2004

El Principáu fai los últimos retoques nos planos de la sé provisional dende la que la radiotelevisión autonómica empezará emitir na Universidá Llaboral de Xixón. Les instalaciones, distribuyíes en dos plantes y con un plató de 200 metros cuadraos, tarán llistes en tornu a marzu del añu que vien y funcionarán como sé central del futuru ente públicu a lo menos hasta 2010.

Esa ye la previsión del director de l’Axencia pal Desarrollu de la Comunicación y Proyectos Culturales del Principáu, Jorge Fernández León, que plantega la futura plantiella de la radiotelevisión como un grupu d’unos 90 trabayadores ente los qu’habrá emplegaos d’alministración y publicidá, pero sobre too redactores capaces de manexar los tres soportes que va incluyir l’ente públicu: tv, radio ya internet. “Eso nun significa que tol mundu lo faiga too a la vez”, precisa Fernández León, sinón que la mayor parte’l personal habrá tar preparada pa saltar d’un mediu a otru.

El departamentu de Comunicación del Executivu autonómicu ultima’l proyectu d’habilitación del vieyu conventu de la Universidá Llaboral como sé de la futura tv autonómica, que llanzará una señal en prebes a finales d’esti añu pero que nun podrá tener una programación estable hasta mediaos de 2005, depués que se nome al equipu xestor y s’esbille a la plantiella.

Darréu reciba’l documentu definitivu, dientro d’aprosimadamente un mes, el Conseyu de Gobiernu aprobará’l pliegu de condiciones pa convocar el concursu públicu de la obra, a partir d’un plantegamientu qu’estructura les futures instalaciones en dos plantes cola redacción, l’archivu, les oficines de producción y los controles nel primer pisu. Na planta baxa allugaránse un plató d’unos 200 metros cuadraos -que pol so altor ocupará tamién espacios de la primer planta- y dependencies destinaes a la recepción y les xeres alministratives.

Resueltes la convocatoria y la posterior alxudicación de les obres, la previsión ye que los trabayos pa reconvertir el conventu de la Llaboral como sé de la tv autonómica asturiana puean empezar na seronda y se prollonguen unos cinco meses, de mou que les instalaciones tean llistes pal empiezu de la primavera de 2005.

L’asturianu ha tener una presencia destacada nos programes infantiles de la radiotelevisión autonómica pa garantizar la pervivencia del idioma. Asina lo entiende’l director de l’Axencia pal Desarrollu de la Comunicación y Proyectos Culturales del Principáu, Jorge Fernández León, qu’apuesta pol usu de la llingua asturiana “en tou tipu d’emisiones” del futuru ente públicu y defende’l valor audiovisual del asturianu como “daqué positivo que puea consumise con gustu”.

En declaraciones a Asturnews, el responsable de Comunicación del Gobiernu autonómicu amosóse partidariu d’incorporar la llingua asturiana “con normalidá” na parrilla de programación de la futura televisión pública, qu’empezará a emitir una señal llocalizable a finales d’esti añu y tará en condiciones técniques de mantener una programación regular en tornu a xunu de 2005.

Neses emisiones, Fernández León sostién que l’asturianu tien qu’incorporase “con normalidá, intelixencia y calidá”, y el so usu ha facese habitual, ensin afitar un porcentaxe de salida, “en debates y programes informativos”.

Daqué d’especial relevancia, si se toma en cuenta que’l Gobiernu’l Principáu plantega que la producción propia de la futura radiotelevisión áutonómica debe centrase nos espacios informativos y escluir, por exemplu, los programes dramáticos -series, películes pensaes pa televisión- por una razón contundente: El coste d’esos espacios, asegura Fernández León, “ye inabordable”.

El Tribunal Constitucional destorgó’l llunes pasáu el tortuosu camín de la tv pública asturiana, al desestimar el recursu que presentara l’anterior Gobiernu central, presidíu por José María Aznar, contra’l cambiu llegal promulgáu pol Gobiernu asturianu pa superar el bloquéu’l PP, que vien negándose a nomar los sos representantes nel conseyu d’alministración del futuru ente públicu de comunicación.

Tolos pasos siguientes, poro, daránse n’Asturies, empezando pola constitución del conseyu nos meses finales de 2004 y la propuesta de director por parte’l Gobiernu, que yá manexa nomes “anque nin los propios candidatos lo saben”. Lo que sí tien claru l’Executivu autonómicu ye’l modelu de televisión que quier: Una tv “cuya única obsesión nun seya’l ‘prime-time’ y na que tolos asturianos alcuentren dalgo que-yos interese”, según la definición del responsable de Comunicación del Principáu.