La Xunta denuncia la precarización na enseñanza d’asturianu y na toponimia oficial

El 20 d’agostu pasáu, la Conseyería d’Educación y Cultura daba a conocer la convocatoria d’interinidaes pal cursu 2013-2014. Y los badagüeyos cumpliéronse dafechu. Los recortes y la condena a la precariedá van ser la tónica que’l Gobiernu asturianu escueye pa esti principiu de cursu. Esta situación de recorte xeneralizáu, cébase sagrinamente cola enseñanza de la llingua asturiana, que va ver menguaes les xornaes completes del profesoraú nun 40%. De la mesma manera, la reducción de xornaes a la metá xube un 80%, cola consecuente precarización de les condiciones llaborales. A too eso, súmase’l diseñu d’itinerancies mui dures ente localidaes que tan mui lloñe o d’accesu abegosu. Con esti panorama, enfrentámonos a otru cursu más, y van yá demasiaos, onde la marxinalidá avezada vese multiplicada cola precarización impuesta polos recortes y la mala planificación. Pero la marxinación nun ye lo único que podemos topar pal asturianu nesti principiu del cursu. La ciudadanía tamién pue observar cómo la Conseyería insiste en facer referencia nos sos escritos, llistes y convocatories a unes formes toponímiques yá inexistentes y allegales. La entidá encargada de la recuperación de la toponimia asturiana ye la mesma qu’inora les formes correctes y oficiales. Nel informe qu’apurrimos pue comprobase a les clares l’usu incorrectu de la toponimia oficial que la Conseyería sigue faciendo y que pon en ridículu la existencia dientro del so organigrama d’una Dirección Xeneral de Política Llingüística y d’una Xunta de Toponimia.