Cine Un ciclu repasa’l cine de lluchadores y monstruos inverosímiles baxo’l títulu ‘Peor imposible’ by asturnet 29 d'agostu, 2004 Monstruos difíciles de creer, lluchadores ‘freaks’, maquetes de goma esgonciaes por héroes inverosímiles. La sesta edición del ciclu cinematográficu ‘Peor imposible’ entama güei en Xixón una serie de diez proyecciones que se prollongarán tola selmana con espaciu propiu pa la ciencia ficción asiática y que van culminar el prósimu sábadu nuna maratón de cine. ‘Los monstruos invaden la tierra’ y ‘El luchador manco’ estrenen esta tarde la llista de películes previstes nel ciclu a partir de les 18 hores, pa dexar pasu mañana a ‘Inframan’ y ‘Made in China’, y el miércoles a les cintes ‘Mad Warrior’ y ‘Robovamp’. Los organizadores de ‘Peor imporible’, iniciativa de la Fundación Municipal de Cultura, Educación y Universidá Popular de Xixón, reserven el xueves pa l’amuesa d’estremaes películes comprendíes baxo la denominación común de ‘Asia Extreme’ y feches n’estremu oriente. Completen el programa les obres ‘The Breed’, ‘Infraterrestre’ y ‘The shunned house’, les dos primeres previstes pal vienres y la tercera pal mediudía’l sábadu. Esa mesma xornada rematará’l ciclu con una maratón integrada pola proyección sucesiva de les películes ‘Baba Yaga’, ‘Capitán América’, ‘The Punisher’ y ‘Tex y el señor de los abismos’. Amás de les proyecciones, el ciclu ‘Peor imposible’ inclúi la cellebración d’un cursu d’introducción a l’animación que se desendolca a partir de güei baxo la dirección del director y escenógrafu Valentín Lorca y qu’analizará la hestoria, los fundamentos y la técnica de l’animación pa rematar na ellaboración d’un curtiumetraxe d’animación en plastilina. 29 d'agostu, 2004 0 FacebookTwitterPinterestEmail
Música Principáu y Ayuntamientu condicionen el Muséu de la tonada de Mieres al algame de fondos mineros by asturnet 29 d'agostu, 2004 El Muséu de la tonada sedrá una realidá si pue financiase con fondos mineros. L’alcalde de Mieres, Luis María García, y el director xeneral de Promoción Cultural del Principáu, Carlos Madera, afitaron esta mañana la intención d’Ayuntamientu y Principáu d’esperar incluso a “un segundu Plan del Carbón” -l’actual vence en 2005- que sufrague la puesta en marcha y el funcionamientu del equipamientu cultural. A les alministraciones llocal y autonómica preocúpa-yos la inversión inicial necesaria pa echar a andar el muséu, pero tamién los recursos económicos que’l futurible espaciu cultural requier pa funcionar baxo una “xestión sostenible”, especialmente al tratase, en pallabres de Carlos Madera, d’un equipamientu que “tien muncho d’intanxible”. Por esa razón, y pesie a que l’alcalde de Mieres sorrayó que “nun renunciamos al proyectu”, l’apertura del Muséu de la tonada podría postergase tovía más allá de 2005, si nun prospera la petición del Ayuntamientu pa desviar hacia l’equipamientu una partida de los fondos mineros aprobada en principiu pal Muséu Etnográficu de Gallegos, y el Consistoriu demanda la inclusión del Muséu de la tonada na llista de proyectos sufragaos con perres d’un nuevu Plan de la Minería. Premios de la tonada Luis María García, Carlos Madera y la conceyala de Cultura de Mieres, Beatriz González Prieto, presentaron güei el XVIII Memorial de Tonada ‘Silvino Argüelles’, un festival que va cellebrase’l prósimu vienres na villa minera cola participación de los diez meyores intérpretes de canción asturiana, a los güeyos del xuráu del certame: Sergio Agüeros, Liliana Castañón, José Manuel Collado, Mari Luz Cristóbal, Rosario González, José Manuel Robledo, Bibiana Sánchez, María Sánchez, Anabel Santiago y Jorge Tuya. Caún d’ellos interpretará dos cantares nel festival, que va desendolcase nel Parque Xovellanos y que tamién distinguió a Alberto Varillas como’l meyor gaiteru de tonada del añu 2004. 29 d'agostu, 2004 0 FacebookTwitterPinterestEmail
