Portada Conceyos Alumnes del IES Carreño Miranda representen a Avilés nel eventu Talent Woman España

Alumnes del IES Carreño Miranda representen a Avilés nel eventu Talent Woman España

by redacción asturnews

Alumnes del IES Carreño Miranda representen a Avilés nel eventu Talent Woman España que va celebrase esti xueves 28 y el vienres 29 en Málaga. Formen parte del equipu “Tree Dron”, unu de los 8 finalistes del concursu “Propuestes innovadores a los retos d’Europa 2020”. L’equipu foi’l ganador del taller sobro soluciones innovadores al cambéu climáticu celebráu na 2ª edición de “Ciencia en Femenín”.

Trés alumnes del IES Carreño Miranda van participar nel eventu Talent Woman España que se celebra los díes 28 y 29 de payares nel Palaciu de Feries y Congresos de Málaga. Van facer como representantes del equipu “Tree Dron”, que compite como finalista nel concursu Propuestes innovadores a los retos d’Europa 2020″, entamáu pola Asociación de Parques Científicos y Tecnolóxicos d’España (APTE).

L’equipu “Tree Dron” ye unu de los ocho finalistes qu’opten a faese con esti premiu nacional, en siendo ganador del taller “Guardianes del planeta. Vixilantes del clima”, celebráu n’Avilés el pasáu mes d’ochobre dientro de la 2ª edición de la iniciativa “Ciencia y Tecnoloxía en Femenín”.

Esti taller, nel que participó más d’un centenar d’estudiantes, taba empobináu a buscar propuestes de soluciones innovadores al retu del cambéu climáticu dende les disciplines STEM (ciencia, tecnoloxía, inxeniería y matemátiques). Los alumnos y alumnes apurrieron soluciones al retu plantegáu entamaos n’equipos de trabayu, y ellaboraron vídeos esplicativos sobro les mesmes.

La propuesta de “Tree Dron” consiste nel desenvolvimientu d’un dron capaz de detectar quemes, que cunte con un dispensador de granes pa contribuyir a repoblar les zones afectaes y a compensar la contaminación. Amás, l’equipu d’estudiantes del IES Carreño Miranda propón qu’esti dron cunte con una cámara capaz d’identificar a pirómanos, según con un dispositivu qu’emita avisos instantáneu a los servicios d’emerxencies. El so vídeu esplicativu puede vese al traviés del siguiente enllaz: https://www.youtube.com/watch?v=X20XCZ2QUDo.

Como autor de la solución más novedosa ya innovadora de cuantes fueron concebíes pol alumnáu avilesín, l’equipu “Tree Dron” non yá va participar en Talent Woman representando al Parque Científicu Tecnolóxicu “Avilés Isla de la Innovación”, sinón que tamién va poder esfrutar d’un paséu en catamarán pol entono de la ría y el faru d’Avilés, acompañaos por guíes de la naturaleza que-yos amosarán la riqueza medioambiental de la mariña.

Tamién te podria gustar