L’Ayuntamientu de Xixón alita a los neños a escribi-yos la carta a los Reis Magos n’asturianu

Comunicación colos Reis Magos d’Oriente n’asturianu. L’Ayuntamientu de Xixón alita a los neños del conceyu a escribir la so carta de pidíos navidiegos en llingua asturiana, dientro de les actividaes previstes pola Oficina Municipal de la Llingua nel puestu qu’esta entidá rexentará nel salón Mercaplana, un recintu d’ociu pa la infancia y la mocedá qu’abrirá les sos puertes el 22 d’avientu.

Nesi espaciu, responsables del serviciu llocal de normalización llingüística pondrán al algame de los neños fiches colos nomes de los xuguetes más comunes na so denominación asturiana y un modelu prestablecíu de carta a los Reis Magos n’asturianu, col envís de qu’eses misives s’introduzan depués nos buzones instalaos na ciudá pa recoyer los pidíos infantiles de navidá.

Según precisa la Oficina de la Llingua, cuya presencia en Mercaplana supondrá la primer incursión destacada y regular de la llingua asturiana nel salón xixonés, que nes últimes ediciones atraxo a una media de 80.000 visitantes, la entidá municipal de normalización quier familiarizar a los ciudadanos más mozos nel usu del asturianu ensin torgues nin prexuicios.

Amás de poner en circulación les cartes a los Reis n’asturianu, a partir del 22 d’avientu y hasta’l 4 de xineru, responsables de la Oficina Municipal de la Llingua pondrán a disposición de los neños qu’accedan a Mercaplana dos esposiciones interactives en tornu a dos llibros infantiles: ‘La estrella que subiere al cielu’, de Xuan Xosé Sánchez Vicente, y ‘Trasgu’, obra de Reyes Tuero con illustraciones de Berto Álvarez Peña.

Asinamesmo, los visitantes podrán tomar parte d’otres iniciatives programaes pola Oficina de la Llingua nel so ‘stand’ del salón infantil y xuvenil, habilitáu nel recintu ferial de Xixón, ente les que destaquen sesiones de cuentacuentos n’asturianu.

Archivu. Los neños tendrán por primer vegada accesu destacáu a la llingua asturiana nel salón Mercaplana