Asturies ye la comunidá autónoma que da meyores servicios públicos en llinia

Asturies lidera per tercer añu consecutivu la disponibilidá de los servicios públicos online, tanto en servicios pa ciudadanos como en servicios pa empreses, acordies col informe añal sobre’l desendolcu de la Sociedá la Información n’España 2009, fechu pola Fundación Orange. Acordies con esti informe, n’Asturies, la media total del nivel de desendolcu online de los 26 servicios públicos evaluaos ye del 97%, ventidós puntos sobre la media total de les 19 comunidaes autónomes, que ye del 67%, y nueve puntos sobre Andalucía y Navarra.

La Fundación Orange presentó esta memoria nun actu oficial celebráu nel Palaciu de Congresos de Madrid, que contó cola asistencia del Presidente del Principáu d’Asturies, Vicente Álvarez Areces, y d’otres autoridaes del Gobiernu asturianu como la Conseyera d’Alministraciones Públiques y Vocera’l Gobiernu, Ana Rosa Migoya; el Delegáu del Principáu d’Asturies en Madrid, Miguel Munárriz Cellino; el Viceconseyeru de Modernización y Recursos Humanos, Luis Iturrioz Viñuela; y el Viceconseyeru de Coordinación y Comunicación, Víctor Manuel Suárez Prado. Acordies con esti informe, la media de los servicios pa ciudadanos ye del 97%, mientres que la de los restantes servicios, empobinaos a empreses, ye del 98%. Hai 23 servicios públicos col máximu nivel de desendolcu online (Etapa 4), ye dicir, que puen facese de forma completa na rede.

Asina de los 26 servicios evaluaos, al Principáu d’Asturies namái-y falten tres p’algamar el 100% de disponibilidá online. D’esos servicios restantes que nun llegaron a la Etapa 4, ningún presenta’l nivel mínimu de desendolcu (Etapa 0). Los índices más baxos son los correspondientes a Cita Médica y Consulta de Llicitaciones. Nel actu oficial en Madrid, el Presidente del Principáu destacó l’esfuerzu inversor del Gobiernu asturianu pa desendolcar la Sociedá la Información na comunidá autónoma y añadió que, nesta llexislatura, l’Executivu va invertir 24 millones d’euros en TDT y 40 millones d’euros en despliegue de banda ancha en tol territoriu, incluyendo la rede Asturcón y les subvenciones pa la estensión de cobertura.