2004

La entrada orixinal a la cueva de Tito Bustillo taba nuna cavidá anexa de 28 metros de llargor na que podríen tar depositaos nuevos restos humanos de más de diez mil años d’antigüedá. L’equipu que restola el conxuntu xeolóxicu de Ribesella defende esa hipótesis depués d’atopar abondos restos de pintura “idénticos” a los de la cavidá principal na nueva galería, bautizada polos científicos como ‘La Cuevina’.

En realidá, trátase d’un segundu bautizu, porque l’equipu encabezáu polos caderalgos Rodrigo de Balbín y Alberto Foyo barrunta que’l furacu acabante descubrir correspuéndese cola denominada ‘Cueva’l Ríu’ que’l paleontólogu Eduardo Hernández Pacheco escavó a primeros del sieglu XX. Los sos trabayos nun s’espublicaron, pero’l nome y la esistencia de la cueva dióse por fecha magar que nun se conocíen nin el so allugamientu esactu, nin la so relación con Tito Bustillo.

L’equipu llideráu por Balbín y Foyo respuende agora a esa entruga: La cueva redescubierta, que foi llocalizada a primeros d’esti añu ya esplorada nos meses siguientes, comunícase cola cavidá de Tito Bustillo -anque esi pasu tea agora tupíu pol pasu’l tiempu-, y de fechu yera la entrada orixinal a ella: Quienes accedieron a la cavidá pa pintar los grandes murales de Tito Bustillo entraron per ‘La Cuevina’, aseguraron dambos caderalgos nuna comparecencia que se cellebró esta tarde na sé Conseyería de Cultura.

La galería soterraña redescubierta tien 28 metros de llargor, 3 d’anchu y un altor máximu de 2 metros, dimensiones que son enforma más pequeñes que les orixinales porque un movimientu masivu de tierres afectó a tol conxuntu de cavidaes y provocó un derrabe que tupió estancies y vasos comunicantes baxo tierra.

Amás d’ello, ‘La Cuevina’ tien a lo llargo de tola so estensión abondos restos de pintura, a primer vista trazos negros y encarnaos que, según l’equipu d’investigadores, son “idénticos” a los qu’hai na vecina Tito Bustillo. Talos afayos lleven a los científicos a enfotase n’atopar nuevos restos humanos na cavidá descubierta y faen evidente qu’hebio un “terremotu” posterior al tiempu en que les cueves de Ribesella taben habitaes por homes y muyeres del Paleolíticu.

Lo qu’entá desconocen los xeólogos y paleontólogos ye si los pobladores de Tito Bustillo “marcharon porque cayó-yos la cueva enriba, o si primero esbarrumbóse la cueva y depués colaron”, según precisó Alberto Foyo. A rescamplar esa incógnita van dedicar los sos prósimos llabores los investigadores qu’esploren el yacimientu de Ribesella.

Los distintos organismos del Gobiernu asturianu pusieron 4,4 millones d’euros dende 1999 pa recuperar l’albergue de pelegrinos de Curniana y el Ministeriu de Fomentu nun pagó nin un euru pesie a tar obligáu a facelo al traviés del 1 por cientu del so presupuestu. La Conseyera de Cultura, Comunicación Social y Turismu, acusó güei nesos términos al anterior ministru de Fomentu, Francisco Álvarez Cascos, na inaguración del monasteriu de San Salvador de Curniana como albergue de pelegrinos depués de llargues obres.

La recuperación del vieyu edificiu relixosu, fundáu nel sieglu XI y cedíu cien años depués a la orde monástica de los cluniacenses -rama de los benedictinos que foi impulsora del arte románicu como reivindicación de l’austeridá arquitectónica- yera una vieya demanda de los estudiosos del Camín de Santiago n’Asturies, que vieron impulsáu el so deseyu llueu d’un congresu sobro rehabilitación del patrimoniu cellebráu hai agora seis años en Salas.

Les conclusiones d’esa xuntanza abrieron la puerta al aniciu de les obres de remocicamientu’l monasteriu de Curniana, que se vieron postergaes en sucesives ocasiones y qu’agora tán acabante cuayar nun complexu destináu al tránsitu de pelegrinos qu’inclúi, ente otres dependencies, una hospedería con 24 places, un comedor, una cocina y un edificiu de servicios.

Too ello construyío, reivindicó Migoya, con perres aportaes dafechu pol Principáu, yá que según denunció la titular de Cultura, de les 33 obres culturales asturianes nes que ta comprometida la participación del Ministeriu de Fomentu, namás 5 recibieron esa participación -al traviés del 1 por cientu que Fomentu cede pa proyectos en beneficiu de la cultura-, mientres que n’otres 13 obres el Ministeriu ta desapaecíu.