Patrimoniu Madrid ultima una llista de proyectos culturales desestimaos pa que los conceyos vuelvan a solicitalos by asturnet 9 d'avientu, 2004 Si nun hai conveniu nin presupuestu, nun hai obra. El Gobiernu central unviará darréu al Principáu una llista de grandes proyectos culturales comprometíos baxo l’anterior Executivu del PP y qu’agora habrán tramitar otra vuelta ‘dende cero’ los ayuntamientos afectaos, acordies colos criterios aprobaos esta mañana p’aplicar el denomináu 1 por cientu cultural, obligación de cada ministeriu de reservar esi porcentaxe p’acciones culturales nes inversiones propies de más de 100 millones de les vieyes pesetes. Les prioridaes pa executar los proyectos pendientes sedrán les mismes que reclamó hai díes el Parlamentu asturianu, y qu’afitara el Conseyu de Patrimoniu Hestóricu n’ochobre pasáu: que se cumpla’l fin previstu pa esi tipu d’actuaciones con financiación ministerial, que s’actúe sobro edificios o elementos catalogaos como Bienes d’Interés Cultural, que’l proyectu tea sufragáu por varies Alministraciones y que se trate d’obres públiques. Asina lo decidió güei en Madrid la Conferencia Sectorial de Cultura, na que participó la conseyera asturiana del ramu, la socialista Ana Rosa Migoya, quien precisó que’l so departamentu contactará colos ayuntamientos afectaos por proyectos agora desestimaos pa que los tramiten otra vuelta, si-yos peta. “Na anterior llexislatura aprobáronse proyectos ensin la firma de los oportunos convenios y ensin consignaciones presupuestaries”, recordó Migoya, y esi fechu xeneró una situación “qu’esmolez a los gobiernos autonómicos y que fai falta esclariar”. En principiu, sólo siete de los 17 proyectos comprometíos pol PP p’Asturies siguen en pie: los remocicamientos de les cubiertes de la Catedral, el claustru’l monasteriu de San Pelayu, la Torre’l Reló de Castropol y el monasteriu de Corniana; la preservación del cascu hestóricu de Llastres; les obres na Casa Hevia, en Villaviciosa; y la fechura’l proyectu de recuperación del entornu de la ilesia de Santuyano, n’Uviéu. Archivu. El Parlamentu pide-y a Madrid que respete les sos prioridaes nos proyectos del 1 por cientu cultural 9 d'avientu, 2004 0 FacebookTwitterPinterestEmail
Tecnoloxía Un programa de corréu ellaboráu con códigu llibre permite xestionar la correspondencia n’asturianu by asturnet 9 d'avientu, 2004 El códigu llibre da un pasu más. La entidá Softastur, qu’ellabora tornes al asturianu de programes y preseos informáticos de llibre copia, distribución y modificación, asoleya una versión del xestor de corréu ‘Thunderbird’ que permite organizar la correspondencia ellectrónica dafechu en llingua asturiana, col doble sofitu d’un filtru de mensaxes non deseyaos y una axenda automática pal llabor diariu. Alternativu al ‘Outlook Express’ y a otros programes pa xestionar el corréu, el xestor ‘Thunderbird’ proporciona mayor un mayor grau de seguridá que’l programa de corréu-e más difundíu por Microsoft, tanto frente al ataque de virus informáticos, como énte la llegada a la cuenta del usuariu de mensaxes publicitarios non deseyaos, el denomináu ‘spam’. Amás d’ello, el programa qu’agora ta a disposición del públicu en llingua asturiana na so versión 0.9 -con calter xeneral, yá ta disponible la versión 1.0- inclúi tamién una axenda n’asturianu que permite planificar xuntances de trabayu y avisar de forma automática, por corréu-e, a los participantes nesa reunión. Los usuarios d’internet yá teníen la posibilidá d’emplegar, ente otres soluciones informátiques en llingua asturiana, los navegadores Firefox y Mozilla, y puen acceder, asinamesmo, a ferramientes especializaes pa la xestión de foros o l’actualización de conteníos, tales como phpBB y Phorum. Los programes y preseos de códigu llibre, alternativos a los que desendolquen y rentabilicen grandes grupos de telecomunicaciones y alitaos orixinariamente por voluntarios, úfren-y al usuariu una cuádruple llibertá: pa usar el programa de que se trate, pa estudiar cómo furrula y adaptalu a les necesidaes propies, pa distribuyir copies y, a lo cabero, pa meyoralu, lo que requier accesu llibre al códigu fonte. Descarga del ‘Thunderbird’ n’asturianu na web de Softastur 9 d'avientu, 2004 0 FacebookTwitterPinterestEmail
