Comunicación Doce investigadores tracen la primer hestoria del periodismu asturianu by asturnet 2 de xunu, 2004 La prensa asturiana yá tien hestoria. Un llibru ellaboráu por doce investigadores de la Universidá d’Uviéu y editáu en comuña cola Asociación de la Prensa, debuxa la evolución del periodismu asturianu dende la so apaición como tal, a primeros del sieglu XIX, hasta la Primer Guerra Mundial. Dambes entidaes preparen yá un segundu volume que-y dará continuidá cronolóxica a la investigación yá asoleyada. La prensa d’Asturies nun contaba con un estudiu monográficu estensu qu’analizare la so hestoria, sacante dalgunes incursiones puntuales y una aprosimación asoleyada en 1976 por Manuel Fernández Avello cola casa editorial Ayalga, polo que’l profesor de la Universidá d’Uviéu Jorge Uría, cordinador de la nueva obra, sorrayó la importancia de la investigación acabante espublizar pol so calter pioneru. Daqué con especial importancia nun llugar -Asturies- que nun cuenta con estudios superiores de Periodismu nin tampocu con un colexu profesional del gremiu, pero que dende hai dos sieglos amuesa una destacada vitalidá nos procesos de comunicación periodística. Exemplu d’ello foi’l diariu ‘El Noroeste’, vinculáu al director Antonio Oliveros, qu’al rodiu de 1914 tiraba unos 10.000 exemplares diarios. ‘Historia de la prensa en Asturias. Nace el cuarto poder’ respuende a la investigación d’una docena d’espertos n’estremaos archivos y hemeroteques, a la gueta d’un análisis de la vinculación ente los hechos hestóricos de cada dómina y el so reflexu nel papel de les páxines de los periódicos del momentu. 2 de xunu, 2004 0 FacebookTwitterPinterestEmail
Plástiques El Ministeriu de Cultura frustra la compra d’un ‘Velázquez’ qu’esperaba el Bellas Artes d’Uviéu by asturnet 2 de xunu, 2004 Les xestiones del director del Muséu de Bellas Artes d’Asturies, Emilio Vázquez Vallaure, p’arriquecer la colección del centru con un cuadru rematáu por Diego Velázquez en 1651 nun llograron aportar a bon puertu. El Ministeriu de Cultura refuga la compra de la obra ‘Retrato de una joven campesina’, cuyu preciu diba sufragar dafechu la constructora ACS pa llueu ceder el lienzu al Estáu, que previsiblemente lu treslladaría a Asturies. Según publica na so edición de güei el diariu La Nueva España, de nada valió la predisposición de la empresa propiedá de Florentino Pérez a pagar los 15 millones d’euros en que ta tasáu el cuadru, yá que la Xunta de Calificación y Esportación d’obres d’arte del Ministeriu de Cultura dio-y carpetazu a la operación el pasáu martes al amosar dalgún de los espertos consultaos duldes sobro l’autoría del cuadru. Pesie a que la obra interesaba al Muséu del Prado, la más prestixosa pinacoteca pública d’España, el ‘Retrato de una joven campesina’ tenía grandes posibilidaes de pasar a arriquecer la colección del Bellas Artes d’Asturies, allugáu n’Uviéu, que vía n’alquisición de la obra de Velázquez una decisiva oportunidá p’axuntar un nuevu lienzu ‘de pesu’ a los sos fondos. El cuadru qu’agora refuga mercar l’Estáu español, renunciando a la operación que dende l’empiezu xestionara Marcos Vallaure, foi pintáu pol artista sevillanu ente 1649 y 1651, y conozse tamién col nomatu de ‘La gallega’. 2 de xunu, 2004 0 FacebookTwitterPinterestEmail
Música Felpeyu ‘cuélase’ nel festival polacu de Dowspuda xunta grupos bálticos y bretones by asturnet 2 de xunu, 2004 El folk asturianu tendrá representación en Polonia a primeros de xunetu. El grupu Felpeyu participará nel VII Festival de Cultura Celta de Dowspuda como única banda procedente del tramu del arcu atlánticu al sur de Bretaña, dientro d’un programa que va desarrollase a lo llargo de tres xornaes y qu’inclúi les actuaciones d’otres trece formaciones musicales polaques, estones, lituanes y bretones. La intervención de Felpeyu nel festival ta fixada pal sábadu 3 de xunetu, nun escenariu compartíu colos grupos polacos Elphin y The Reelium, los lituanos Kulgrinda y los bretones Hudel. El conciertu nel Festival de Dowspuda abrirá-y a la banda folk asturiana