Emigración La Casa d’Asturies de Lleón entama les cellebraciones del 8 de Setiembre by asturnet 29 d'agostu, 2004 Depués de que les Fiestes de La Santina de los asturianos en Cantabria abrieren hasta güei mesmol garapiellu de folixes que tienen a la Virxen de Cuadonga como motivu, entamen en Lleón les fiestes de la Casa dAsturies que dendel martes 31 dagostu hastal 19 de setiembre van facer a lo asturiano protagonista de la capital lleonesa con munches actividaes de toa mena. La programación entamarál martes col pregón de les fiestes quufrirá Manuel Cadenas, entrenador del Club Balonmano Ademar y finará’l 19 de setiembre cola tradicional ofrenda a la Virxen del Camín. El martes, amás de la llectura del pregón, sedrál día nel que se va proclamar Xana a Lidia Pablos Fernández y Xana infantil a Nerea Morán Manga. El sábadu que vien ta prevista la celebración dun baille y un espectáulu de fuegos artificiales y el domingu día 5 de setiembre entamará la recta final de les fiestes cola procesión de la Virxen de Cuadonga y la misa xunta lactuación del grupu Coral de la Ilesia de San Marcos. La tradicional fabada al meudía y la entrega de premios de los campeonatos sociales compondrán el restul programa que tien de finar cola actuación de los grupos de coros y danzas Xovellanos de Xixón. Les fiestes de la Casa dAsturies de Lleón van tener tamién otros dos díes dactividaes. El día 12 de setiembre fadráse la misa polos socios y familiares fallecidos y el día 19 de setiembre la tradicional ofrenda a la Virxen del Camín. Depués destes xornaes en conmemoración del 8 de Setiembre, Día d’Asturies, en Cantabria y Lleón van venir munches otres, ente les que destaca la cellebración entamada pol Centru Asturianu de Bruseles, questi añu cumple venti años y que-y dedica la xornada al yuntamientu de Llangréu, como fai tolos años con ún de los conceyos asturianos. Les comunidaes asturianes nel esterior van cobrar amás protagonismu dende esti añu nes celebraciones del Día dAsturies depués quel conseyeru de Xusticia, Seguridá Pública y Relaciones Esteriores, Francisco Javier García Valledor, anunciara l’envís del Gobiernu d’entamar una celebración adicional y rotativa del Día d’Asturies nel esterior a partir d’esta prósima edición, cola idea de que cada añu seya una ciudá distinta la qu’acueya los actos conmemorativos. Madrid va estrenar la llista festexandol 18 y el 19 d’esi mes de setiembrel Día dAsturies, con presencia de miembros del Executivu’l Principáu. El direutor de l’Axencia Asturiana dEmigración, Luis Miguel Fernández Romero, viaxa a Santander p’abrir les Fiestes de La Santina 2004 29 d'agostu, 2004 0 FacebookTwitterPinterestEmail
Lliteratura Les editoriales asturianes salen a la cai a la gueta de llectores pa más de 1.200 llibros by asturnet 26 d'agostu, 2004 Más de 1.200 llibros en circulación a la gueta de llector. Esa ye la cifra d’obres estampaes n’Asturies que’l gremiu d’editores ufre nel so catálogu collectivu y que dende güei pon a la venta nuna feria allugada na cai Tomás y Valiente de Xixón con un envís central: Suplir la falta d’espaciu nos escaparates de les llibreríes y “poner al algame’l públicu” obres de tou xéneru. Daqué especialmente difícil si se tien en cuenta que la editorial ye una industria “mui esquizofrénica, qu’amiesta