Comunicación La prensa en papel perdió 25.000 llectores diarios nel últimu añu, según l’Estudiu Xeneral de Medios by asturnet 9 d'avientu, 2004 Un total de 25.000 llectores menos cada día. Los periódicos asturianos de gran difusión dexaron d’interesa-yos a esi númberu de ciudadanos nos últimos doce meses, según la última midición publicada pol Estudiu Xeneral de Medios (EXM), que cifra en más de mediu millón la cifra de llectores habituales de diarios en papel n’Asturies. Asina, según la estadística asoleyada pola Asociación pa la Investigación de Medios de Comunicación, responsable de la ellaboración del EXM, el diariu ‘La Nueva España’ sigue siendo el más lleíu nel Principáu, pero pierde 7.000 llectores diarios respecto a hai un añu: Pasa de 376.000 a 369.000. Esi descensu ye mayor, porcentualmente, nel casu’l diariu xixonés ‘El Comercio’, que acordies coles cifres asoleyaes nel Estudiu Xeneral de Medios pierde un total de 18.000 llectores y suscita agora l’interés cotidianu de 175.000 ciudadanos. Pol so llau, el tercer gran periódicu en papel ellaboráu nel ámbitu’l Principáu, ‘La Voz de Asturias’, nun apaez nel llistáu más reciente del EXM -a lo menos na so versión n’internet-, que piesllen los periódicos con más de 90.000 llectores diarios. Les cifres acabante asoleyar pola Asociación pa la Investigación de Medios correspuenden al periodu trescurríu ente febreru y payares de 2004, la denominada tercer oleada del estudiu. Nesi mesmu periodu de 2003, la prensa asturiana en papel tenía 25.000 llectores más, siempre según les conclusiones del Estudiu Xeneral de Medios. Esta investigación ellaboróse, nos sos cálculos más recientes, a partir d’entrevistes personales a más de 40.000 persones de tol Estáu. El marxe d’error posible ente la estimación y los datos reales a los qu’esta se refier ronda, con calter xeneral, el 3 por cientu. Datos íntegros del Estudiu Xeneral de Medios 9 d'avientu, 2004 0 FacebookTwitterPinterestEmail
Lliteratura Cultura prevé convenios col Estáu pa promocionar la lliteratura asturiana fuera’l Principáu by asturnet 9 d'avientu, 2004 Proyección de la lliteratura asturiana fuera del Principáu. La Conseyería de Cultura plantega la firma d’alcuerdos col Estáu pa promocionar les lletres asturianes nel esterior, depués que los escritores denunciaren falta d’atención hacia la figura del autor nel engranaxe editorial y demandaren, ente otres midíes, la presencia del asturianu nos Premios Nacionales de Lliteratura. Asina respondió esti mediudía n’Uviéu a les reivindicaciones de los autores el director de la Oficina de Política Llingüística, Ramón D’Andrés, quien anunció inminentes midíes concretes pa promocionar la lliteratura en llingua asturiana darréu entre en vigor, nes prósimes selmanes, el Plan de Normalización Sociollingüística. Trátase, según D’Andrés, d’apoyar dende l’Alministración a una lliteratura “con prespectives enormes y una mui bona tarxeta de presentación”. Una representación de los creadores d’esi collectivu asoleyó güei les conclusiones de la Xunta d’Escritores cellebrada a finales de payares en Llanes, ente les que destaquen precisamente un llamáu a la promoción esterior de los llibros publicaos n’asturianu, la demanda de coficialidá pa la llingua asturiana y, de mou singular, la esixencia de mayor procuru pa colos autores. Nesti sen, el cordinador de la Xunta d’Escritores, Xuan Bello, aseguró que la promoción de la lliteratura debe ser “integral” y beneficiar a tolos axentes de la ‘cadena’ lliteraria: autores, editores, distribuyidores y llibreros. Lo contrario, sorrayó, provoca “ocultación” nel mercáu editorial. Asinamesmo, Bello refugó la posibilidá de que s’afite una periodicidá concreta pa cellebrar nueves xuntes d’escritores y argumentó que futures xuntances habrán convocase acordies coles peticiones de los propios autores, en momentos que se consideren afayadizos y continuando con una organización “un tanto anárquica”. Nel so manifiestu final, los 50 escritores aconceyaos en Llanes hai agora once díes felicítense con “meditáu optimismu” de la variedá de voces y d’obres de la lliteratura en llingua asturiana, ufren el so llabor pa edificar en comuña una “casa afayadiza y democrática” y reclamen una mayor presencia de les sos obres na rede de biblioteques y nel sistema educativu. Archivu. La Xunta d’Escritores pieslla reclamando más atención pa la lliteratura n’asturianu nes biblioteques 9 d'avientu, 2004 0 FacebookTwitterPinterestEmail
Escéniques El ritmu y la enerxía del musical percusivu ‘Mayumana’ desembarquen en Xixón con éxitu de públicu by asturnet 9 d'avientu, 2004 Humor, ritmu, enerxía. Los intérpretes del musical ‘Mayumana’ prometieron una mecigaya d’esos tres elementos poco antes de salir a escena en Xixón y cumplieron la so pallabra énte un auditoriu completu. La compañía, d’oxixe israelí, defendió ayeri la variedá de les artes escéniques y la necesidá de “sacar al neñu” qu’hai dientro del espectador pa establecer un vínculu especial col públicu. Hores antes d’estrenar el so espectáculu nel teatru Xovellanos, una representación d’intérpretes definió’l so montaxe como un mou de retomar movimientos ñaturales escaecíos na edá adulta y alvirtieron que tres de los estrueldosos númberos de percusión qu’integren l’espectáculu nun s’escuende nengún mensaxe ocultu: Namás se busca la identificación col públicu y una ‘terapia’ conxunta de bon humor. Y asina ocurrió nel so estrenu na nueche xixonesa, que recibió con llenu el Xovellanos. Na so taquilla, van camín d’escosar les llocalidaes a la venta pa les seis funciones restantes que ‘Mayumana’ ufrirá en Xixón hasta’l domingu prósimu, nes que’l grupu de ocho artistes desplazaos a la ciudá saquen soníos y ritmos a cubos de basoria, llates de metal, tarros somorguiaos n’agua y aletes de bucéu. Creada en 1996 por Eylon Nuphar y Boaz Berman, la compañía qu’anueche s’estrenó en Xixón echó a andar depués d’un llabor previu de dos años pa seleccionar un grupu inicial d’ocho intérpretes y ensayar les coreografíes. Anguaño, ‘Mayumana’ ufre funciones diaries n’Israel, llegó a más de 200.000 espectadores sólo nel so pasu por Madrid y axunta enriba l’escenariu a actores, acróbatas, guíes turísticos, camareres y baillarines de capoeira. En xira per España dende ochobre pasáu, ‘Mayumana’ permanecerá en Xixón hasta’l domingu y viaxará depués al País Vascu pa pesllar ellí el so periplu de seronda, qu’inclúi ‘jam session’ de percusión xunta’l públicu, fuera de los teatros o nel so vestíbulu, depués de la última función de cada día, siempre que les condiciones lo permitan. 9 d'avientu, 2004 0 FacebookTwitterPinterestEmail
Patrimoniu El Principáu compromete 300.000 euros pa meyorar el castru de Cuaña ya instaurar visites guiaes tol añu by asturnet 7 d'avientu, 2004 Meyorar l’aula didáctica, llevantar un mirador ya instaurar visites guiaes. El director xeneral de Promoción Cultural del Principáu, Carlos Madera, compromete una inversión pública de 300.000 euros pa da-y más puxu al conxuntu arqueolóxicu del castru de Cuaña, nel occidente d’Asturies, col envís de duplicar el númberu de visitantes que’l yacimientu tuvo nesti añu. Les negociaciones pa construyir un mirador nel entornu’l castru yá tán abiertes col Arzobispáu d’Uviéu, propietariu de los terrenos nos que l’Ayuntamientu quier edificar la nueva instalación, con dos posibilidaes abiertes: que les autoridaes eclesiástiques