2004

L’usu abusivu d’estudiantes de Periodismu en práctiques pa facer el llabor d’un redactor de plantiella nun ye esclusivu de les comunidaes autónomes que cuenten con facultá propia. “Falemos d’Asturies”, exemplificó’l decanu de la Facultá de Xornalismo de Santiago de Compostela, Miguel Túñez, na apertura d’un congresu qu’afondó dende la capital gallega na vinculación entre precariedá llaboral y desinformación.

La facultá compostelana, que caltién alcuerdos con medios de comunicación implantaos n’Asturies pa la inclusión d’estudiantes en llabores de práctiques nos meses de veranu, ta acabante espublizar una encuesta ente los sos llicenciaos qu’asoleya un altu índiz de precariedá nel sector: Según los datos d’esi documentu, ún de cada diez periodistes trabaya ensin negún tipu de contratu, la mitá cobren un salariu brutu mensual inferior a 900 euros y los niveles de temporalidá son casi absolutos nel casu específicu de les televisiones.

Nesi contextu de falta de garantíes llaborales, les práctiques de veranu -de les que la Facultá de Xornalismo de Santiago xestiona 100 places en Galicia y Asturies- empeoren les condiciones, según Túñez, non por sigo mesmes, “sinón pol usu que les empreses faen d’elles”.

Nesti sen, los profesionales aconceyaos xunta’l decanu na I Xornada Profesional de la Federación de Sindicatos de Periodistes, que se cellebró’l sábadu pasáu en Compostela, fixeron un llamáu a llimitar les xornaes llaborales de los estudiantes, reforzar el so control tutorial cola creación d’un departamentu de siguimientu nes facultaes ya incluso bloquear les práctiques en ciertes empreses qu’acaben d’executar despidos y demanden estudiantes pa cubrir esos puestos vacantes a un preciu enforma más baratu.

Periodistes de Cataluña, Madrid, Baleares, La Rioja, Canarias y Portugal denunciaron en Galicia que “lo que más-yos preocupa a les empreses ye que sigamos viviendo na precariedá pa poder siguir manipulando la información” y definieron el pluralismu informativu como el trabayu con garantíes de dignidá y llibertá pa los profesionales, frente a quienes lu entienden como una mera abundancia d’empreses de comunicación.

Nel congresu cellebráu en Santiago, nel que quedó patente la precariedá na que faen el so llabor los periodistes n’empreses como Localia, onde según los sos propios emplegaos el sueldu mediu mensual ta perbaxo de los 600 euros, quedó constituyida una comisión xestora de la que saldrá un sindicatu de periodistes pal ámbitu de Galicia.

Web del Colexu de Xornalistas de Galicia

Recuperar el pluralismu democráticu cola collaboración de los trabayadores. Con esi envís declaráu, l’hasta agora director de Radio Nacional d’España n’Asturies, el periodista llangreanu Pedro Alberto Marcos, tomó esti mediudía posesión al frente’l centru territorial de Televisión Española, allugáu en San Esteban de les Cruces, en sustitución de José Antonio Ovies.

Marcos, que pidió “un marxe de confianza” a la plantiella’l centru que va dirixir, destacó nuna alocución pública el so respetu pol pluralismu informativu, daqué que’l delegáu del Gobiernu n’Asturies, Antonio Trevín, presente na toma de posesión, enunció con otres pallabres: “Hai qu’abrir les ventanes pa que tolos aires puean circular per esta casa”, señaló.

Nesi sen, Trevín aseguró que’l centru territorial de TVE n’Asturies “nun pue ser namás el centru d’Uviéu, Xixón y Avilés”, y alitó al nueu director a lliderar una nueva etapa na que la televisión pública seya “más de la sociedá que del Gobiernu”.

Suscribió esi estremu el director de l’Axencia pal Desarrollu de la Comunicación del Principáu, Jorge Fernández León, que destacó’l papel de los medios de titularidá pública como entidaes obligaes a “refrescar partes qu’otros nun refresquen y dir onde otros nun van”. Pa facer posible esa concepción de los medios públicos como serviciu y non como negociu, el responsable de Comunicación del Gobiernu ásturianu ya ideólogu de la futura radiotelevisión autonómica propuso la firma d’alcuerdos con TVE pa desendolcar producción de conteníos y da-y con ello “más oportunidaes” al sector audiovisual asturianu.

Pol so llau, Manuel Lombao, director de la Estaya de Centros Territoriales de Televisión Española, eloxó la función informativa de les delegaciones de TVE como “imposible d’asumir por otros” y reclamó-y al Gobiernu autonómicu sofitu institucional pa poder ampliar la presencia, l’esfuerzu y los medios de Televisión Española n’Asturies.

Magar d’ello, l’altu cargu de TVE sorrayó’l papel esencial de los trabayadores del centru p’afitar la dignidá, la profesionalidá y la pluralidá informatives, yá que, aseguró, “esi camín nun lu recuerren nin parlamentarios, nin sabios”, n’alusión al comité d’espertos recientemente nomáu pol Gobiernu central p’ameyorar los conteníos de les emisiones de TVE.