Abierta n’Avilés la inscripción nel nuevu programa Discover EU Inclusión

Avilés vieno acabante abrir pala so mocedá la inscripción  nel nuevu programa Discover EU Inclusión pa mozos d’Europa Equí. Les candidatures podrán unviase hasta’l 25 d’ochobre y el viaxe podrá realizase ente’l 1 de marzu de 2023 y el 29 de febreru de 2024.

El martes entamó’l plazu d’inscripción pa la mocedá de 18 años tinteresada n’afayar Europa al traviés d’esperiencies d’aprendizaxe. Los programes  DiscoverEU y DiscoverEU Inclusión, enmarcaos dientro del proyectu Européu Erasmus+, lleva dende 2006 realizando diverses acciones de movilidá pa los mozos avilesinos.

DiscoverEU Inclusión ye una acción diseñada pola Comisión Europea pa facilitar la participación de mocedá con menos oportunidaes, esto ye, persones que por motivos económicos, sociales, culturales, xeográficos, de salú, orixe migrante, discapacidá, dificultaes d’aprendizaxe o por cualesquier otra razón tean discriminaos. Al traviés d’esta acción les entidaes que trabayen con esti colectivu pueden solicitar financiamientu p’apurrir el sofitu necesariu por que estos mozos puedan viaxar. Van Poder participar un máximu de cinco acompañaos por una persona de sofitu si fuera necesariu.

Les candidatures podrán unviase hasta’l  25 d’ochobre y solo va poder participar mocedá que naciere en 2004. Los escoyíos van llograr un bonu de viaxe y una tarxeta de descuentu DiscoverEU con descuentos en visites culturales, actividaes d’aprendizaxe, deportes, tresporte local, agospiamientu, comida, ente otros. Los viaxes van tener xuna duración d’ente 1 y 30 díes y podrán realizase ente’l 1 de marzu de 2023 y el 29 de febreru de 2024.

La Oficina de Movilidá Xuvenil Internacional d’Avilés, Europa Equí, va tar dando a conocer, mientres los próximos meses, dambos programes a la mocedá. Europa Equí ye un proyectu desenvueltu dende’l Serviciu de Mocedá del Conceyu d’Avilés en collaboración cola Asociación Cultural En Construcción. Al traviés del programa Européu Erasmus+ y del Cuerpu Européu de Solidaridá lleven 16 años emprestando especial atención a aquellos proyectos que promueven la inclusión de moces con menos oportunidaes