los componentes cultural y comercial”, según sorrayó esti mediudía Benito García, presidente’l Gremiu d’Editores d’Asturies, na apertura al públicu de la feria. Pesie a que la carpa asitiada en Xixón poles 14 editoriales que tán asociaes nel gremiu permanecerá abierta hasta’l prósimu 5 de setiembre, García reconoció la dificultá de que’l funcionamientu de la feria se traduza nun aumentu de llectores, “porque la nuesa capacidá de penetración del públicu ye enforma escasa”, si bien destacó la potencialidá del certame pa llegar a tolos públicos: “Na carpa entra tol mundu”, argumentó. Con presencia destacada de la llingua asturiana, la feria’l llibru entamada pol Gremiu d’Editores espón obres organizaes por xéneros, con independencia de la casa editorial que les asoleya. El públicu tien a la so disposición, con un descuentu xeneral del 10 por cientu, llibros publicaos poles cases editores Azucel, Madú, Nobel, Trabe, Trea, Alborá, Losada, Gea 2000, Grupu Norte, Hércules Astur, KRK, Llibros del Pexe, VTP y ‘El Oriente de Asturias’. 26 d'agostu, 2004 0 FacebookTwitterPinterestEmail
Escéniques Los dueños del Arango aseguren que tienen peslláu l’alcuerdu con Corporación Dermoestética by asturnet 26 d'agostu, 2004 Alcuerdu peslláu pa que l’Arango funcione como una macroclínica d’estética a lo menos pa los prósimos venti años. Asina lo sostién na edición de güei del diariu ‘El Comercio’ Manuel Fernández-Arango, voceru de los propietarios, según el cual el propósitu de l’alcaldesa de Xixón de mediar na negociación entre los dueños del teatru y Corporación Dermoestética precipitó la firma de los últimos propietarios que yeren reticentes a esti alcuerdu. De ser asina, el compromisu de la rexidora xixonesa, la socialista Paz Fernández Felgueroso, qu’hai agora una selmana anunció que ‘conxelaría’ la negociación con Dermoestética pa ganar tiempu y busca-y al Arango un usu cultural, tendría valío pa lo contrario que pretendía: Animar a los dueños del céntricu coliséu a entainar la firma del alcuerdu con Corporación Dermoestética. Siempre según les declaraciones de Fernández-Arango a ‘El Comercio’, el contratu pactáu cola multinacional d’estética prevé que’l teatru se-y alquile a Dermoestética por un tiempu de venti años, ya inclúi una cláusula na que s’afita que l’alcuerdu tará en vigor de sutaque se faiga la obra necesaria pa reconvertir la sala en clínica privada. Pol so llau, la plataforma ‘Cultura pal Arango’, que defende la recuperación del inmueble como espaciu cultural con aval municipal, realizó ayeri una nueva concentración énte’l teatru y anuncia que mantién la convocatoria de la manifestación que tien prevista pal xueves 16 de setiembre. 26 d'agostu, 2004 0 FacebookTwitterPinterestEmail
Escéniques La programación cultural de Xixón pal últimu trimestre apuesta por teatru, danza y música clásica by asturnet 26 d'agostu, 2004 Teatru, danza y música clásica. Eses son les tres apuestes de los programadores culturales del Ayuntamientu de Xixón pal últimu trimestre del añu, nel que los ciudadanos podrán asistir a cuarenta espectáculos estremaos. El conseyu d’alministración de la Sociedá Teatru Xovellanos aprobó ayeri por unanimidá la programación pa ochobre, payares y avientu, qu’ufrirá abonos d’ente 18 y 43 euros. Asina, los espectadores que quieran asistir a les funciones de danza de les compañíes Dani Panullo (3 d’ochobre), Cienfuegos U6-DT (6 d’ochobre) y Teresa Nieto (día 9) veránse beneficiaos pola tarifa más baxa d’abonos, y podrán acceder a les tres representaciones por un total de 18 euros. Esa tarifa increméntase