Los premios Timón protagonicen los actos d’esti llunes del aniversariu de L’Arribada

La cellebración de los 10 años de L’Arribada continúa esta selmana cola xornada d’esti llunes 14 dedicada a los Premios Timón.

El primeru de los actos, que cuenta col sofitu del Ayuntamientu de Xixón, va ser a les 18 hores nel Centru Cultura Antiguu Institutu, onde van desenvolvese tolos actos de la programación, y va centrase na ufierta d’información sobre les ternes de nominaciones a presentar al xuráu que tien de fallar los Premios Timón 2016.

Un cuartu d’hora depués, va facese alcordanza de  la xente gallardonao colos Premios Timón dende 2007 y va facese darréu un alderique sobre los sos oxetivos. A les 19 hores entamarán les presentaciones y declamaciones, cola de la obra de Roberto González- Quevedo, “Hestoria de la L.literatura primera en Pesicia”, pa dar pasu a les 19,30 hores al ’escritor Xuan Xosé Sánchez Vicente que fadrá con dellos poemes un repás a la so obra llírica.

A les 20 hores seguirán les actividaes, empobinaes al teatru, cola participación de Boni Ortiz, perconocíu críticu ya investigador teatral, qu’ufrirá una conferencia sobre’l teatru asturianu. Ente más otro, dende 2003 hasta 2088 fizo la crítica teatral nel diariu La Voz de Asturias y, dende 2009 hasta la so desapaición, nel selmanariu en llingua asturiana Les Noticies. Con esta conferencia fai un repás a la historia del teatru independiente asturianu.