Patrimoniu El Pueblu d’Asturies afítase como’l mayor muséu etnográficu al incorporar el pabellón de la Expo by asturnet 12 de xunu, 2004 El Muséu Etnográficu del Pueblu d’Asturies, fundáu en Xixón en 1968, afítase como’l mayor equipamientu na so estaya en territoriu asturianu. La incorporación del pabellón col qu’Asturies tuvo representada na Esposición Universal de Sevilla -la ‘Expo 92’- esparde a partir de güei los espacios d’un complexu museísticu que reivindica la so condición de cabecera de la investigación etnográfica asturiana. Cola anesión del renováu pabellón de la Expo, un edificiu de tres plantes qu’hasta agora foi emplegáu como sé d’actos puntuales del muséu pero con una dimensión tamién vinculada a la hostelería, el Pueblu d’Asturies pieslla la so formación como complexu museísticu y cellebra esi estremu con una esposición sobro la cocina. Frutu d’un llabor de más d’una década, l’amuesa fai un repás de la evolución de la sociedá asturiana nos dos últimos sieglos al traviés d’esa estancia doméstica como la más característica del domiciliu. Dende esi llugar, entienden los responsables de la esposición, pue reconstruyise con fidelidá l’actividad económica, los gustos, los cambios d’alimentación, les diferencies sociales y el mou d’afrontar la vida de sucesives xeneraciones d’asturianos. El Muséu Etnográficu del Pueblu d’Asturies ocupa una superficie de más de 30.000 metros cuadraos na oriella drecha’l ríu Piles. Atesora un archivu de la tradición oral y una fototeca con más de 200.000 imáxenes, asina como una importante colección de preseos domésticos y de llabor, atropada baxo la coordinación del director del centru, Xuaco López, defensor del muséu como centru de referencia de la investigación etnográfica asturiana. 12 de xunu, 2004 0 FacebookTwitterPinterestEmail
Lliteratura Claudio Magris gana’l ‘Príncipe’ de les Lletres como esponente de la “tradición humanista europea” by asturnet 10 de xunu, 2004 L’escritor y profesor italianu Claudio Magris, espertu en Lliteratura xermánica y autor d’una bayurosa obra de narrativa y ensayu, foi galardonáu esti mediudía n’Uviéu col Premiu ‘Príncipe de Asturias’ de les Lletres 2004, depués d’imponese nes últimes votaciones a los finalistes Paul Auster y Milan Kundera. A los güeyos del xuráu, Magris encarna na so escritura la meyor tradición humanista y plural de la lliteratura europea, “dispuesta al diálogu de cultures”. Nos sos llibros, entiende’l xuráu, l’escritor italianu amuesa “espacios que componen un territoriu de llibertá nos que se configura’l deseyu de la xunidá europea na so diversidá hestórica”. Darréu de conocer la concesión del galardón, Magris declaróse enforma “contentu y sorprendíu” por ser l’adxudicatariu del prestixosu premiu, y defendió dende Italia la reflexón crítica nuna lliteratura concebida como busca de la verdá, nun contestu nel que, asegura l’autor galardonáu, hai ciertu marxe pal optimismu. La candidatura del escritor italianu fora presentada por Hans Magnus Enzensberger y Ryszard Kapuscinski, premios ‘Príncipe de Asturias’ de Comunicación y Humanidaes 2002 y 2003, respectivamente. Pa llegar a la so decisión final, el xuráu, presidíu pol presidente de l’Academia de la Lengua Española, Vícitor García de la Concha, descartó a otros 34 candidatos de 16 países. Nacíu na llocalidá de Trieste en 1939, Claudio Magris ta consideráu como ún de los principales mediadores ente les cultures italiana y alemana. Ye profesor titular na Facultá de Filosofía y Lletres de la Universidá de Trieste y afitóse como una de les figures más relevantes de la lliteratura italiana contemporánea con obres de narrativa y ensayu como ‘El Danubio’, ‘Conxetures sobro un sable’, ‘Microcosmos’ y la más reciente ‘La Esposición’, asoleyada en 2002 como reivindicación de la figura’l pintor triestín Timmel, fallecíu nun manicomiu. 10 de xunu, 2004 0 FacebookTwitterPinterestEmail