una serie de tres recitales en territoriu polacu, que va completase con un conciertu nel Ethnosfera Festival de Skierniewice el domingu 4 de xunetu y una tercer actuación en Varsovia al día siguiente, llunes 5. La incursión polaca ye la única salida al estranxeru que Felpeyu tien prevista pa esta temporada de veranu, na que’l grupu mantién confirmaos conciertos en Llugones (23 de xunu), Castiello Bernueces (27 de xunu), Les Arriondes, Baíña, Cantabria y nes fiestes uvieínes de San Matéu. Felpeyu formóse nel añu 1991 en Salamanca, onde Ígor Medio (bouzouki) y Ruma Barbero (percusión) cursaben estudios de Belles Artes. N’años sucesivos incorporáronse al grupu Xuan Nel Expósito (curdión), Elías García (vigulín), Fernando Oyágüez (vigulín), Diego Pangua (gaita), Lisardo Prieto (vigulín) y Carlos Redondo (guitarra). Web oficial de Felpeyu 2 de xunu, 2004 0 FacebookTwitterPinterestEmail
Educación L’ampliación del campus de Mieres arranca cola espropiación de suelu en Barreos by asturnet 2 de xunu, 2004 L’ampliación del campus universitariu de Mieres da’l so primer gran pasu burocráticu. El Conseyu de Gobiernu’l Principáu d’Asturies aprobó, na so xuntanza de güei, autorizar un gastu de 3,6 millones d’euros colos que se-y pagará al Ayuntamientu la espropiación forzosa de terrenos nel recintu ferial municipal, nos que va edificase l’ampliación del campus. El desembolsu del Executivu autonómicu, qu’afecta a bienes inmuebles incluyíos na Reserva Rexonal de Suelu nel Pozu Barreos, abrirá-y la puerta a la configuración d’un campus en sentíu estrictu, a partir del actual Edificiu Científicu Tecnolóxicu, colos güeyos puestos, según el Gobiernu asturianu, nel desendolcu y consolidación del potencial universitariu de Mieres. La operación respuende a un alcuerdu previu ente’l Principáu y l’Ayuntamientu, y ensértase nel Plan de restructuración de la Minería’l Carbón col envís de da-y puxu a actividaes alternatives a esa industria nes cuenques mineres asturianes. 2 de xunu, 2004 0 FacebookTwitterPinterestEmail
Cine Tejedor pondrá-y música a un curtiumetraxe ganador del Festival de Cine de Xixón by asturnet 1 de xunu, 2004 Tejedor fai una incursión nes bandes sonores. Composiciones del grupu avilesín de folk pondrán-y el soporte musical al curtiumetraxe ‘El pozu’, premiáu na última edición del Festival Internacional de Cine de Xixón y qu’agora empieza a rodar el so director, Tomás Fernández, con un repartu encabezáu pol dramaturgu y actor mierense Maxi Rodríguez. Según anunció’l director del Festival de Cine, José Luis Cienfuegos, el director del curtiumetraxe y el grupu folk tán trabayando yá na banda sonora del curtiu, cuyu ‘casting’ ta acabante pesllar pa empezar darréu el rodaxe y poder cumplir colos plazos requeríos, que fixen l’estrenu de la obra pal prósimu mes de payares, dientro la programación del 42 Festival Internacional de Cine de Xixón. ‘El pozu’ algamó na última edición del eventu cinematográficu xixonés el segundu premiu’l certame Nuevos Realizadores del Principáu, que galardona proyectos n’asturianu o castellán d’una duración non superior a 25 minutos. El primer premiu correspondió-y al guión ‘Nenyure’, presentáu por Jorge Rivero, que yá s’alcuentra en fase de montaxe. La Conseyería de Cultura, Comunicación Social y Turismu, en collaboración col Festival de Cine de Xixón, Caxastur y Canal Plus, acaba d’abrir el plazu pa que los autores interesaos puean concurrir al Premiu Nuevos Realizadores 2004, empobináu a cineastes menores de 35 años y dotáu con dos premios en metálicu de 12.000 y 6.000 euros pa la fechura’l proyectu. Los organizadores almiten trabayos hasta’l prósimu 29 d’ochobre. 1 de xunu, 2004 0 FacebookTwitterPinterestEmail