sustancialmente, hasta los 38 euros en patiu de butaques, pa otra triada d’espectáculos de danza: ‘El amor brujo’, pola Compañía de Blanca Li (23 d’ochobre); ‘Nicolais Dance Theatre’ (28 d’ochobre); y Don Juan y Molière, a cargu d’Eifman Ballet (10 de payares). No que cinca al teatru, Xixón acoyerá nos meses d’ochobre, payares y avientu funciones de títulos renomaos como ‘Cinco horas con Mario’, que Focus Producciones pondrá n’escena el 24 d’ochobre; ‘Mi querido embustero’, representáu por Norma Leandro y Sergio Renán el 14 d’ochobre sobro la recreación de la correspondencia pasional ente l’escritor Bernard Shaw y l’actriz Stella Campbell; ‘El retrato de Dorian Gray’, el 16 d’avientu; y ‘Algún amor que no mate’, obra concebida por Dulce Chacón. En mitá de tanta dramaturxa -pa la que los abonos cuesten ente 20 y 39 euros-, irrumpirán con fuercia la música clásica, que llevará al escenariu’l Xovellanos una decena de conciertos; el jazz, que tendrá un festival propiu a mediaos de payares coles bandes de Nnenna Freelon, Bill Bruford y Terence Blanchard; y la ópera, que va facese un furacu el 6 de payares cola representación de ‘Cossí fan tutte’, de Mozart. La ufierta cultural pública de Xixón pal cuatru trimestre de 2004 inclúi amás la cellebración d’un festival de gospel n’avientu y la puesta n’escena durante cinco xornaes d’esi mesmu mes del musical ‘Mayumaná’, que vien de collechar destacaes bones crítiques nel ábitu internacional. 26 d'agostu, 2004 0 FacebookTwitterPinterestEmail
Cine El Festival de Cine de Xixón centra’l so programa en Peter Watkins, Tsai Ming-liang y Lukas Moodysson by asturnet 26 d'agostu, 2004 El británicu Peter Watkins, el taiwanés Tsai Ming-liang y el suecu Lukas Moodysson. El 42 Festival Internacional de Cine de Xixón, qu’albergará unes 250 proyecciones del 25 de payares al 3 d’avientu, centrará’l so programa en tres ciclos monográficos dedicaos a esos tres directores, nuna edición que s’ocupará tamién del nuevu cine norteamericanu y cuyos organizadores quieren afitar como una amuesa alternativa a la “uniformidá formal y narrativa” de les grandes factoríes audiovisuales. Nesos términos se pronunció esta mañana en Xixón el director del festival, José Luis Cienfuegos, que destacó como novedaes de la prósima edición del certame l’aumentu nel númberu d’espacios de proyección -esti añu sedrán 8 sales “funcionando a tou tren”, una más qu’en 2003- y l’espoxigue del presupuestu’l festival hasta los 722.000 euros, con un novedosu crecimientu nel apoyu económicu’l Ministeriu de Cultura, qu’hasta agora venía sofitando’l certame xixonés con una cantidá invariable. Na so edición númberu 42, el Festival Internacional de Xixón quier ser un escaparate del cine “distintu, el más vivu, xuvenil, frescu ya independiente”, en pallabres del conceyal xixonés de Festeyos, Ivan Álvarez Raja, y pa ello, amás de llevar a la ciudá a la triada de directores ‘fetiche’ polos que s’apuesta esti añu, l’eventu lideráu por Cienfuegos dedicará-y un ciclu a los cines “periféricos” realizaos en Norteamérica al marxe de los parámetros dominantes en Hollywood. D’esi espaciu monográficu, nel que se-yos pasará revista a les corrientes pop, documental, ‘underground’ ya independiente ‘made in USA’, habrá espaciu amás pa los denominaos ‘nuevos bárbaros’ de Hollywood, y toles pieces proyectaes cuayarán na edición d’una monografía de más de 500 páxines coordinada por Antonio Weinrichter y Roberto Cueto, como cuarta aportación del festival xixonés a la crónica de la nueva cinematografía. Lo que Cienfuegos, Álvarez Raja y el propiu Roberto Cueto presentaron güei en Xixón ye un primer avance de la programación del certame. El programa completu incluyirá, xunta los ciclos anunciaos esta mañana, l’habitual sección oficial a concursu, el monográficu ‘Enfants terribles’, el ciclu ‘Esbilla’ y varies sesiones de curiumetraxes, amén de conciertos y esposiciones paraleles. Web oficial del Festival Internacional de Cine de Xixón 26 d'agostu, 2004 0 FacebookTwitterPinterestEmail