Lliteratura Claudio Magris, Milan Kundera y Paul Auster eríxinse como favoritos pal ‘Príncipe’ de les Lletres by asturnet 10 de xunu, 2004 Los escritores Claudio Magris, Milan Kundera y Paul Auster son, por esi orde, los tres grandes favoritos pa recibir el Premiu ‘Príncipe de Asturias’ de les Lletres, que se fallará esti mediudía y qu’abre la concesión de los galardones na so XXIV edición. Los miembros del xuráu aconceyaron dende primera hora d’ayeri n’Uviéu pa decidir el nome’l ganador ente 30 candidatos de 16 nacionalidaes. Nun alcuentru colos medios de comunicación previu a la constitución del xuráu como tal, tres de sos miembros -los escritores Fernando Sánchez Dragó y Juan José Armas Marcelo, y el presidente de la Real Academia de la Lengua, Víctor García de la Concha- señalaron al novelista Juan Marsé como merecedor del galardón, pesie a que caún d’ellos declaró tener el so propiu favoritu. Sánchez Dragó, partidariu de premiar a un autor de sonadía internacional, adelantó que defenderá les opciones de la escritora india Arundathi Roy, mientres qu’Armas Marcelo decantóse por galardonar a José Manuel Caballero Bonald y el presidente de l’Academia de la Lengua Española dixo preferir, en tóu casu, a un autor hispánicu como ganador. Magar d’eses preferencies, el nome del escritor centroeuropéu Milan Kundera sonó yá dende la mañana como’l d’un candidatu de pesu al ‘Príncipe’ de les Lletres 2004, que’l xuráu concederá, según declaraciones de los sos propios miembros, con plena independencia y ensin idegues prefixaes que puean condicionar la votación final. Web oficial de la Fundación ‘Príncipe’ 10 de xunu, 2004 0 FacebookTwitterPinterestEmail
Escéniques L’Ayuntamientu de Xixón refuga reflotar el Teatru Arango pa evitar convertilu nun centru d’estética by asturnet 10 de xunu, 2004 L’Ayuntamientu de Xixón nun reflotará en solitario el Teatru Arango, peslláu hai cuatro años y cuyu llocal quier alquirir un particular pa convertir la sala nun centru d’estética. L’alcaldesa de la ciudá, Paz Fernández Felgueroso, declaró güei la imposibilidá financiera del Consistoriu pa sufragar la recuperación del teatru, pero dexó abierta la puerta a la collaboración municipal si un inversor priváu lleva la iniciativa. D’esti mou, Felgueroso refuga la reivindicación cimera de la plataforma ciudadana ‘Cultura para el Arango’, recién constituyida pa reclamar la reapertura’l céntricu teatru xixonés, y mantién firme la negativa del equipu de gobiernu llocal a financiar el funcionamientu d’un segundu teatru públicu na ciudá. El collectivu ciudadanu en defensa’l remocicamientu del Arango, que recuerda que’l propietariu del inmueble cifraba l’alquiler del llocal nunos 180 euros diarios nes últimes negociaciones cellebraes con él hai unos años, anuncia nueves movilizaciones ya insiste na conveniencia d’evitar que la empresa Corporación Dermoestética merque finalmente el teatru y faiga d’él una gran clínica de tratamientos estéticos. L’alcaldesa de Xixón refugó la recuperación municipal del Arango nel trescursu d’un axitáu Plenu cellebráu esta mañana, nel que’l conceyal de Festexos, Iván Álvarez Raja, defendió la venta de paquetes d’entraes a empreses pal conciertu que Paul McCartney ufrió na ciudá el pasáu 25 de mayu como métodu qu’evitó amenorgar les perdes qu’ocasionó el recital. L’espectáculu del ex Beatle nel estadiu d’El Molinón dexó un déficit d’alredor de 500.000 euros nes arques municipales xixoneses y desencadenó una turbonada de crítiques al departamento de Festexos por parte de la oposición, ostentada pol PP. 10 de xunu, 2004 0 FacebookTwitterPinterestEmail
Cine Woody Allen aplaza los sos trabayos n’Asturies por problemes de financiación by asturnet 10 de xunu, 2004 Asturies tendrá qu’esperar el regresu de Woody Allen a lo menos hasta 2005. El director norteamericanu, que proyectaba rodar nel Principáu escenes d’una nueva película na prósima seronda, pospón la so visita énte la falta d’un alcuerdu concretu con Televisión Española pa financiar parte del so llargumetraxe. La postergación afecta tamién al conciertu qu’Allen pensaba ufrir en tierres asturianes, qu’agora tendrá qu’esperar. Según espubliza na so edición de güei el diariu xixonés ‘El Comercio’, el departamentu de relaciones internacionales de la Fundación ‘Príncipe de Asturias’ -organismu que premió a Woody Allen en 2002 col ‘Príncipe’ de les Artes- confirmó l’aplazamientu de la visita’l cineasta a Asturies hasta l’añu