36 persones participen nos proyectos “MetAvilés”, “PromocionAvilés” y “Y-Commerce”

Un total de 36 persones, mozos y moces avilesinos, participen dende’l mes d’abril nos trés proyectos puestos en marcha pol Conceyu d’Avilés dientro del Programa Operativu d’Empléu Xuvenil, cofinanciáu pol Fondu Social Européu. Tratase de les acciones formatives denominaes “MetAvilés”, “PromocionAvilés” y “Y-Commerce”, centraes nos sectores del metal, la construcción y l’industria; el sector turísticu y el comerciu electrónicu, respectivamente.

Tán dirixíos a mozos menores de 30 años qu’atopen dificultaes pa la so incorporación al mercáu llaboral, bien por un abandonu prematuru del sistema educativu, por non cuntar con esperiencia llaboral por non tener una cualificación profesional específica o porque les sos competencies nun s’afaen a les demandes llaborales.

12 persones van rematar esti branu l’itinerariu denomináu “Técnicu polivalente en seguridá y manexu de maquinaria y allegaes”, dientro del proyectu “MetAvilés”; otres 12 van terminar el tituláu “Operaciones básiques de restorán y chigre”, incluyíu nel proyectu “PromocionAvilés”; y otres 12 van concluyir l’itinerariu “Actividaes auxiliares de comerciu”, dientro del proyectu “Y-Commerce”.

Toes elles van desenvolver práctiques non llaborales n’empreses y, amás de ser formaes nos respectivos perfiles profesionales, tamién van recibir un módulu de conocencies tresversales de 30 hores de duración compuestu por Inglés (20 hores), Tecnoloxíes de la Información y la Comunicación (8 hores) ya Igualdá d’oportunidaes (2 hores).

Más información