cedan o vendan la finca elixida. Cola ayuda económica comprometida por Madera, realizaránse llabores de llimpieza na roliada del yacimientu y entamaráse una obra de modernización del aula didáctica del castru, col plantegamientu d’otorga-yos a los visitantes más posibilidaes de participación interactiva na instalación. Los cambios nel yacimientu arqueolóxicu del occidente asturianu financiaránse amás cola fixación d’un preciu d’entrada que permita establecer un serviciu de visites guiaes a lo llargo de tol añu nel castru, datáu nel sieglu I depués de Cristu y del que se conserven viviendes, una acrópolis, una zona de baños y muries. 7 d'avientu, 2004 0 FacebookTwitterPinterestEmail
Comunicación Taibo recibe l’homenaxe de la sociedá mexicana pola so mayestría nel exerciciu del periodismu cultural by asturnet 7 d'avientu, 2004 Reconocencia a una vida consagrada a la escritura, col periodismu cultural como actividá central. El veteranu comunicador xixonés Paclo Ignacio Taibo I, emigráu a América Llatina nos años cincuenta, protagonizó’l pieslle de feria’l llibru de la ciudá mexicana de Guadalajara, que-y tributó un homenaxe pola so trayectoria vital y profesional. Esi reconocimientu, espresáu nel XIII Tributu Nacional de Periodismu Cultural ‘Fernando Benítez’, valió-y d’escenariu a Taibo pa defender l’exerciciu de la profesión periodística como “un compromisu tácitu col otru”, nel trescursu d’un emotivu actu nel que participaron los dos fíos del periodista, los escritores Benito y Paco Ignacio Taibo II, esti segundu director de la Selmana Negra de Xixón. El periodista orixinariu de Xixón, que saltó a América por mor de la so militancia socialista durante’l franquismu cuando trabayaba nel diariu ‘El Comercio’, foi ensalzáu en México como una persona que nun se toma demasiao en serio a sigo mesma pesie a ser autor de decenes de noveles y autor d’una bayurosa llista de testos en prensa escrita. Na viéspora del homenaxe, el so fíu Paco Ignacio Taibo II, tamién invitáu a la feria de Guadalajara en calidá d’autor lliterariu, fizo un llamáu a la mocedá presente nel certame a nun arrenunciar al drechu a la llectura, y alitó a los xóvenes a xunir esi exerciciu tanto col sentimientu de placer como cola necesidá de subversión. 7 d'avientu, 2004 0 FacebookTwitterPinterestEmail
Lliteratura Más de 400 narraciones concurrieron al concursu de la Fundación ‘Muñiz Zapico’, que premió a Aníbal Morixe by asturnet 7 d'avientu, 2004 Un total de 429 narraciones breves, empobinaes por 345 participantes dende España, América Llatina y Europa occidental. La Fundación ‘Juan Muñiz Zapico’ escoyó ente tales cifres al autor Aníbal Ramón Morixe como ganador absolutu del so I Concursu de microrrelatos mineros, y galardonó amás, na categoría d’asturianu, a los concursantes Ricardo Candás y Elisabet Felgueroso. El xuráu del concursu, qu’asoleyó el so veredictu nel Centru Asturianu de Bruseles, reconoció la obra ‘Cuando la jaula vuelve a subir’, de Morixe, como merecedora del primer premiu, dotáu con mil euros, y galardonó los trabayos ‘El lladrón de llapiceros’ y ‘El chigre de Artosa’, redactaos respectivamente por Candás y Felgueroso. Pol so llau, Miguel Matesanz algamó una mención especial del xuráu n’atención al so relatu ‘La hora mala’, mientres que Natalia Fernández recibió l’accésit previstu p’autores menores de 26 años pola so obra ‘Et in Arcadia ego’. Del xuráu, presidíu por Benigno Delmiro Coto, formaron parte Francisco Prado Alberdi, Elías García, Elvira Fernández, Asunción Naves, Juanjo Barral, José García y Benjamín Gutiérrez. El concursu de microrrelatos de la Fundación ‘Juan Muñiz Zapico’ lleva’l nome del cabezaleru mineru antifranquista Manuel Nevado Madrid, desapaecíu en 1990, y ta concebíu pa premiar narraciones breves inferiores a 60 llinies de llargor, escrites en llingües castellana o asturiana. Web de la Fundación Juan Muñiz Zapico 7 d'avientu, 2004 0 FacebookTwitterPinterestEmail
