Asturies estrénase esti sábadu nel festival Liet-Lavlut con Dixebra

Esti sábadu, 18 d’ochobre, a partir de les 19:00 hores, va entamar en Lulea’l festival Liet-Lavlut, la Eurosivisión especializada en grupos musicales qu’usen llingües europees minorizaes.

La organización d’esti festival cuerre a cargu del Sweblul, una asociación que representa a les cinco minoríes llingüístiques de Suecia y cunta col sofitu d’entidaes públiques d’aquella zona y del departamentu suecu del Buró Européu de Llingües minoritaries.

Esta ye la primer vegada que participa un grupu que canta n’asturianu, sumándose asina l’asturianu a les demás llingües participantes: bretón, corsu, albanés d’Italia, sami, frisón, friulanu, galés, mordviniu y gallegu.