Educación La Universidá amplía en 15 asignatures la so ufierta de materies per internet by asturnet 1 de xunu, 2004 La Universidá d’Uviéu refuerza la so apuesta por internet como alternativa a les clases presenciales. La institución académica asturiana impartirá el prósimu cursu 15 asignatures más al traviés de la rede, nuna iniciativa en comuña con otres ocho universidaes españoles qu’inclúi amás la ufierta d’un cursu d’especialización en tecnoloxíes de la información y les comunicaciones. Cola ampliación del catálogu de materies ‘on line’, qu’esti cursu tá en 41, la Universidá asturiana pasará a ufrir a partir de la seronda prósima un total de 56 asignatures per internet que tamién podrán cursase nes otro ocho instituciones académiques qu’integren el denomináu Grupu 9 d’Universidaes públiques, les de Navarra, La Rioja, Estremadura, País Vascu, Zaragoza, Baleares, Cantabria y Castiella-La Mancha. La otra cara de l’apuesta poles nueves tecnoloxíes na actividá docente, la del estudiu específicu de la innovación tecnolóxica, promocionaránlu eses universidaes con un máster sobro entornos virtuales de comunicación que los responsables universitarios quieren echar a andar a primeros del añu prósimu y que tendrá una parte común a tolos centros y otra específica pa los estudiantes de cada Universidá. Representantes del Grupu 9 d’Universidaes españoles, ente elles la d’Uviéu, analicen en Logroño la viabilidá de los sos proyectos comunes, n’especial el campus virtual compartíu -ufierta per internet d’asignatures comunes pa los alumnos de les nueve universidaes-, esperiencia única nel sistema universitariu español. 1 de xunu, 2004 0 FacebookTwitterPinterestEmail
Sociedá La Mesa pola Normalización acusa al Principáu de querer “diluir” el gallegu n’Asturies by asturnet 1 de xunu, 2004 “Una falacia que busca diluir la personalidá del gallegu n’Asturies”. Asina entiende la Mesa pola Normalización Llingüística de la llingua gallega l’actitú del Gobiernu’l Principáu na franxa comprendida ente los ríos Navia y Eo, na llende con Galicia. Representantes d’esi organismu acusaron n’Uviéu al Executivu asturianu de buscar de mou consciente el “confusionismu” llingüísticu nos conceyos del occidente’l Princìpáu Xosé Manuel Sarille, directivu de la Mesa pola Normalización, y Xosé Manuel Sánchez Rei, profesor de la Universidá d’A Coruña, defendieron tales argumentos nuna xuntanza que mantuvieron na capital asturiana con miembros del Comité de la Carta Europea de les Llingües Minoritaries, qu’atroparon datos sobro la situación real del asturianu, ente otros idiomes en peligru pola primacía d’otra llingua nel so propiu territoriu. Según un comunicáu públicu asoleyáu pola Mesa, los dos unviaos a Uviéu pola entidá independiente de defensa’l gallegu centraron parte de la so esposición énte los espertos europeos n’acusar al Gobiernu asturianu de persiguir una “consciente mistificación y confusionismu” pa considerar como una variedá llingüística de transición lo que al so xuiciu nun ye otra cosa que “galego exterior”. Tala concepción amuesa, n’opinión de la Mesa pola Normalización, que los responsables de la política llingüística asturiana incurren nuna “falacia que busca diluir la personalidá’l gallegu n’Asturies”. La definición científica de la llingua falada na franxa Navia-Eo enfrenta hai décades a especialistes gallegos y asturianos: Los primeros sostienen que lo que se fala nel occidente’l Principáu ye estrictamente gallegu, mientres que L’Academia de la Llingua vien defendiendo la esistencia d’una variedá de transición ente unu y otru idioma, el gallegu-asturianu. Dende la llegada de Ramón d’Andrés al frente de la Oficina de Política Llingüística del Principáu, en xineru pasáu, la Conseyería de Cultura da-y una especial atención al gallegu-asturianu, que s’imparte como asignatura Comunicáu de la Mesa na so páxina web 1 de xunu, 2004 0 FacebookTwitterPinterestEmail
