Patrimoniu El Conseyu de Patrimoniu aborda la especial protección de tres palacios en Tapia, Pravia y Sariegu by asturnet 13 d'avientu, 2004 Protección especial pa tres edificios destacaos. El Plenu’l Conseyu de Patrimoniu del Principáu aborda güei nuna xuntanza de trabayu la declaración como Bien d’Interés Cultural (BIC) de los palacios de Campos, en Tapia; de Valdés, en Pravia; y de San Román, en Sariegu, nuna reunión na que tamién se discutirá’l remocicamientu de la ilesia de Santa María de Narzana, allugada tamién en Sariegu. D’esti mou, de la xuntanza’l Conseyu de Patrimoniu puen salir nuevos nomes que faigan más bultable la llista d’edificios singulares catalogaos baxo’l másimu nivel de protección que contempla le Llei de Patrimoniu, la declaración de Bien d’Interés Cultural, que limita dafechu futures intervenciones sobro los inmuebles protexíos. L’empiezu de la reunión, que presidirá la conseyera de Cultura, Comunicación Social y Turismu del Principáu, Ana Rosa Migoya, ta previstu pa les 17 hores, y nel alcuentru va abordase, asinamemo, l’espediente pa incluyir nel Inventariu del Patrimoniu Cultural el Palaciu d’Andés, en Navia. Nes sos últimes xuntances, el Plenu’l Conseyu de Patrimoniu elevó a la categoría de Bien d’Interés Cultural el Palaciu’l Marqués de Camposagráu, llevantáu en Mieres nel sieglu XVII y propiedá orixinal de la familia Bernaldo de Quirós; la ilesia de Santa María de Llimanes, en Siero; l’aldega d’Argul, en Pesoz; la torre medieval de Silviella, n’Onís; el Palaciu Valdés Bazán, asitiáu en Candamu dende’l sieglu XVII por iniciativa d’Antonio Valdés Bazán; y el cancel de la ilesia de Santiso de Candamo. 13 d'avientu, 2004 0 FacebookTwitterPinterestEmail
Comunicación Un nuevu sitiu web arriquez el panorama dixital d’actualidá en llingua asturiana by asturnet 13 d'avientu, 2004 Más posibilidaes pa los llectores dixitales asturfalantes. El diariu xixonés ‘El Comercio’ pon en funcionamientu un canal monográficu n’internet con conteníos culturales, diseñáu y manteníu dafechu en llingua asturiana, nel qu’ufre información de lliteratura, música, artes escéniques y cuestiones llingüístiques, emplegando’l sistema de copyleft ufiertáu por Asturnews pa espardir noticies asoleyaes nesti diariu. Asina, el denomináu ‘Canal Asturies’, que fai usu del serviciu llibre d’Asturnews pa reproducir conteníos d’esti diariu cultural cola única condición de que se cite al periódicu on-line como fonte de cada noticia, inclúi información organizada por asuntos, incorpora una galería de semeyes d’Asturies y proporciona la posibilidá de participar n’encuestes vía web. Accesible de forma abierta y de baldre al traviés de la web d’El Comercio, el nuevu espaciu web en llingua asturiana atiende con especial procuru pa les noticies del ámbitu llingüísticu, inclúi testos d’opinión y ufre la posibilidá de descargar un viodeoclip pa neños, amás de conteníos en formatu pdf. Con ciertes intermitencies, el diariu xixonés ‘El Comercio’ dio-y na so hestoria más reciente protagonismu a la llingua asturiana n’espacios como’l veteranu suplementu cultural ‘Alitar Asturies’ -creáu en 1978- y, a mediaos de los años noventa, en secciones comunes del periódicu, nuna práctica qu’agora quier recuperar el diariu y qu’hai unos meses emplega’l periódicu ‘La Voz de Asturias’, qu’inclúi informaciones en llingua asturiana na so sección de Cultura y Espectáculos. Al frente de ‘El Comercio’ ta, dende mayu pasáu, Íñigo Noriega, que na so calidá de director vien amosando una especial sensibilidá pola presencia de la llingua y cultura asturianes nes páxines del periódicu y auspicia la voluntá de modernizar y fortalecer la sección ‘Alitar Asturies’. Accesu al canal monográficu n’asturianu 13 d'avientu, 2004 0 FacebookTwitterPinterestEmail
