Antonio Martínez presenta en Noreña’l so llibru sobre la sidra

La editorial LA SIDRA vieno acabante d’asoleyar una nueva publicación.”Noreña y la Sidra. Apuntes sobre la hestoria sidrera d’un conceyu asturianu”, del hestoriador noreñés Antonio Martínez Fernándezm que va presentase’l prósimu miércoles 18 de setiembre a les 19:30 na Casa de Cultura “Severo Ochoa” de Noreña. L’Actu de presentación ta dientru de la programación oficial de les Fiestes del Ecce Homo de Noreña gracies a la collaboración de la Sociedad Noreñense de Festejos (SONOFE) y l’Asociación Cultural InfoNoreña.

L’actu de presentación va finar con una amuesa gastronómica a cargu de la cheff llocal Estefanía Ferreras y na que se podrán degustar distintos tipos de pinchos cola sidra y/o la mazana como protagonista.

Noreña y la sidra foi la obra ganadora de la tercer edición del Premiu d’Ensayu Emilio Trabanco Trabanco. Un estudiu d’hestoria llocal que toma’l sector sidreru, en xeneral, y la industria sidrera, en particular, como exa principal y que tien en cuenta les connotaciones socioculturales de la sidra n’Asturies y la importancia del chigre y el llagar como espacios d’ociu y sociabilidá. La obra asoleya la hestoria sidrera de Noreña dende mediaos del s.XVIII, centrándose nel últimu terciu del s.XIX y la primera mitá del s.XX, finando col procesu de decadencia de la industria sidrera a finales de sieglu.

Noreña y la sidra ye una aportación novedosa a la hestoriografía sidrera asturiana, y a la llocal. Una primer hestoria sidrera de Noreña, que quier contribuyir a los estudios socioculturales asturianos y ser preséu pa investigaciones asemeyaes. Surde d’una investigación afitada nel trabayu archivísticu, hemerográficu y bibliográficu, a la que se-y amiesta material fotográficu, publicitariu y d’ellaboración propia. Con esti ensayu, l’autor quier “emponderar una industria escaecida nel conceyu, la de la sidra, que tuvo un pesu relevante na historia de Noreña”.

Antonio Martínez Fernández (1980) vecín de Noreña ye Llicenciáu n’Hestoria y Máster n’Analís Sociocultural pola Universidá d’Uviéu. Con Noreña y la Sidra, avérase a los estudios socioculturales – cola sidra como referencia – y a la hestoria llocal del so conceyu. Ye’l segundu llibru qu’espubliza, enantes, en 2009, asoleyara Exiliu Asturianu (1937-1939), obra de referencia na so temática. Tamién tien collaborao n’otres publicaciones como N’Ast. Cartafueyos d’Ensayu o Erada. Revista d’Hestoria Contemporanea d’Asturies, ente otres.