Sociedá El profesor valón Jean Germain y el dOntario David Heap protagonicen les XXIII Xornaes dEstudiu by asturnet 26 d'agostu, 2004 Jean Germain, de la Universidá de Louvain-la Neuve de Valonia; Daid Heap, de la Universidá de de Western Ontario, nos Estaos Xuníos; y Paquita Suárez Coalla, de la City University of New York, van ser los espertos cimeros de les XXIII Xornaes Internacionales dEstudiu que como tolos años va desendolcar nesti mes dochobre de 2004 lAcademia de la Llingua Asturiana. Les Xornaes destudiu van tener llugar nUviéu los díes 25, 26 y 27 dochobre y van cuntar cola participación de munchos otros espertos como Emilio Ridruejo, Carmen Muñiz, Roberto González-Quevedo y el direutor dAsturnews, Próspero Morán, ente otros. El profesor de de la Universidá de Louvain-la Neuve de Valonia Jean Germain va falar nes xornaes dochobre sobre Las lenguas regionales endógenas de Valonia: un enfoque sociollingüísticu, mentantu que David Heap, de la Universidá de de Western Ontario, nos Estaos Xuníos, va facelo sobre Las encuestas del ALPI para Asturias y Paquita Suárez Coalla de la City University of New York va disertar alrodiu de La experiencia de la escritura dende dos llinguas marxinadas: lasturianu y el castellanu. Na programación de les xornaes, amás destes conferencies tan previstes otres del académicu de la llingua asturiana Roberto González-Quevedo sobre Símbolos de Sangre, otra de Carmen Muñiz Cachón, de la Universidá dUviéu, sobro La entonación y el conxuntu de rasgos prosódicos na carauterización duna llingua y dEmilio Ridruejo, de la Universidá de Valladolid, sobro El aprovechamiento de los mecanismos analógicos en los procesos de estandarización de las lenguas. El ejemplo del asturiano. Comunicaciones estremaes Amás de la participación del Profesor de Periodismu de la Universidá Carlos III de Madrid y académicu de la llingua asturiana, Próspero Morán, que falará sobro El periodismu alternativu y les llingües minoritaries, presentaránse nes Xornaes comunicaciones dAna Cano González (Lálbum de Josefina Pérez dAyala), Xosé Lluis Campal (Sobre el bable (1902), una reflexón dun interesante artículu periodísticu de fai más dun sieglu apaecíu por entregues en El Carbayón), Xosé Lluis García Arias (Galicismos), Miguel Ramos Corrada (Dalgunos casos de yeísmu nasturianu) o Xulio Viejo Vázquez (aloración, intercomunicación y dialectoloxía: la vivencia de la llingua nel Quirós tradicional). Xunta estos espertos presentarán comunicaciones otros como Liliana Díaz Gómez, María del Pilar Fernández González, Héctor García Gil, Esperanza Mariño Davila, María del Mar Martín Martín, Xuan Porta Allende, Rafael Rodríguez Valdés, Xuan Santori Vázaquez, Aníbal González Miyares, Hermenegildo Bardio Díaz y Javier Fernández Irigoyen. 26 d'agostu, 2004 0 FacebookTwitterPinterestEmail