Patrimoniu L’Arena denuncia qu’una trama urbanística quier valtiar la última de les sos hestóriques conserveres by asturnet 1 de xunu, 2004 Ye’l caberu y pue desapaecer. L’edificiu de la firma ‘Conservas Lis’, últimu esponente en pie de la hestórica industria conservera de San Xuan de L’Arena, cuerre peligru por intereses urbanísticos, según denuncia un collectivu vecinal que s’opón al posible valtiamientu del inmueble, edificáu a primeros del sieglu XX con una fachada qu’inclúi elementos propios de l’arquitectura modernista. Según vien denunciando l’asociación de vecinos Ríu Nalón, col sofitu de grupos con representación nel Ayuntamientu de Muros como l’independiente Cambiu Sieglu XXI, la especulación urbanística pue arramplar darréu cola cabera conservera que queda en pie en L’Arena si les autoridaes polítiques nun amuesen un determín claru a favor del caltenimientu del hestóricu inmueble. L’edificiu de ‘Conservas Lis’ abrióse en principiu como hotel y casinu, y depués pasó a funcionar como cine baxo los nomes sucesivos de ‘Vemfac’ y ‘Taylor’. Na dómina de la posguerra utilizóse como ilesia hasta que se reconstruyó’l templu parroquial, y na década de los cuarenta foi alquiríu a la fin pol empresariu conserveru Manuel Iglesias de la Torre, que mantuvo nél una fábrica de conserves y salazones de pescáu hasta los setenta. La publicación llocal ‘La Ilustración Asturiana’, editada por un grupu de vecinos de Muros, dedíca-y nel so númberu correpondiente a la primavera un ampliu reportaxe a la hestoria de la industria conservera de L’Arena, clave na economía de la zona a lo llargo’l sieglu XX. 1 de xunu, 2004 0 FacebookTwitterPinterestEmail
Comunicación El Gobiernu descarta agora que la tv autonómica empiece emitir con regularidá dientro d’esti añu by asturnet 31 de mayu, 2004 Al cocer, mengua. Los plazos trazaos nos últimos meses pol Gobiernu autonómicu dende’l so departamentu de Comunicación, dirixíu por Jorge Fernández León, pa echar a andar la futura radiotelevisión pública asturiana dilátense y fixen agora meres emisiones de señal en pruebes pa los últimos meses de 2004, hasta que’l nuevu ente ufra una programación regular non antes de mediaos de 2005. La Xunta Xeneral del Principáu yá nun nomará al conseyu d’alministración de la tv hasta’l prósimu periodu de sesiones, depués del veranu. Pesie a les facilidaes que ta poniendo de la so parte el nuevu Gobiernu central, llideráu pol socialista José Luis Rodríguez Zapatero -desistimientu del recursu d’inconstitucionalidá que presentara l’anterior Executivu del PP, cesión al Principáu de la tercer canal de televisión pública-, el llargu partu de la radiotelevisión autonómica asturiana postérgase otra vuelta más y afita 2005 como l’añu nel que previsiblemente empezará emitir con regularidá el nuevu ente. Antes d’ello, inda queden munchos pasos, que según Fernández León resúmense na aprobación del conseyu de la tv pola Xunta Xeneral, a partir del regresu a l’actividá parlamentaria na seronda prósima, na primer emisión d’una señal pa identificar la canal por eses mesmes feches y na posterior constitución del equipu directivu, qu’habrá decidir cómo va xestionase la radiotelevisión pública. Too ello supondrá un nuevu retrasu d’a lo menos un añu a partir d’anguaño, según los cálculos del responsable de Comunicación del Principáu, nun procesu cuyos últimos pasos sedrán la contratación de personal y la concreción de la programación. 31 de mayu, 2004 0 FacebookTwitterPinterestEmail
Comunicación Próspero Morán plantega la figura del nuevu metaperiodista nunes Xornaes de Periodismu Dixital en Murcia by asturnet 31 de mayu, 2004 El direutor dAsturnews plantegaba en Murcia la necesidá de dexar de llau el conceutu de periodista multimedia y afitase na definición fonda de lo que vraeramente tien de ser el perfil del periodista dixital, camín de lo que nomó el metaperiodista, un periodista dixital que ye conocedor fondu del periodismu como profesión nes sos estremaes facetes, asina como de referencies humanístiques fundamentales pa poder comunicar a la sociedá, y perconocedor de les tecnoloxíes que permiten costruir la información multimedia. El Catedráticu asturianu de Tecnoloxía de la Información de la Facultá de Ciencies de la Comunicación de Málaga, Bernardo Díaz-Nosty, foi lencargáu dentamar les Xornaes sobre Tendencies del Periodismu Dixital que se cellebren nel Salón dActos de la Cámara de Comerciu de Murcia, dientro les Xornaes SICARM , coles que la Consejería de Economía, Industria e Innovación quier averar la Sociedá de la Información a la