asturnet

A partir de les 17h30 d’esti xueves 6 de febreru, ponense a la vienta nes taquilles de Teatru Xovellanos les entraes pal espectáculu de clausura de FETEN 2014 cola obra Peter Pan de la compañía Ananda Dansa, que va tener llugar a les 19.30 hores del vienres 21 de febreru.

El restu de les entraes pa los espectáculos FETEN que se programen nel Teatru Xovellanos yá tán a la vienta, na taquilla del teatru nos horarios habituales. Les entraes pa los espectáculos del Centru de Cultura Antiguu Institutu, podrán adquirise nes taquilles B del Teatru Xovellanos, el mesmu día de la representación.

Los espectáculos FETEN que se presenten nos Centros Municipales son dafechamente gratuitos.

Los representantes del mundu teatral asturianu, axuntaos alrodiu de l’asociación Foroescena, na que figura’l mayor númberu de compañíes de la escena rexonal, axuntáronse ayeri n’Uviéu pa facer pública la so “reflexón sobre la situación del teatru profesional asturianu”, esplicó Cristina Elena Pérez, la presidenta, que nel intre pidió la dimisión del equipu y de la conseyera de Cultura”, Ana González.

Los representantes teatrales denunciaron que nun atopen respuesta de la Conseyería a les sos reivindicaciones: “Axustamos cola Conseyería hasta que llegamos a un puntu ensin torna. Nun se nos escuchó pa llegar a iguar”, aseguraron.

Al marxe de les cuestiones puramente culturales y profesionales, los asistentes a la xunta convocada por Foroescena coincidieron en “la desconsideranza y la trivialidad que caltuvo” Cultura escontra los sos planteamientos, que nada fixo ante peticiones de sofitu al teatru profesional, el so “espardimientu y el fomentu d’esta industria”, ente otres cuestiones puestes enriba de la mesa mientres diversos contactos.

Amás esplicaron que la Conseyería comprometiérase nun borrador a garantizar el 80% d’una partida destinada al teatru. Agora dicen que, a lo más, va ser esi 80%, el restu nun se sabe aú dirá parar”. Anque, rápido, unu de los miembros de la xunta directiva esclarió conceutos: “El restu d’esi presupuestu”, dixo, “nun se sabe aú va dir, anque de xuru so manga va ser pa financiar proyectos de Recrea que merca teatru de fora”. Recrea ye la Sociedá Pública de Xestión y Promoción Turística y Cultural del Principáu d’Asturies.

La dures conclusiones sobre la política teatral del Principáu prosiguieron a lo llargo de la xunta, celebrada nel chigre El Dólar, n’Uviéu. “La Conseyería ta desmantelando’l teatru profesional asturianu”. Y citaron una serie d’agravios en comparanza con otres autonomíes vecines de les que reciben un tratu distintu y meyor de los sos gobiernos. Asina, pos, la xunta directiva de Foroescena aportunó en denunciar la mala política de los actuales responsables y anunció que va faer un pidimientu a los grupos parlamentarios por que refierten estos planteamientos”. Amás paez-yos ofensivu que la conseyera de Cultura, Ana González, diga “que faemos más con menos”. Tamién amosaron la so desorientación pol sofitu al 100% del teatru amateur. “Nós vivimos d’esto”, aprofiaron. Foroescena tien ente les sos compañíes “El Caleyón del Gatu”, “Ververemos Teatru”, “La Texedora de Suaños”, “Konjuro Teatru”, “Ambigú Media Broadcast”, “Teatru del Cuervu”, “Goma Teatro”, “Keaton Producciones”, “Paraninfu 58”, “Barataria Teatru”, Carlos Alba “Cellero”, “Teatro Pausa”, “Escenapache”, “Producciones Nun Tris” y “El Desván de los Deseos”, toos ellos grupos teatrales con sólides carreres y actividá na escena rexonal. Amás hubo na xunta un representante de la plataforma de sofitu al teatru profesional.

La profesión teatral asturiana denuncia que la situación crítica na que s’alcuentra dende va tiempu llegó a el so puntu máximu coles midíes gubernamentales que-y faen esmoronase dfafechu. El llabor lleváu a cabu pola Conseyería d’Educación, Cultura y Deporte del Principáu d’Asturies en materia d’artes escéniques nun satisfai a los sectores profesionales de teatru de la comunidá y, por ello, l’Asociación d’empreses d’Artes Escéniques d’Asturies (Foroescena) denuncia la so pasividá y quier facese oyer con un actu de protesta esti miércoles, a partir de les 12 hores, nel Café Dólar d’Uviéu (Plaza de Porlier, 2).

El problema del teatru profesional asturianu ye la total inacción per parte de les autoridaes competentes l’asociación convocante, nuna situación que nun ye nueva, y que provocó yá que’l teatru profesional asturianu “lleve 20 años de retrasu respecto al que se fai n’otres comunidaes”.

Ente les dificultaes denunciaes alcuéntrase la titularidá privada de la totalidá d’espacios destinaos al desenvolvimientu del so llabor profesional, mentantu que nel restu de comunidaes les cifres que dixebren locales públicos de privaos asítiense en redol al 50%. Tamién no referente a les ayudes económiques, a la programación y a la creación de circuitos teatrales, y qu’empieza na educación y formación de los actores.

Les compañíes teatrales asturianes dicen sentise escaecíes pola alministración, de la que reparen que sofiten más a la escena amateur del Principáu.

Por mor de too ello, Foroescena tien convocáu un actu de protesta pa mañana, a partir de les 12 hores, nel Café Dólar d’Uviéu (Plaza de Porlier, 2). Nel actu, amás d’analizar les causes y los problemes de les artes escéniques asturianes, van faese públiques les midíes que se tomaron dende l’asociación. van asocedese amás ponencies y espérase qu’asistan xestores culturales, representantes de la SGAE, de los Conceyos y de la unión d’actores.