaña d’investigaciones nos yacimientos romanos de La Carisa. Los trabayos van centrase nel Picu L.lagüezos, un monte que dixebra L.lena del conceyu lleonés de Villamanín y que pudo allugar el primer asentamientu romanu nel territoriu qu’ocupa anguaño Asturies. El proyectu pa retomar la investigación, paralizada por falta de fondos dende 2011, va emplegar a un equipu de cuatro arqueólogos que va dirixir la esperta Esperanza Martín y que va intentar rellacionar los yacimientos romanos cola Vía Carisa. Fuentes de la Conseyería de Cultura confirmaron esta selmana a los medios de comunicación que’l proyectu arqueolóxicu aprobóse na Comisión Permanente de Patrimoniu. Esti órganu da’l vistu bonu a les actuaciones d’interés y, tres esti primer trámite, podrá apurrise el financiamientu necesariu pa encetar l’estudiu de los xacimientos romanos. Desque arrincaron les primeres investigaciones en La Carisa, nel añu 2001, ye la primer vegada que’l Principáu d’Asturies se compromete con una investigación nel enclave. 30 d'agostu, 2013 0 FacebookTwitterPinterestEmail
Reseñes de llibros Pintar-pintar presenta Cuatro esquinines de Pepe Monteserín y Job Sánchez by asturnet 29 d'agostu, 2013 La editorial Pintar-Pintar vieno acabante d’espublizar Cuatro esquinines, con testu de Pepe Monteserín ya ilustraciones de Job Sánchez, un llibru infantil col que fai alitar otra vuelta la so presencia nes estanteríes asturianes. ¿Quién nun conoz esa añada que diz: Cuatro esquinines tien la mio cama ? Pos asina mesmu empieza’l nuesu nuevu llibru tituláu Cuatro esquinines, con testu de Pepe Monteserín ya ilustraciones de Job Sánchez. Solo que, como asocede nocasiones, los versos tienen vida propia, y l’añada conviértese nun risonderu cuentu al aviesu. 29 d'agostu, 2013 0 FacebookTwitterPinterestEmail
Sociedá El domingu celébrase’l primer Día de la Reciella nel Muséu del Pueblu d’Asturies by asturnet 28 d'agostu, 2013 L’asociación “Reciella: families pol asturianu” vieno acabante facer pública l’actividá que van desarrollar nel Muséu del Pueblu d’Asturies a lo llargo del domingu 1 de setiembre: una xornada, enllena talleres, música y puestos culturales de diferente calter que va tener llugar a lo llargo de tol día, dende l’apertura de puertes del Muséu a les 11.00 hores de la mañana. Toles actividaes van empobinaes a neños y neñes d’hasta doce años, no que correspondería coles etapes de la Educación Infantil y Educación Primaria. L’elementu común a toes elles ye l’usu del asturianu como llingua vehicular, usu que promueve l’asociación ente los más pequeños dende la so fundación hai agora un añu. No tocante a les actividaes rescamplen los talleres de baille y traxe’l país; el de contactu cola naturaleza que supondrá l’actividá “Viendo animalinos na Güelga”del propiu Muséu, dirixida pol biólogu y miembru de l’asociación Vitor Xuan Melero; o’l taller musical que llevará’l director de los grupos “Seliquín” y darréu “Xentiquina” Nacho Fonseca. Asina mesmo la xornada tará completada pol “Cuentacuentos pa tola familia” d’Olga Cuervo y el conciertu “Pop piquiñín” nel que’l grupu Petit Pop pondrá’l ramu al día cantando n’asturianu. Amás d’esti programa d’actividaes dende la organización adelanten la instalación de puestos de manualidaes y llibros de Lliteratura Infantil y Xuvenil n’asturianu cola presencia d’editoriales asturianes. 28 d'agostu, 2013 0 FacebookTwitterPinterestEmail