Música Tarañu, Skanda, Chus Pedro y Vicente Díaz opten al galardón al meyor cantar nos Premios de la Música by asturnet 13 d'avientu, 2004 Tarañu, Skanda, Chus Pedro Suárez, Vicente Díaz, Deua Dubra y La Tarrancha. Esos son los seis candidatos preliminares de los que saldrán los finalistes del galardón al meyor cantar en llingua asturiana nos IX Premios de la Música, qu’entama l’Academia de la Música y que van entregase en Madrid na primavera prósima. La llista definitiva d’aspirantes ellaboraráse a partir del miércoles. Trátase del segundu añu nel que l’asturianu entra a concursu con categoría propia, y nesta ocasión los designaos en primer instancia como candidatos al meyor cantar n’asturianu publicáu a lo llargo de 2004 son seis temes de mui estremaes calterístiques y estilos: Chus Pedro Suárez concurre con ‘Agora sal a bailar’, un tema d’orixe tradicional con igües del propiu Chus Pedro y de Gabino Antuña. El folk ta presente con ‘Lin’, cantar escritu por Lilian Fernández ya interpretáu por Deua Dubra, mientres que los soníos más contundentes tán representaos por tres bandes moces: Tarañu, Skanda y La Tarrancha. Los primeros concursen col tema ‘Nun nos dexen’, de José Luis Díaz; Skanda presenta ‘Sangre d’ochobre’, d’autoría collectiva; y la banda La Tarrancha entra nel llistáu preliminar d’aspirantes al meyor cantar n’asturianu con ‘Presente indicativu del verbu nun trabayar’. Completa la llista el polémicu vencedor del premiu na so edición del añu pasáu, el compositor Pepín Robles, qu’entra a concursu col tema ‘La Pola de Siero’, interpretáu por Vicente Díaz. En 2003, Robles fízose col galardón a la meyor canción en llingua asturiana por ‘Nunca Máis’, un tema cantáu por Manolo Morán y dafechu cuestionáu como representativu de la música fecha n’asturianu a lo llargo del añu pasáu. El propiu Víctor Manuel San José afirmó n’Asturnews, en xunetu pasáu, que barruntaba que quienes votaron esi tema como meyor cantar nin siquiera lu conocíen. Pol so llau, el vocalista’l grupu Dixebra, Xune Elipe, aseguró hai agora diez díes que “nun nos puen volver a meter el gol del añu pasáu”, n’alusión al controvertíu galardón. Archivu. Pepín Robles y Manolo Morán ganen el premiu al meyor cantar n’asturianu por ‘Nunca máis’ 13 d'avientu, 2004 0 FacebookTwitterPinterestEmail
Sociedá L’asturianu pierde un nuevu tren n’Europa al tar ausente nel memorándum qu’entrega Moratinos by asturnet 13 d'avientu, 2004 Otru tren pasa de llargu. La llingua asturiana auséntase güei una migaya más d’Europa al nun figurar nel memorándum que’l Ministru d’Asuntos Esteriores, Miguel Ángel Moratinos, entrega a les autoridaes comunitaries pa solicitar formalmente la plena validez del euskera, el catalán y el gallegu como idiomes de trabayu nel ámbitu de la UE. La razón d’esa ausencia nun ye nueva: Los responsables d’Esteriores argumenten que l’asturianu nun ye llingua oficial nel so territoriu y, poro, nun ye procedente incluyilu nel llistáu que güei reciben les autoridaes del Conseyu d’Esteriores de la UE. Asina, la falta d’estatus oficial de la llingua asturiana frena otra vuelta les posibilidaes d’espoxigue d’esti idioma n’Europa y failu una migaya menos visible, en contra de les recomendaciones del comité internacional d’espertos que visitó’l Principáu nos primeros díes d’avientu. Nel informe presentáu por esti grupu, amás de reclamar la coficialidá nel plazu más breve posible, encamentábase afitar la enseñanza d’asturianu na Secundaria, recuperar la toponimia tradicional, financiar la producción cultural en llingua asturiana y otorga-y una presencia “altamente significativa” a esti idioma na futura radiotelevisión autonómica. Recomendaciones a les que la conseyera de Cultura, Ana Rosa Migoya, replicó que la coficialidá nun ta prevista nel pactu de Gobiernu y, poro, nun esistirá a lo menos antes del fin d’esta llexislatura autonómica, en 2007. Nuna carta empobinada en setiembre pasáu al conseyeru de Xusticia, Seguridá Pública y Relaciones Esteriores del Principáu, Francisco García Valledor, el secretariu d’Estáu pa la Unión Europea, Alberto Navarro, afitaba’l deséu del Ministeriu d’Asuntos Esteriores de que l’asturianu seya oxetu d’una atención “especial” na UE pero negaba la posibilidá de consideralu como llingua oficial n’Europa. Archivu. Especialistes europeos reclamen n’Uviéu mayor “visibilidá” pa la llingua asturiana 13 d'avientu, 2004 0 FacebookTwitterPinterestEmail
