Andecha Folclor y Muyeres algramen el Premiu Martínez Torner

El Conceyu d’Uviéu otorgó esti xueves l’undécimu Premiu Nacional de Folclore “Martínez Torner”, que convoca añalmente la Escuela Municipal de Música Tradicional Asturiana, a los colectivos Andecha Floclor de Uvieu y Colectivu Muyeres.

Los dos colectivos vienen dende hai más de 20 años complementando la so actividá nel estudiu de la música tradicional de la rexón col espardimientu d’esa música y de la nuestra cultura.

Andecha Folclor dedicó al estudiu de la música tradicional trabayos que vieron la lluz en dos llibros monográficos cola temática referente a la jota y la muñeira, amás d’una serie de discos cola tema referencial del ciclu de Navidá que tuvieron una gran acoyida.

El colectivu Muyeres, pela so parte, foi’l primeru n’Asturies en poner en valor l’aportación de la muyer y la so contribución nel caltenimientu de la cultura tradicional, col usu de la pandereta y la publicación d’álbumes de distintos estilos de música de calter festivu y ceremonial. Concedíu por unanimidá, el premiu va apurrise’l próximu xueves 26 de noviembre na Sala de Cámara del Auditoriu Príncipe Felipe.