Lliteratura Ensame sidreru gana’l I Premiu Timón de Cultura Asturiana by asturnet 27 d'agostu, 2013 L’asociación cultural Ensame Sidreru ye la ganadora del I Premiu Timón de Cultura Asturiana convocáu por LArribada p’asociaciones, sociedaes y fundaciones con sé n’Asturies, que tengan como fin la conservación y promoción de la identidá cultural del país y qu’empleguen la llingua asturiana nes sos actividaes, según alcuerdu dun xuráu aconceyáu güei en Xixón y formáu por Mayte González, David M Rivas, Carlos Espina, Aurora García Rivas y presidíu por Humberto Gonzali. Nesta edición primera taben nominaos, amás de la entidá ganadora, Sociedad Humanitarios de San Martín, Fundación Belenos, Asociación Cultural San Tirso del Eo, Tertulia Cultural El Garrapiellu, Fundación Caveda y Nava, Sociedad Popular y Cultural La Regalina, y Xunta pola Defensa de la Llingua Asturiana. El xuráu quier destacar los trabayos de l’asociación premiada na difusión de la sidra y de los elementos culturales que-y son propios, faciendo reconocencia especial a una de les sos actividaes, la publicación dende l’añu 2003 de la revista mensual La Sidra, iniciativa editorial billingüe que llegó esti mes al númberu 116 y vien recoyendo, en más de cien páxines y con tiraes de miles d’exemplaes, noticies d’actualidá, reportaxes, información d’echadores y concursos, entrevistes a llagareros y hosteleros, recetes y tou aquello que se venceya al mundu sidreru. El gallardón del premiu consiste nuna obra del escultor y ceramista xixonés Jesus Castañón, que sentregará mientres la cellebración de La Vagamar 2013, el viniente sábadu 28 de setiembre, nun actu onde tamién van entregase’l VII Premiu Timón pa escritores n’asturianu y eonaviego, ganáu por Miguel Rojo, y el IV Premio Timón pa escritores asturianos en castellanu, llográu por Gonzalo Suárez. 27 d'agostu, 2013 0 FacebookTwitterPinterestEmail
Política IX esixi al Principáu la defensa del sector queseru y del campu by asturnet 23 d'agostu, 2013 El coordinador d’IX Manuel González Orviz, reclamó güei una solución urxente pa los afectaos pol frayatu de la canal de la compañía Eon, n’Arenas de Cabrales, qu’inda nun fueron indemnizaos pola empresa, a pesar de que la traxedia produxose hai yá un añu. El máximu responsable de la formación esplicó, en entrevistándose esta mañana colos propietarios de les queseríes n’Arenas de Cabrales, que nun se trata namái d’un problema particular de los dos empreses artesanales afectaes, sinón qu’afecta a tol sector queseru d’Asturies, yá que repercutió na capacidá de producción de quesu cabrales. A un añu de la traxedia, Eon tien les responsabilidaes derivaes d’esta traxedia. Equí teníamos dos queseríes que al día de güei nun pueden desenvolver la so actividá porque nun recibieron les indemnizaciones correspondientes. Lo qu’apura ye la puesta en funcionamientu de los dos queseríes y que se produza un alcuerdu. Hai que tener en cuenta qu’equí nun son tres empreses les que tán aldericando les indemnizaciones, sinón dos productores artesanales y una gran empresa. Ye una cuestión que podríamos dicir de David contra Goliath, aseguró. Pal coordinador d’IX ye fundamental, nestos momentos, que se desenvuelva una política activa pa dinamizar el sector agroganadero. El mediu rural, si nun somos conscientes, o tomamos midíes, muerrenos ente les manos. Manuel González Orviz punxo como exemplu la producción del cabrales. Tamos nuna zona onde’l Principáu tien que curiar lo que ye la distribución del conxuntu de los quesos y dar cobertoria a los productores. Entendemos que nuna situación difícil como esta, equí, el mercáu, la iniciativa privada, les entidaes financieres nun van dar cobertoria económica a productores. Tolo contrario, van tirase contra ellos, nel cumplimientu de los plazos, obligaciones que tienen contraíes coles entidaes financieres y el