Tecnoloxía Los dominios españoles d’Internet amenorguen el so preciu un 71 por cientu by asturnet 11 d'avientu, 2004 Los dominios de Internet ‘.es’ van costar darréu namái que 27,59 euros, un 71 por cientu menos que los 94,83 euros dagora, sigún figura nel proyeutu dorde que desendolca la regulación de les tases de direcciones españoles dInternet, y questa selmana recibiól preste del Conseyu Asesor de les Telecomunicaciones y de la Sociedá de la Información (CATSI), muérganu asesor del Gobiernu. Sigún la documentación quespardió esti día Europa Press, el borrador de la orde ministerial desanicia dafechu les especificaciones pa persones físiques y los nomes de dominios y afita una tasa daniciu de 27,59 euros pa los dominios de segundu nivel ‘.es’, mentantu que la renovación anual tamién va costar 27,59 euros, un 68% menos que los 86,21 euros previstos na normativa actual, que vien de 2003. Asina va cumplisel compromisu de que dio anuncial ministru dIndustria, Turismu y Comerciu, José Montilla, que faló hai poco duna rebaxa sustancial del preciu de los dominios dInternet, “alrodiu del 80 por cientu de media”, pa sofitar y facer alitar la Sociedá de la Información, flesibilizando les normes pa que sasemeyen a les de los dominios xenéricos de Internet, como los ‘.com’. No que cinca a los dominios de tercer nivel, el rexistru y la renovación de los indicativos ‘edu.es’ y ‘gob.es’ van costar 30,17 euros, en llugar de los 51,72 y 46,55 euros que costaben respeutivamente hasta agora. El preciu’l restu de dominios de tercer nivel va ser de 11,64 euros (enantes 21,55 euros), talamente como la renovación añal, que tenía un coste hasta agora de 46,55 euros. 11 d'avientu, 2004 0 FacebookTwitterPinterestEmail
Patrimoniu Les obres del parque de la Prehestoria arranquen en Teberga pa crear un espaciu inéditu sobro’l Paleolíticu by asturnet 10 d'avientu, 2004 Una ‘casa’ inédita del home de les cavernes. El presidente’l Principáu, Vicente Álvarez Areces, asitió güei la primer piedra del Parque de la Prehestoria de Teberga, qu’emplegará 10 millones d’euros en construyir un complexu que recreará la vida y los hábitos del Paleolíticu al traviés de répliques d’arte rupestre européu. Una cueva artificial y un área de servicios centrarán les instalaciones. El proyectu, sufragáu con fondos del Plan Complementariu de Reactivación de les Comarques Mineres, cuayará nun gran espaciu habilitáu pa les visites na primavera de 2006, si se cumplen les previsiones espresaes pol presidente autonómicu, y quier atrayer más turistes a la comarca, pero tamién da-y un emburrión a la economía’l valle del Trubia, del que Teberga forma parte. Les instalaciones llevantaránse acordies con un proyectu ellaboráu pol arquitectu Daniel Freixes sobre un espaciu de 25 hectaries, y persigue alterar lo menos posible l’entornu natural nel que s’asitiará el nuevu complexu. Pa ello, los visitantes accederán a les instalaciones al traviés d’una rede de caleyes, pesie a que l’aparcamientu previstu tendrá una capacidá pa más d’un cientu de coches y autocares y, poro, sedrá visible. Les répliques que s’amosarán al públicu nel parque teberganu obedecen a una esbilla d’un equipu científicu encabezáu pol caderalgu de Prehestoria na Universidá d’Uviéu Javier Fortea, responsable de les escavaciones nel yacimientu’l Sidrón, y pondrán al algame de los visitantes reproducciones de pieces emblemátiques d’una decena de yacimientos prehestóricos de la Península Ibérica y Francia. 10 d'avientu, 2004 0 FacebookTwitterPinterestEmail
