2004

Cualquier poesía que nun axite mentes y cuerpos nun ye más qu’un meru exerciciu de soníu. El poeta Ignaciu Llope enunció ayeri esi alegatu lliterariu na presentación en Xixón de ‘Una casa tendida al océanu’, una esbilla de poemes ya ensayos na que l’escritor pixuetu reivindica’l valor “proletariu” de los testos na construcción collectiva d’una comunidá.

Nesi sen, Llope declaróse señaldosu de los ‘dazibaos’ -periódicos murales popularizaos pol réxime comunista chinu- y señaló’l manifiestu que llamaba n’Asturies a la fuelga xeneral revolucionaria d’ochobre de 1934 como la obra lliteraria más estaordinaria ente les que conoz.

Nel trescursu del actu de presentación de ‘Una casa tendida al océanu’, editada pol Atenéu Obreru de Xixón dientro de la so colección ‘Tiempu de cristal’, el poeta pixuetu duldó na sé del Atenéu de que l’ensayu y la poesía seyan “males compañíes”, y precisó qu’en dambos xéneros, “que son dos principios de conocimientu, falo de lo mesmo”.

Pol so llau, el tamién escritor Adolfo Camilo Díaz, qu’exerció xunta Xulio Vixil Castañón de presentador de la obra de Llope, ensalzó’l nuevu llibru del pixuetu como “tremendamente recomendable” y destacó los ensayos de Llope como “testos vivos que siguen siendo doliosamente reales”, n’oposición a lo qu’ocurre con otres obres del mesmu xéneru escrites en castellán.

Según Camilo Díaz, que definió a Ignaciu Llope como “gran cronista de lo que posiblemente tendríemos qu’haber sío”, los ensayos qu’agora publica l’autor pixuetu tienen inda más valor por tar concebíos “nos delirantes campos de Mordor del asturia-onanismu”, n’alusión a la fechura de la mayoría d’esos testos nos años ochenta, “cuando yéremos especialistes na invención de problemes”.

‘Una casa tendida al océanu’ recueye ventitrés poemes -seis d’ellos inéditos- y ocho ensayos qu’aborden temes como la “esquizofrenia” del pensamientu asturianista, la militancia nel Surdimientu y la cuestión llingüística na franxa comprendida ente los ríos Navia y Eo. Llope trabaya nun nuevu poemariu que prevé asoleyar baxo’l títulu ‘El combate melancólicu. Poemes proletarios’.

El delegáu del Gobiernu n’Asturies, el socialista Antonio Trevín, mediará énte’l Ministeriu de Cultura pa que les obres en llingua asturiana puean optar a los Premios Nacionales de Lliteratura, que condece l’Estáu con calter añal a los testos orixinales más detacaos en castellán, catalán, gallegu o euskera.

La xestión del delegáu gubernativu nel Principáu, que sucedió nel cargu a Mercedes Fernández (PP) depués de la victoria’l PSOE nes elecciones xenerales del pasáu mes de marzu, supondrá, de llegar a bon puertu, la primer reconocencia relevante del asturianu, por parte de les altes instituciones del Estáu español, como llingua lliteraria cooficial ‘de facto’.

Según confirmó ayeri a Asturnews un representante de la Fundación ‘Caveda y Nava’, collectivu defensor de la plena reconocencia de la llingua asturiana a tolos efectos, Trevín mantuvo un alcuentru reciente con una delegación de la Fundación énte la cual comprometióse amás a “buscar fórmules de cooperación” col Principáu p’afitar l’usu normal del asturianu n’Axencia Tributaria, la Seguridá Social y l’Alministración de Xusticia, encuadraes na denominada Alministración periférica y xestionaes, poro, pol Gobiernu central.

Nesti sen, el secretariu de la Fundación ‘Caveda y Nava’, José Manuel Pérez, profesor del departamentu de Drechu Públicu de la Universidá d’Uviéu, trabaya yá na redacción d’un borrador de conveniu que-y dea plena validez xurídica a les intenciones de Trevín.

La llegada d’Antonio Trevín a la Delegación del Gobiernu n’Asturies ruempe con ocho años de delegaos nomaos polos anteriores Executivos centrales del Partíu Popular. Dalgunos d’ellos tuvieron un papel decisivu, a partir de 1997, n’anulación de la cooficialidá del asturianu nos seis conceyos asturianos que decidieren declarala (Bimenes, Casu, Morcín, Llaviana, Llangréu y Castrillón).

Per primer vegada dende la crisis interna desatada nel PP asturianu en 1998 al entamar una escisión del partíu l’entós presidente autonómicu, Sergio Marqués -que creó la Unión Renovadora Asturiana-, dase una triple sintonía dafechu ente’l Gobiernu asturianu, rexíu pol PSOE col sofitu d’Izquierda Xunida-Bloque por Asturies; l’Executivu central, asumíu hai dos meses polos socialistes; y el delegáu del Gobiernu, el veteranu socialista, ex presidente del Principáu y ex alcalde de Llanes Antonio Trevín.

Una amuesa de la creación lliteraria n’asturianu con periodicidá cuatrimestral y a un preciu de 3 euros. La revista ‘Reciella Malory’, asoleyada por un grupu d’escritores qu’aconceyen nun establecimientu hosteleru de L’Entregu, naz col envís de pervivir nel tiempu y d’abri-yos les puertes a los testos d’autores del país.

Nel númberu inagural de la revista, que se presentará formalmente a les 19,30 hores del prósimu vienres na Casa Cultura de L’Entregu, inclúinse trabayos de Manuel Asur, Xulio Arbesú, Xosé Ramón Martín Ardines, Antonio y Guillermo Riopedre, Martín López-Vega, Roberto Corte, Juan Carlos Crespos Lanchas, Ana Rosa Fernández, Chechu García, Henrique G. Facuriella y Vanessa Gutiérrez, autores estos tres últimos qu’asumen la cordinación de la publicación.

L’equipu editor de ‘Reciella Malory. Cartafueyos de lliteratura asturiana’ cifra en 200 exemplares la primer tirada de la revista, que tará a la venta en distintes llibreríes d’Asturies y que, con un presupuestu modestu, pretende dir completándose en númberos posteriores con reseñes de llibros.

El nome de la publicación qu’agora ve la lluz correspuéndese col establecimientu entreguín onde los promotores de la revista vienen reuniéndose con calter periódicu dende l’añu 1998 pa entamar alderiques lliterarios.