Adolfo Camilo Díaz gana’l premiu Montesín con “Khaos”

La obra ganadora, Khaos, ye una llarga novela xuvenil (322 páxines), d’acción trepidante y futurista, con continues referencies a la cultura pop, los videoxuegos, los modernos sistemes de comunicación y entretenimientu, na que se planteen con crudeza conflictos sociales, racistes o sexistes. L’acción empieza cuando yá se contabilicen miles de muertos y feríos per toa Asturies, y los tres protagonistes, Equis, Penélope y el xoven inmigrante negru Jean (de 17, 18 y 16 años respetivemente) tienen qu’enfrentase a unos acontecimientos que los superen pa intentar salvar el mundu y, ensin dulda, la so propia vida.

El xuráu quixo destacar, en primer llugar, l’altu nivel de calidá de la mayor parte de los participantes, el carácter de verdadera novela de la obra ganadora, que se pue definir como dura, onde destaquen el retratu de la sociedá asturiana del futuru, unos protagonistes bien definíos qu’evolucionen a midida qu’avanza la trama y un ritmu narrativu áxil y modernu.