Abiertes les inscripciones pa los talleres infantiles de branu d’Avilés

Les inscripciones pa los talleres infantiles de branu d’Avilés “Xugando colos museos”, entamaos pol Muséu de la Hestoria Urbana d’Avilés pa neñes y neños d’ente 4 y 12 años, quedaron abiertes esti llunes 15 de xunetu. Los y les más pequenes van poer desenvolver les sos habilidaes plástiques en dos talleres distintos sobro Arqueoloxía y Belles Artes.

Como vien siendo habitual nos últimos branos, la conceyalía de Cultura, al traviés del Muséu de la Hestoria Urbana d’Avilés y cola collaboración de la entidá “Cúntame un cuadru”, entama una serie de talleres pa neños y neñes d’ente 4 y 12 años mientres les vacaciones branices, sol lema “Xugando colos museos”. Les inscripciones yá tán abiertes.

Los talleres tienen l’oxetivu de que los más pequenos y pequenes pasen les mañanes de branu esfrutando y desenvolviendo les sos habilidaes plástiques mientres xueguen, crean, pinten y aprienden hestoria d’Avilés. Son los siguientes:

“Xugando colos museos d’arqueoloxía” va tener llugar los díes 24 de xunetu y 14 d’agostu. Nél, los y les participantes van faer la so propia escavación, van afayar ayalgues y van crear el Muséu Arqueolóxicu d’Avilés.

“Xugando colos museos de Belles Artes” va desenvolvese los díes 31 de xunetu y 21 d’agostu. Los neños y neñes van crear el so propiu espaciu espositivu, non yá coles sos obres artístiques sinón afayando los recursos museográficos como cartelas, espositores, paneles, peanas…

Tolos talleres van tener llugar a les 11:30 hores, con una duración d’una hora y media. La inscripción ye gratuita y pue formalizase nes instalaciones del Muséu de la Hestoria Urbana d’Avilés, asitiáu na cai La Ferrería, 33, o al traviés del corréu electrónicu museodeavilesaviles.es. El númberu de places per cada sesión ye de 21, polo que la reserva va facer n’orde d’inscripción, y non podrá repitise la participación en cada taller.

Per otra parte, el Muséu pon a disposición de les families una visita a les sos instalaciones mientres el tiempu que dure’l desenvolvimientu de los talleres.