Principáu tien que xugar un papel de garantizar el caltenimientu de l’actividá, ayudar a que pasen esta travesía del desiertu porque tenemos siquier 30 productores de cabrales consolidaos y nun podemos dexar qu’esti procesu lleve a nengún per delantre. Manuel González Orviz dixo que’l Principáu d’Asturies nun puede ser un espectador pasivu yá que tien una responsabilidá especial na dinamización del sector. Según nel so momentu entendimos que la minería ye una cuestión bien importante pa les contornes mineres y que ye responsabilidá del Gobiernu (d’España),entendemos que la producción quesera, y non solo del cabrales, ye una competencia en parte importante del Principáu y amás fundamental pal desenvolvimientu económicu d’esta zona. El cabrales ye la cabeza tractora de la zona, pero tamién de los quesos. El coordinador d’IX amosóse críticu cola Alministración Autonómica yá que, dixo, nun ta siendo sensible y nun ta dando les garantíes, que nun son palabres, nin discursos, sinón recursos, les garantíes económiques, los avales, que puedan precisar tantu productores como nesti casu los mesmos distribuidores. González Orviz reclamó amás el desenvolvimientu d’un plan forestal n’Asturies que ponga n’usu terrenales güei esbardiaos na so esplotación y que tienen de ser una pieza clave pa rellanzar la economía de les árees rurales asturianes. 23 d'agostu, 2013 0 FacebookTwitterPinterestEmail
Escéniques Entamenlos XV Alcuentros de Pedagoxía Teatral by asturnet 23 d'agostu, 2013 Teatru del Norte entama ente’l 22 y el 27 d’agostu nel Colexu’l Prial de L’Infiestu, los XV Alcuentros nel Norte, alcuentros de Pedagoxía Teatral, qu’anguaño cunten con alumnos d’Asturies, Galicia, Cantabria, Cataluña, Madrid, Estremadura y China. Anguaño los XV Alcuentros nel Norte van tener como tema ‘El cuerpu n’escena’ enfotándose nel usu de del cuerpu en situación de representación. Los Alcuentros cunten como siempres col sofitu del Conceyu de Piloña. Dientro d’estos XV Alcuentros nel Norte representaranse una serie d’espectáculos-demostración que van tar abiertos a tol públicu de L’Infiestu. Les representaciones previstes entamen esti 23 d’agostu, a les 20 hores, cola conferencia demostración ‘La comedia del arte’, na que Etelvino Vázquez va encetar el pasáu y el presente de la Comedia del Arte como forma teatral vixente. El sábadu, 24 d’agostu a les 22 hores, va ponese n’escena l’espectáculu “Pequenu xestu”, pieza creada ya interpretada por Antonio Sarrio, na que fala de la so esperiencia como actor, mientres treinta año, en Cambaleo Teatru. 23 d'agostu, 2013 0 FacebookTwitterPinterestEmail
Sociedá La Xunta denuncia la precarización na enseñanza d’asturianu y na toponimia oficial by asturnet 23 d'agostu, 2013 El 20 dagostu pasáu, la Conseyería dEducación y Cultura daba a conocer la convocatoria dinterinidaes pal cursu 2013-2014. Y los badagüeyos cumpliéronse dafechu. Los recortes y la condena a la precariedá van ser la tónica quel Gobiernu asturianu escueye pa esti principiu de cursu. Esta situación de recorte xeneralizáu, cébase sagrinamente cola enseñanza de la llingua asturiana, que va ver menguaes les xornaes completes del profesoraú nun 40%. De la mesma manera, la reducción de xornaes a la metá xube un 80%, cola consecuente precarización de les condiciones llaborales. A too eso, súmasel diseñu ditinerancies mui dures ente localidaes que tan mui lloñe o d’accesu abegosu. Con esti panorama, enfrentámonos a otru cursu más, y van yá demasiaos, onde la marxinalidá avezada vese multiplicada cola precarización impuesta polos recortes y la mala planificación. Pero la marxinación nun ye lo único