Sociedá L’Ayuntamientu de Xixón alita a los neños a escribi-yos la carta a los Reis Magos n’asturianu by asturnet 7 d'avientu, 2004 Comunicación colos Reis Magos d’Oriente n’asturianu. L’Ayuntamientu de Xixón alita a los neños del conceyu a escribir la so carta de pidíos navidiegos en llingua asturiana, dientro de les actividaes previstes pola Oficina Municipal de la Llingua nel puestu qu’esta entidá rexentará nel salón Mercaplana, un recintu d’ociu pa la infancia y la mocedá qu’abrirá les sos puertes el 22 d’avientu. Nesi espaciu, responsables del serviciu llocal de normalización llingüística pondrán al algame de los neños fiches colos nomes de los xuguetes más comunes na so denominación asturiana y un modelu prestablecíu de carta a los Reis Magos n’asturianu, col envís de qu’eses misives s’introduzan depués nos buzones instalaos na ciudá pa recoyer los pidíos infantiles de navidá. Según precisa la Oficina de la Llingua, cuya presencia en Mercaplana supondrá la primer incursión destacada y regular de la llingua asturiana nel salón xixonés, que nes últimes ediciones atraxo a una media de 80.000 visitantes, la entidá municipal de normalización quier familiarizar a los ciudadanos más mozos nel usu del asturianu ensin torgues nin prexuicios. Amás de poner en circulación les cartes a los Reis n’asturianu, a partir del 22 d’avientu y hasta’l 4 de xineru, responsables de la Oficina Municipal de la Llingua pondrán a disposición de los neños qu’accedan a Mercaplana dos esposiciones interactives en tornu a dos llibros infantiles: ‘La estrella que subiere al cielu’, de Xuan Xosé Sánchez Vicente, y ‘Trasgu’, obra de Reyes Tuero con illustraciones de Berto Álvarez Peña. Asinamesmo, los visitantes podrán tomar parte d’otres iniciatives programaes pola Oficina de la Llingua nel so ‘stand’ del salón infantil y xuvenil, habilitáu nel recintu ferial de Xixón, ente les que destaquen sesiones de cuentacuentos n’asturianu. Archivu. Los neños tendrán por primer vegada accesu destacáu a la llingua asturiana nel salón Mercaplana 7 d'avientu, 2004 0 FacebookTwitterPinterestEmail
Hestoria Bustiello recupera la memoria minera de la cuenca’l ríu Ayer con una esposición de semeyes antigües by asturnet 6 d'avientu, 2004 Alcordances en blancu y negru. El centru d’interpretación del pobláu mineru de Bustiello, na llende de los conceyos de Mieres y Ayer, rescata nes sos parés la memoria de la minería de la comarca al traviés d’una esposición de semeyes d’época que retraten a emplegaos y responsables de la Sociedá Hullera Española, empresa paradigmática del paternalismu industrial y clave na industrialización de la cuenca’l ríu Ayer. Les imáxenes agora a la vista’l públicu nel pobláu de Bustiello, allugáu ente’l calce’l ríu y la nueva carretera d’accesu a Morea dende Santa Cruz de Mieres, son frutu del atropamientu entamáu pola empresa catalana Història Viva, que xestiona’l patrimoniu industrial del pobláu con una concesión municipal y que, por iniciativa propia, decidió señalizar tamién en llingua asturiana toles instalaciones qu’amuesa a los visitantes en Bustiello. Fundáu a finales del sieglu XIX pol segundu marqués de Comillas, l’industrial y ferviente católicu Claudio López Bru, el pobláu mineru de Bustiello foi concebíu p’agospiar a obreros que se consideraben modélicos por amosar una conducta acordies col códigu moral del cristianismu de la época. Por mor d’esi singular orixe, y dotáu con ilesia, escueles y sanatoriu propios, el núcleu mineru convirtióse nun destacáu campu d’ensayu del sistema de relaciones llaborales propuestu poles xerarquíes católiques nel cambiu de sieglos pa evitar l’espoxigue de les ideoloxíes entós llamaes revolucionaries, sobre toes elles el socialismu. Web del centru d’interpretación de Bustiello 6 d'avientu, 2004 0 FacebookTwitterPinterestEmail