ASBRU entama en Bruseles el quintu Ciclu de Curtiumetraxes

Tres el gran ésitu de los cuatro ediciones anteriores y de nuevu en collaboración col Festival Internacional de Cine de Xixón, Asturianos en Bruseles (ASBRU) entama’l V Ciclu de Curtios Asturianos, que se va celebrar los próximos díes 25 y 26 de payares a les ocho la tarde, na Casa d’Asturies en Bruseles, asitiada na cai Saint Laurent, 36-38 de la capital de Bélxica. FICXixón y ASBRU escoyeron especialmente pa esta iniciativa los meyor curtiumetraxes asturianos proyectaos nel certame xixonés en 2009.

Nel primer pase del xueves 25 ASBRU va presentar una selección de la meyor y más recién producción de curtiumetraxes fechos por cineastes asturianos mozos. Ente los curtios escoyíos atópense “Puntu”, d’Eva Gallego Valdés, y “Tacones”, de Benjamín Villaverde, ganadores del Premiu Día d’Asturies nel últimu Festival Internacional de Cine de Xixón.

El vienres 26 va clausurar el V Ciclu de Curtios Asturianos el curtiumetraxe documental “La tierra de Oscar”, dirixíu pol xixonés Alejandro Zapico y que narra un día cualesquier na vida d’un neñu de Karangasso (Mali). Con un escelente guión robláu por Julio Rodríguez, “La tierra de Oscar” cunta cola particularidá d’utilizar pal doblaxe les voces d’una ventena d’alumnos d’un colexu de Xixón. Nel añu en que ASBRU celebra’l so quintu aniversariu, va completar el pase del vienres la sección “Cinco años, cinco curtios: los favoritos d’ASBRU”, compuesta polos filmes que, por distintos motivos, son los preferíos de la xunta directiva de l’asociación. La directora Julia Guillén Creagh va tar presente na clausura pa presentar el so curtiumetraxe “Sombras en el viento”, filme basáu nel cuentu La última fueya, d’O. Henry, y que yá lleva llograos nel últimu añu 14 premios en festivales internacionales.

Con esta actividá ASBRU pretende siguir na llínea, empecipiada en 2005, de sopelexar distintos aspeutos de la cultura asturiana en Bruseles y d’ufiertar la posibilidá de conocer les sos facetes más innovadores a un públicu ampliu ya internacional.