prósimu, coincidiendo coles cellebraciones del 25 aniversariu de los galardones. Tres de la postergación del rodaxe y el conciertu de jazz qu’Allen planificara pa la seronda prósima tá la falta d’entendimientu colos responsables de Televisión Española, que nun llegaron a concretar un alcuerdu pa sufragar parte’l presupuestu de la película que’l popular cineasta pensaba rodar a partir de setiembre n’estremaes llocalizaciones d’España. Poro, según los responsables de la Fundación ‘Príncipe’, Woody Allen aprovechará la so participación comprometida nos actos conmemorativos de les bodes de plata de la entidá uvieína -pa la que va ellaborar un documental- pa llevar a bon puertu los dos proyectos planificaos, y agora aplazaos, n’Asturies. Con ocasión de la concesión del Premiu ‘Príncipe de Asturias’ de les Artes na so edición de 2002, Allen amosó un especial afectu por Uviéu que-y valió, ente otros actos públicos de reconocencia, l’asitiamientu d’una estatua cola réplica de la so imaxen nel centru de la capital d’Asturies. 10 de xunu, 2004 0 FacebookTwitterPinterestEmail
Sociedá La cultura frena l’aumentu de los precios, según l’Institutu Nacional d’Estadística by asturnet 10 de xunu, 2004 Los precios de los productos y servicios culturales baxaron un 2 por cientu n’Asturies no que va d’añu y compensen con fuerza la subida xeneral de tarifes que los asturianos padecieron nos cinco primeros meses de 2004, yá que, con calter xeneral, los precios son agora un 1,8 por cientu más caros qu’al empezar l’añu. Según los datos asoleyaos esta mañana pol Institutu Nacional d’Estadística (INE), el sector asturianu del ociu y la cultura ye l’únicu qu’aguanta con fuercia el tirón de la subida xeneralizada de precios, y afítase nun índiz d’inflación interanual -la perda de valor alquisitivu del dineru nos últimos doce meses- del -1 por cientu. O lo que ye lo mesmo: les tarifes de productos y servicios culturales resulten agora un puntu más barates qu’hai un añu, mientres que los precios subieron de mou global un 3,2 por cientu nesi mesmu periodu. Daqué que se correspuende cola evolución del Índiz de Precios de Consumu de mayu pasáu, que rexistró una subida xeneral de seis puntos n’Asturies cola cultura como única estaya capaz d’impedir un incrementu mayor: Esti sector protagonizó la mayor baxada de precios en mayu, un 1,8 por cientu, a gran distancia de les baxaes n’hostelería, melecina y comunicaciones, que foron d’ente ún y dos puntos. 10 de xunu, 2004 0 FacebookTwitterPinterestEmail
Comunicación Pañeda aboga pol pluralismu y l’amenidá na so toma de posesión como director de RNE by asturnet 9 de xunu, 2004 Francisco Pañeda yá ye’l nuevu director de Radio Nacional d’España n’Asturies. El periodista xixonés, qu’hasta agora trabayaba na redacción del centru territorial de Televisión Española, allugáu en San Esteban de les Cruces, tomó güei posesión del so cargu al frente de la cadena pública nel Principáu. Na so primer alocución como director de Radio Nacional n’Asturies, Pañeda amosó’l so envís de defender el pluralismu informativu y la prosimidá a los ciudadanos, ufriendo una información de calidá lo más amena posible. Toos esos estremos casen dafechu, según el nuevu responsable de RNE, col calter de serviciu públicu que tien la cadena radiofónica. Francisco Pañeda formóse como periodista na redacción del diariu xixonés ‘El Comercio’, decanu de la prensa escrita asturiana, y pasó depués a desempeñar llabores de redactor en Radio Nacional d’España y nel centru territorial de TVE n’Asturies, qu’agora abandona pa regresar a la radio pública. Asina, Pañeda fai el camín inversu al so antecesor nel cargu, Pedro Alberto Marcos, que’l pasáu 4 de xunu asumió la dirección de Televisión Española n’Asturies procedente de RNE. 9 de xunu, 2004 0 FacebookTwitterPinterestEmail