que podemos topar pal asturianu nesti principiu del cursu. La ciudadanía tamién pue observar cómo la Conseyería insiste en facer referencia nos sos escritos, llistes y convocatories a unes formes toponímiques yá inexistentes y allegales. La entidá encargada de la recuperación de la toponimia asturiana ye la mesma qu’inora les formes correctes y oficiales. Nel informe quapurrimos pue comprobase a les clares lusu incorrectu de la toponimia oficial que la Conseyería sigue faciendo y que pon en ridículu la existencia dientro del so organigrama d’una Dirección Xeneral de Política Llingüística y d’una Xunta de Toponimia. 23 d'agostu, 2013 0 FacebookTwitterPinterestEmail
Patrimoniu Denuncien que la cantera d’El Xardón empecipiara actividaes ensin llicencia by asturnet 22 d'agostu, 2013 L’Asociación de Vecinos de Viescas solicitó a la Conseyería de Fomentu, Ordenación del Territoriu y Mediu Ambiente qu’esclarie qué tipu de llicencia concedió a la empresa Caliares Alper, S.L. al respective de los usos d’una carretera provisional que, n’orixe, fuera solicitáu pa sacar madera del perímetru de la futura cantera El Xardón. El voceru d’IX en Salas, José Manuel Murias, denunció la medrana de los vecinos a que la empresa tea utilizando pa usos indebíos la citada vía provisional una y bones, dixo, constatóse la salida de camiones con grebos, daqué que, añedió, entepasa’l tipu de llicencia concedíu. Al paecer, el Principáu solo autorizara esta vía como accesu, ente que se realizaben les obres de montaxe de la planta, pa los llabores d’evacuación de la madera de desmontar y pal atroxu de los materiales necesarios pa la so instalación. Frente a ello, dende va selmanes, los vecinos pudieron comprobar el tráficu de vehículos cargaos con grebos dende la cantera, unes vegaes en dirección a Sotu de Los infantes y, otres, pela carretera dende Piedrafita escontra l’Escayu. La rocea respecto al usu ye entá mayor cuidando que estitráficu produzse n’hores intempestives. 22 d'agostu, 2013 0 FacebookTwitterPinterestEmail
Escéniques Wajdi Mouawad protagoniza la seronda teatral asturiana y española by asturnet 22 d'agostu, 2013 Los teatros españoles van abrir la temporada 2013-2014 con una programación que, sometida a los rigores de l’austeridá, decantser nesta oportunidá polos dramaturgos nacionales y les adaptaciones de los clásicos. Nel casu asturianu, el Teatru Xovellanos de Xixón va presentar una obra de Wajdi Mouawad, Mariña, un títulu del reputáu dramaturgu y actor canadiense d’orixe llibanés que tuvo hasta xunu nel Romea de Barcelona. La propuesta pa los próximos meses del Centru Dramáticu Nacional (CDN) calterizase pola diversidá “nel xéneru, estilu y estética” d’unos espectáculos que gocien de “una impecable factura artística”, según esplicó’l so director, Ernesto Caballero, na presentación de la nueva temporada. Trenta y seis obres de 41 autores con compañíes convidaes como’l Teatru d’Arte de Moscú o producciones propies como Amantes, de Vicente Aranda, formen parte d’una ufierta pa la que se podía de 4,5 millones d’euros, menos de la metá que va seis años. Nel Valle-Inclán tán programaes pala seronda representaciones como “Nada tres la puerta”, de temática europea, con llibretu de Juan Cavestany y empobinada por Mikel Gómez de Segura. Ente les cites imprescindibles de la temporada tarán “Seuls”, de Wajdi Mouawad, el reputáu dramaturgu y actor canadiense d’orixe llibanés que va protagonizar la seronda xixonesa, y “Ubu Roi”, de Declan Donnellan con Ckeek by Jowl, programaes esti branu na Bienal de Venecia de teatru con un gran ésitu. 22 d'agostu, 2013 0 FacebookTwitterPinterestEmail