Cultura prevé convenios col Estáu pa promocionar la lliteratura asturiana fuera’l Principáu

Proyección de la lliteratura asturiana fuera del Principáu. La Conseyería de Cultura plantega la firma d’alcuerdos col Estáu pa promocionar les lletres asturianes nel esterior, depués que los escritores denunciaren falta d’atención hacia la figura del autor nel engranaxe editorial y demandaren, ente otres midíes, la presencia del asturianu nos Premios Nacionales de Lliteratura.

Asina respondió esti mediudía n’Uviéu a les reivindicaciones de los autores el director de la Oficina de Política Llingüística, Ramón D’Andrés, quien anunció inminentes midíes concretes pa promocionar la lliteratura en llingua asturiana darréu entre en vigor, nes prósimes selmanes, el Plan de Normalización Sociollingüística. Trátase, según D’Andrés, d’apoyar dende l’Alministración a una lliteratura “con prespectives enormes y una mui bona tarxeta de presentación”.

Una representación de los creadores d’esi collectivu asoleyó güei les conclusiones de la Xunta d’Escritores cellebrada a finales de payares en Llanes, ente les que destaquen precisamente un llamáu a la promoción esterior de los llibros publicaos n’asturianu, la demanda de coficialidá pa la llingua asturiana y, de mou singular, la esixencia de mayor procuru pa colos autores.

Nesti sen, el cordinador de la Xunta d’Escritores, Xuan Bello, aseguró que la promoción de la lliteratura debe ser “integral” y beneficiar a tolos axentes de la ‘cadena’ lliteraria: autores, editores, distribuyidores y llibreros. Lo contrario, sorrayó, provoca “ocultación” nel mercáu editorial.

Asinamesmo, Bello refugó la posibilidá de que s’afite una periodicidá concreta pa cellebrar nueves xuntes d’escritores y argumentó que futures xuntances habrán convocase acordies coles peticiones de los propios autores, en momentos que se consideren afayadizos y continuando con una organización “un tanto anárquica”.

Nel so manifiestu final, los 50 escritores aconceyaos en Llanes hai agora once díes felicítense con “meditáu optimismu” de la variedá de voces y d’obres de la lliteratura en llingua asturiana, ufren el so llabor pa edificar en comuña una “casa afayadiza y democrática” y reclamen una mayor presencia de les sos obres na rede de biblioteques y nel sistema educativu.

Archivu. La Xunta d’Escritores pieslla reclamando más atención pa la lliteratura n’asturianu nes biblioteques