Lliteratura El novelista Fulgencio Argüelles asoleya un conxuntu de relatos illustraos, cola soledá como exe central by asturnet 10 d'avientu, 2004 Formatu de luxu pa una incursión navidiega del novelista Fulgencio Argüelles na narración n’asturianu. L’Academia de la Llingua asoleya una edición de mil exemplares en gran formatu y papel satinao a collor de la obra ‘Seronda’, un conxuntu de tres relatos illustraos pol debuxante xixonés Jorge Enrique Maojo qu’ayeri se presentó formalmente en Xixón cola soledá como exe conductor de les narraciones qu’integren el llibru. La obra d’Argüelles, ganador como autor en castellán de los prestixosos premios de novela ‘Azorín’ y ‘Café Gijón’, sal a la cai a un preciu de venta de 24 euros y fuera de colección dala de l’Academia poles sos singulares característiques, yá que trátase d’una edición d’alta calidá que la entidá asoleya a propuesta’l propiu Argüelles pa espardir y dignificar l’usu de la llingua asturiana como idioma de creación y llectura. A lo llargo de tres relatos -‘La seronda de les cases invisibles’, ‘El sele marmullar d’un vigulín’ ya ‘Inxamás nun fai sol’-, Fulgencio Argüelles constrúi un mundu particular pobláu por personaxes siempres vulnerables pola soledá, espuestos a escenarios que bancien ente lo real y lo imaxinario. Afincáu na llocalidá de Cenera depués de pasar dellos años en Madrid, onde cursó estudios de sicoloxía, Fulgencio Argüelles algamó nel añu 2000 el premiu ‘Principado de Asturias’ cola novela ‘Recuerdos de algún vivir’, y recibió estremaes distinciones polos sos relatos en llingua asturiana en certames lliterarios de L.lena, Cabrales y Sograndiu. 10 d'avientu, 2004 0 FacebookTwitterPinterestEmail
Lliteratura Los grandes premios de la creación lliteraria n’asturianu rexistren un aumentu de participación by asturnet 10 d'avientu, 2004 Más participación qu’en 2003. Los tres premios que l’Alministración autonómica concede con calter añal a les meyores obres de creación en llingua asturiana -nes modalidaes de narrativa, poesía y periodismu- atraxeron nesta edición a más aspirantes. Los nomes de los ganadores proclamaránse de forma oficial, según les previsiones de los xuraos, la prósima selmana. Asina lo precisaron fontes prósimes a los encargaos de designar a los premiaos en ca una de les tres categoríes a concursu: la novela, al traviés del XXV Premiu ‘Xosefa Xovellanos’; la poesía, cola X edición del galardón ‘Xuan María Acebal’; y el periodismu, nes sos modalidaes de prensa escrita y audiovisual, na segunda convocatoria del premiu ‘Enriqueta González Rubín’. Tolos galardones tienen una dotación económica de 6.000 euros -que nel casu de la categoría periodística repártense en dos premios de 3.000 euros ca ún- y tán consideraos ente los más prestixosos a los qu’opten los creadores qu’empleguen la llingua asturiana como idioma vehicular de les sos obres. Los miembros de los xuraos yá cellebraron les sos xuntances correspondientes, dientro’l plazu de 45 díes que marca la convocatoria dende’l pieslle de la recepción d’orixinales, y prevén asoleyar les sos respectives actes con calter oficial el prósimu xueves, nel trescursu d’una comparecencia pública n’Uviéu. Na pasada edición, la entrega de los premios del Principáu quedó desdibuxada pola decisión de los xuraos de declarar ermos los dos galardones más veteranos, los de novela y poesía. Na categoría de testos periodísticos, la vencedora foi Beatriz Redondo Viado. 10 d'avientu, 2004 0 FacebookTwitterPinterestEmail