rexón murciana, a lo llargo d’una selmana con demostraciones teunolóxiques pa los ciudadanos y Xornaes especializaes como la enfotada nel periodismu dixital. La propuesta de Morán facíase al abellugu de les Xornaes de Periodismu Dixital que se cellebren entamaes pola Consejería de Economía murciana en collaboración cola Asociación de la Prensa. El direutor dAsturnews, quaprovechaba pa presentar la esperiencia desti mediu en Murcia, participaba como Direutor del Cursu dEspertu en Periodismu Dixital de la Universidá dUviéu faciendo de ponente na mesa titulada El periodista digital: perfil de un nuevo comunicador, na que participaben tamién Rafael Carrasco Polaino, coordinador del Área informática aplicada a la Comunicación del Centro Universitario Villanueva; Pedro Manuel Moreno, Vicesecretariu de Comunicación de la UNESCO; Silvia Llombart Monner, Directora de Lamalla.net; y Juan Antonio de Heras, Vicepresidente de l’Asociación de la Prensa de Murcia como moderador. Leonarda García, Profesora de Tecnoloxía de la Rafael de la Universidá Católica de Murcia, dixera na primer riestra de ponencies, falando de la formación universitaria del periodista dixital, que periodistas digitales seremos todos o no seremos periodistas y Próspero Morán retrucó-y plantegando la imposibilidá de que toos aportemos a una especialización como periodistes on-line cuando ye dafechamente imposible queso ocurra, como tampoco sucedió con la llegada de la radio o la televisión, no todos se convirtieron en periodistas radiofónicos ni audiovisuales. Apertura de Nosty Bernardo Díaz-Nosty, ún de los más nomaos especialistes na comunicación del sieglu XXI faló sobro el déficit mediático en España averándo a los presentes a una murnia realidá, la del nuesu Estáu, que depués matizaríen dellos otros especialistes. La converxencia con europa na formación del periodista dixital foi la primer de les meses de ponencies que se presentaben en Murcia cuntando cola participación despecialistes universitarios como Pedro Antonio Rojo,profesor de Tecnología de la Información de la Universidá de Murcia, Pedro García-Alonso, Direutor de Posgrado de la Universidá Complutense de Madrid, Leonarda García, profesora de Tecnología de la Información de la Universidá de Murcia, y María José Cantalapiedra, profesora de Periodismo Electrónico Multimedia de la Universidá del País Vascu. La profesora Cantalapiedra empobinó la so intervención a entrugase retóricamente ¿cómo se consiguen buenos profesores enla Universidad?, plantegando qu’ensin bona formación yera dafechamente posible llograr bonos profesionales. Sigún la profesora vasca, hace falta invertir y exigir al profesor universitario, pero para eso hay que ofrecerles contraprestaciones económicas dignas. Y esto lo digo con sentido del humor, porque si me falta el sentido del huor acabaré tirándome a la ría (de Bilbao). Nuna intervención enllena de referencies humorístiques, la profesora de la UPV dexó bien nidio cuálu yeral problema cimeru de la enseñanzal periodismu na Universidá: No se como piensan converger con Europa, porque si no te pagan al final va a aquerer trabajr en la Universidad sólo el más torpe o el más vocacional Pela so parte, Leonarda García faló del perfil dalumnu con formación instrumental y dixo que yera pernecesaria, pero tamién una formación de base, porquel periodista nun pue ser un espertu informáticu, ye más importante la formación cultural desti periodista que tien de tar formáu cultural y teunolóxicamente, pero tamién nos saberes tradicionales. Sigún la profesora de la Universidá Católica de Murcia continúa siendo más importante los valores culturales, la veracidá, la credibilidá Los conteníos dixitales y el futuru del periodismu dixital son les materies alrodiu de les que se montaba lalderique pela tarde nestes Xornaes de Periodismu Dixital coles que Murcia quier aportar la so reflesión a los debates que se tan faciendo en toa España alrodiu de les nueves formes de facer periodismu. Datos sobro les Xornaes en SICARM 31 de mayu, 2004 0 FacebookTwitterPinterestEmail