Alberto Vega ufierta nel so últimu llibru la madurez plena de la so obra poética

Alberto Vega acaba de publicar na prestixosa editorial Visor el so últimu llibru de poemes: “Estudio melódico de un grito”, una obra de madurez na que la voz del poeta llangreanu suena más personal y fonda qu’en nenguna de les sos obres anteriores. El volume, que cuenta con una introducción del tamién asturianu Ángel González, va presentase esti martes 28 en la Casa Cultura de La Felguera nun actu que va cuntar cola presencia de los miembros del grupu “Luna de Abajo”, al que pertenez el poeta llangreanu dende la so fundación.

Venticinco años después de la publicación del so primer volume de versos: “Brisas ligeras”, Alberto Vega reún los sos últimos poemes nun nuevu volume: “Estudio melódico del grito”(Visor, 2005), un llibru qu’amuesa la parte más fonda y verdadera del xuegu de mázcares y pantasmes col qu’esti autor vien desenvolviendo la so obra lliteraria con títulos tan fundamentales como “Memoria de la noche”(1981) o “Cuaderno de la ciudad”(1985). La presentación d’esti últimu llibru de Vega va cuntar amás de cola presencia del so autor, cola de los miembros del colectivu “Luna de Abajo”, al que pertenez el poeta llangreanu dende los sos escomienzos. Otros escritores como Noelí Puente, Ricardo Labra, Miguel Munárriz y el diseñador Helios Pandiella van acompañar al autor de “Estudio melódico del grito” na so presentación pública. La cita ye esti martes 28 a les 20.00 na Casa Cultura de La Felguera nun actu organizáu pola asociación Cauce del Nalón.