Escéniques Cuatrocientos votos designen a los meyores del teatru ente dos decenes de candidatos by asturnet 10 d'avientu, 2004 Cuatrocientos votos pa designar a los meyores. Dos decenes d’autores, compañíes, directores ya intérpretes opten, en calidá de finalistes, a algamar dalgún de los Premios de les Artes Escéniques, que s’entregarán en La Felguera el 17 d’avientu colos grupos Margen, Higiénico Papel y Barataria como aspirantes al galardón al meyor montaxe escénicu polos espectáculos ‘Anfitrión’, ‘Con P de piano’ y ‘Hasta que la boda nos separe’, respectivamente. Un censu duplicáu en númberu d’integrantes respecto al del añu pasáu decidirá, poro, quiénes obtendrán los premios nes sos ocho categoríes, ente les que destaquen les de meyor dirección -a la qu’opten Arturo Castro, Jorge Moreno, Laura Iglesia y Roberto Corte- y meyor autor, na que son finalistes Estrella García, Fernando Hurtado, Jorge Moreno y Laura Iglesia. No que cinca a la interpretación, la modalidá de meyor actor premiará a Alberto Rodríguez, Félix Corcuera o Jorge Moreno, mientres que’l premiu a meyor intérprete femenina dirá parar a Ángeles Arenas, Cristina Cillero o Eva Vallines. Cuatro son tamién los finalistes qu’opten al premiu al meyor profesional vinculáu al teatru asturianu: Aurelio Martínez, José Miguel Díaz y Nuria Blanco. La quinta gala de los Premios de les Artes Escéniques, auspiciada pola Sociedá Xeneral d’Autores y Editores, cellebraráse nel nuevu teatru de La Felguera y entregará un galardón honoríficu a un profesional destacáu cuyu nome inda nun foi reveláu. La convocatoria de los premios, en setiembre pasáu, valió pa que representantes de los actores y la patronal de les artes escéniques reclamaren más recursos y sales de xestión mista pa evitar la “desapaición” del teatru profesional asturianu, a lo que’l director xeneral de Promoción Cultura, Carlos Madera, retrucó ensalzando la “grandísima” inversión del Principáu nesa estaya y asegurando que la ufierta escénica privada “ye cero”. Actores y empresarios piden más recursos y espacios pa evitar la “desapaición” del teatru profesional 10 d'avientu, 2004 0 FacebookTwitterPinterestEmail
Sociedá Siero echa a andar el so serviciu de promoción llingüística y proyecta un plan propiu de normalización by asturnet 10 d'avientu, 2004 Siero pieslla l’añu con un apueste llingüísticu. El conceyu allugáu nel centru’l Principáu presentó güei el so serviciu llocal de normalización del asturianu, en funcionamientu dende’l xueves, y proyecta yá un plan propiu pa pormenorizar la recuperación y dignificación del idioma. El Gobiernu autonómicu ufre “subvenciones ventaxoses” pa los conceyos que pongan en marcha en 2005 programes añales de normalización llingüística. El departamentu de Siero, que pretende facilita-yos a los ciudadanos l’usu del asturianu a tolos niveles dende una oficina allugada nel Palaciu’l Marqués, nel centru urbanu de La Pola, fai el númberu seis na llista de servicios llocales de normalización yá en funcionamientu, xunta los más veteranos de Xixón, Llangréu y L.lena, y los recientes de les Mancomunidaes del Cabu Peñes y la Comarca de la Sidra. Una cifra que’l Principáu espera elevar a doce conceyos en 2005, según precisó esta mañana el director de la Oficina de Política Llingüística, Ramón D’Andrés. Pa ello, esi organismu del Gobiernu autonómicu ufrirá en 2005 “subvenciones ventaxoses” p’aquellos ayuntamientos qu’executen planes añales de normalización del asturianu, siempre qu’esos planes se traduzan nuna clara “visibilidá de la llingua asturiana na vida pública llocal”. El nuevu serviciu de Siero, que ta sufragáu en comuña pol Principáu y l’Ayuntamientu, tendrá un horariu sólo mañaniegu de forma provisional hasta la so ampliación a xornada completa en xineru, y ta coordináu por Xosé Firmu García, quien asegura que la oficina llingüística llocal pretende “facer del usu l’asturianu una cosa normal”. Ayudar, informar, responder, facilitar tornes y asesorar sobro subvenciones son los fines declaraos del serviciu de normalización de Siero, en boca’l so responsable, qu’accedió al puestu depués d’un procesu selectivu entamáu pol Ayuntamientu. Na presentación pública de la nueva oficina participó amás la conceyala d’Educación y Cultura, María Luz Quince. 10 d'avientu, 2004 0 FacebookTwitterPinterestEmail