24 mozos y moces remataren so formación na Escuela Taller “Marca Avilés”

Un total de 24 mozos y moces algamaron un Certificáu de Profesionalidá dempués de la formación teóricu-práctica que recibieron nel últimu añu y mediu na Escuela taller d’Avilés.

Esta formación dexó al alumnáu’l llogru de Certificaos de Profesionalidá en delles modalidaes: “Confección y Publicación de Páxina Web”, “Tratamientu y maquetación d’Elementos gráficos en pre-impresion”, “Cámara de cine, vídeu y televisión”, “Desenvolvimientu de productu multimedia interactivos”, “Promoción turística local ya información al visitante” y “Dinamización, programación y desenvolvimientu d’acciones culturales”, correspondiendo dos d’ellos a caúna de los trés especialidaes de Marca Avilés.

L’alumnáu participante na Escuela Taller Marca Avilés del Conceyu d’Avilés y el Gobiernu d’Asturies clausuraron esta actividá formativa pol emplegu nun actu celebráu nel Palaciu de Valdecarzana con presencia del conceyal de Promoción Económica, Manuel Riola.

Les Escueles Taller configúrense como programes que tienen por oxetu ameyorar la emplegabilidá de les persones desemplegaes alternando la formación y la cualificación con un trabayu granible, cola cuenta de promover el so insertamientu llaboral. La formación ta financiada pol Serviciu Públicu d’Empléu del Principáu d’Asturies y co-financiada pol Fondu Social Européu. El plan formativu, teóricu y prácticu, constó de 2.700 hores de formación técnica. Amás ente los conteníos ufiertaos diose formación complementaria relativa a informática nueves tecnoloxíes, sensibilización ambiental, prevención de riesgos llaborales, igualdá de xéneru, busca activa d’empléu y autoempleo.

Desenvolviéronse trabayos en programes educativos y de sofitu a la comunidá incluyíos nel proyectu como los Talleres Infantiles d’Avilés (TIA), XI Foru Solidariu, Carrera Solidaria col Sáhara, el Segundu Plan d’Infancia y Adolescencia, XX aniversariu de La Curtidora, etc.