Sociedá Les subvenciones de promoción al asturianu retrásense respecto a 2003 por un trámite final by asturnet 26 d'agostu, 2004 Falta la firma final. El paquete de subvenciones pa la promoción de la llingua asturiana correspondientes al exerciciu de 2004 esperimentará un pequeñu retrasu nel so trámite completu de resolución respecto al añu pasáu, yá que les propuestes de concesión y denegación esperen la firma de la conseyera de Cultura, Ana Rosa Migoya, que regresa de vacaciones a primeros de setiembre, pa poder ser publicaes nel Boletín Oficial del Principáu. En 2003, esa publicación materializóse’l 16 d’agostu. Magar d’esi retrasu técnicu respecto al añu pasáu, que nun se prevé llargu, fontes de la Conseyería de Cultura cuestionaron que la postergación na publicación de la resolución -fechu que-yos da calter de firmes ya oficiales a les subvenciones concedíes- vaiga traducise nun retrasu nel cobru de les ayudes, y precisaron que los solicitantes yá tienen o puen tener información de la cuantía concedida, o de la denegación, al traviés de la Oficina de Política Llingüística’l Principáu. El director d’esti organismu, Ramón D’Andrés, estudia modificar la política de concesión de subvenciones de promoción en toles estayes de la llingua asturiana a partir de la convocatoria del añu prósimu, col envís declaráu d’evitar “inercies qu’obliguen a subvencionar proyectos poco comprometíos cola normalización”. Nel casu de les ayudes económiques directes a los conceyos pa la protección y emplegu de la llingua asturiana, les solicitúes medraron esti añu nun 50 por cientu, yá que de les 108 peticiones empopbinaes polos ayuntamientos a Cultura nel añu 2003 pasóse a más de 150 espedientes na convocatoria de 2004. 26 d'agostu, 2004 0 FacebookTwitterPinterestEmail
Fiestes Avilés somórguiase na recta final de les fiestes de San Agustín, con David Bustamante y Lolita by asturnet 26 d'agostu, 2004 Avilés enfila’l fin de selmana grande de les sos fiestes patronales. Un conciertu del intérprete cántabru David Bustamante, qu’algamó notoriedá nel programa televisivu ‘Operación Triunfo’, abre esta nueche un programa de cellebraciones qu’inclúi amás un recital de Lolita, un certame de ganao en La Madalena, un mercáu d’artesanía en Les Meanes, estremaes competiciones deportives y el llibre accesu al Palaciu de Camposagráu, futura sé de la Escuela Superior d’Arte del Principáu. Bustamante xubirá a les 23 hores al escenariu allugáu na Pista de La Esposición, en Les Meanes, entornu nel que ta asitiáu un mercáu de productos artesanos que podrá visitase a lo llargo de tola xornada. L’Ayuntamientu mantién amás abiertes hasta’l sábadu -día de San Agustín- dos grandes opciones festives: El certame de ganao de La Madalena, consideráu ún de los más antiguos del Estáu, y la Fiesta de la Cerveza, que se desendolca na plaza de los Hermanos Orbón. Pa la xornada’l sábadu, asinamesmo, el programa de cellebraciones prevé una misa solemne a mediudía na ilesia de San Francisco de Bari con procesión posterior poles cais del cascu vieyu, un concursu de pesca a caña pa neños na marxe drecha de la ría, una verbena na plaza’l Parche a partir de les 21 hores y un conciertu en Les Meanes a cargu de Lolita a partir de les 22,30 hores. Pesllará la xornada, na medianueche, un espectáculu de fueos artificiales nel parque’l Muelle. Avilés aprovecha amás les sos fiestes patronales p’amosa-y al públicu les instalaciones del Palaciu de Camposagráu, edificiu qu’acoyerá la Escuela Superior d’Arte del Principáu y que pue visitase en xornaes de puertes abiertes, hasta última hora’l sábadu, n’horariu mañaniegu de 11 a 13 y de 16 a 19 pola tarde. L’héstóricu inmueble monopolizó’l pabellón del Ayuntamientu d’Avilés na última edición de la Feria Internacional de Muestres d’Asturies, que peslló les sos puertes en Xixón el pasáu domingu 22 d’agostu. 26 d'agostu, 2004 0 FacebookTwitterPinterestEmail