Lliteratura Quique Faes y Pablo Rodríguez Medina ganen el concursu de cuentos d’El Garrapiellu by asturnet 9 de xunu, 2004 El concursu de cuentos curtios de la Tertulia cultural El Garrapiellu, qu’algama esti añu la so edición númberu trece y que s’afita como ún de los certames más veteranos na so estaya, premia a un autor de Xixón y a otru de L’Entregu. El xuráu alcordó concede-y el primer premiu, dotáu con 900 euros, al periodista Quique Faes, redactor d’Asturnews, pola obra ‘Paco depués del trauma’, mientres que l’accésit, de 300 euros, otorgóse-y al escritor Pablo Rodríguez Medina, que presentara a concursu el cuentu ‘De penalti’. Según informó El Garrapiellu al traviés d’un comunicáu públicu, el xuráu tuvo formáu pola escritora y mayestra Iris Díaz Trancho; l’académicu de la Llingua Vicente García Oliva; l’autor Pablo Tejón Castañón, ganador de l’anterior edición del concursu; la responsable de la Oficina de la Llingua de Xixón, María Xosé Rodríguez; y el profesor y traductor Octavio Trapiella. Faes, qu’algamara el segundu premiu na anterior edición del concursu de cuentos curtios d’El Garrapiellu, tien asoleyaes dos noveles cola casa editorial Trabe, la última d’elles nel añu 2000. Pol so llau, Pablo Rodríguez Medina ye ún de los escritores más premiaos y prolíficos en llingua asturiana, con una decena de llibros nel mercáu. 9 de xunu, 2004 0 FacebookTwitterPinterestEmail
Música Trebolgu pieslla’l programa de los sos alcuentros con Fred Morrison como cabeza de cartel by asturnet 9 de xunu, 2004 El V Festival Intercélticu Alcuentros Tradicionales Trebolgu, ún de los referentes nel panorama de la música celta n’Asturies, calienta motores: Tres díes de conciertos (24, 25 y 26 de Xunu) y un mercáu dantaño centrán la ufierta del certame col Parque l’Oeste dUviéu como allugamientu central. Pal primer día’l festival ta prevista la inaguración a les ocho de la tarde, nun llugar inda por confirmar y con La Bandinal Tombo como protagonista, yá que va presentar el so nuevu discu. De secute habrá un conciertu-presentación con tolos grupos participantes nos alcuentros. El vienres 25 de xunu, a partir de les 22 hores, subirá al escenariu el grupu asturianu Tuenda, siguíu de los uvieínos Gatos del Fornu y más tarde, de Flook!, conxuntu inglés con raigones irlandeses. Durante tol sábadu va tener llugar el mercáu tradicional, con artesanía, grupos de baille, malabaristes, deportes rurales, bandines de gaites y cuentacuentos como propuestes previes al empiezu de los conciertos. Llangres será lencargaú dabrir la nueche, que protagonizarán darréu el gaiteru escocés Fred Morrison acompañáu por Jamie McMenemy col bouzouki y, como remate de la folixa, los avilesinos Dixebra. 9 de xunu, 2004 0 FacebookTwitterPinterestEmail
Educación Más de 2.000 escolinos secundaron el programa’l Principáu pa fomentar la llectura by asturnet 9 de xunu, 2004 Xenerar “complicidá” col llibru nos neños porque si s’algama esa rellación de críu, nun s’escaez de mayor. El director xeneral de Promoción Cultural del Principáu, Carlos Madera, resumió esta mañana con esos términos l’envís del programa ‘Medrar lleendo’, que’l Principáu puso en marcha ente febreru y mayu pa fomentar la llectura ente los escolinos y pol que pasaron más de dos mil estudiantes en 30 biblioteques públiques. “La meyor inversión en cultura nun ye la del lladriyu”, apuntó Madera nuna comparecencia na biblioteca uvieína d’El Fontán, “sinón la que se fai nel valor de lo pequeño”, n’alusión a la familizarización de los asturianos de menor edá col hábitu de la llectura. Y el balance de la iniciativa ‘Medrar lleendo’ nel cursu escolar qu’agora acaba demuestra, según l’altu cargu, que la iniciativa tien una mui bona acoyida y ta dafechu consolidada. Nos cuatro meses que se prollongó’l programa, con un presupuestu global de 58.000 euros, los 23 talleres de llectura y creación lliteraria programaos atroparon l’interés de más de 600 escolinos, mmientres que polos 30 alcuentros con autores pasaron unos 1.500 estudiantes. Pa participar como ponentes na edición de 2004, el Principáu escoyó a los escritores asturianos Antón García, Ricardo Menéndez Salmón, Miguel Rodríguez Muñoz, Susana Pérez Alonso, Pedro de Silva y Manuel Herrero Montouto. Les actividaes, qu’incluyeron cuentacuentos y formación a mediadores de la llectura y cuyos organizadores quieren facer llegar na prósima edición a “más xente y más puntos”, desendolcáronse tanto n’asturianu como en llingua castellana. 9 de xunu, 2004 0 FacebookTwitterPinterestEmail