Música Alejandro Sanz suplió los fallos d’escenografía y completó un multitudinariu conciertu n’Uviéu by asturnet 31 d'agostu, 2004 Falló’l guión pero non l’artista. El compositor ya intérprete d’orixe andaluz Alejandro Sanz suplió anueche n’Uviéu los fallos d’escenografía provocaos por problemes d’illuminación y completó un recital cellebráu polos 9.000 espectadores qu’acudieron a les pistes de San Llázaru, la cifra más alta de públicu nos conciertos veraniegos de pagu n’Asturies xunta’l recital que David Bisbal ufrió en Xixón a primeros d’agostu. Coles complicidaes propies de los artistes que se vinculen a les ciudaes nes qu’actúen, el músicu andaluz demostró les ventaxes d’acumular una trayectoria de más d’una década enriba los escenarios y, ente guiños verbales a Uviéu, llegó a un metafóricu apagón parcial de les proyecciones y les pantalles xigantes nel tema ‘Cuando nadie me ve’. Un fallu que los técnicos nun foron a iguar dafechu nel restu’l conciertu y que llevó a Sanz a pedi-y disculpes al públicu a lo cabero’l recital. Pero pa entós los ánimos de la inmensa mayoría de los asistentes taben encesos por mor d’un repertoriu bien encadarmáu, qu’empezó a los sones de ‘Doce por ocho’ y foi progresando con ‘Eso’, ‘Quisiera ser’ y ‘Hoy llueve, hoy duele’ hasta garrar un ritmu qu’algamó momentos d’especial intensidá na execución de los temes más populares del artista andaluz, ente ellos ‘No es lo mismo’ y ‘Corazón partío’. Depués del conciertu d’anueche, l’Ayuntamientu d’Uviéu tien los güeyos puestos yá na actuación que’l conxuntu arxentín Les Luthiers protagonizará’l prósimu domingu nel mesmu escenariu, el complexu deportivu de San Llázaru, un espectáculu pal qu’alpenes queden a la venta una quinta parte de les llocalidaes que se pusieron inicialmente en taquilla. 31 d'agostu, 2004 0 FacebookTwitterPinterestEmail
Educación El cursu escolar arranca con un programa especial pa deprende-yos castellán a alumnos inmigrantes by asturnet 31 d'agostu, 2004 El nuevu cursu escolar arranca güei n’Asturies con atención especial al alumnáu inmigrante. Según afita nes circulares d’aniciu de cursu la Conseyería d’Educación y Ciencia, los escolinos que s’incorporen al sistema públicu d’enseñanza con conocimientos nulos o mui baxos de la llingua castellana podrán participar en dos aules intensives, n’Uviéu y Xixón, d’hasta 30 hores selmanales pa incorporase llueu con normalidá a les clases. Los alumnos, preferentemente inmigrantes aportaos dende África y Asia, pero tamién d’Europa l’Este, podrán permanecer neses aules especiales un másimu d’ente 40 y 60 díes llectivos -en proporción a les hores que pasen n’elles cada selmana-, y recibirán enseñances llingüístiques a lo llargo d’un másimu de 30 hores selmanales. Educación adscribirá a les dos aules intensives a los escolinos cuyos centros consideren especialmente necesitaos de deprender a espresase en castellán, pero los alumnos con baxa o nula capacitación llingüística n’español podrán tamién recibir clases especiales, de forma temporal, nos sos propios colexos ya institutos. Asina, los inmigrantes que s’incorporen a los centros nel tercer ciclu de Primaria tendrán a la so disposición un programa d’ente 10 y 12 hores selmanales pa deprender castellán al marxe de los sos compañeros, compartiendo con ellos les clases d’Educación Física, Llingua Estranxera y Educación Artística. Nel casu de los alumnos que lleguen a los institutos pa cursar la Enseñanza Secundaria Obligatoria (ESO), el másimu selmanal sedrá de tres hores al día, y les clases a les qu’acudirán con normalidá sedrán les de Música, Plástica, Tecnoloxía, Educación Física, Llingua Estranxera y Tutoría. En dambos casos, el númberu másimu d’escolinos por aula establezse en 12 alumnos, y el tiempu de permanencia nes aules especiales condiciónase al mínimu imprescindible pa que los inmigrantes alquieran los conocimientos necesarios pa falar y escribir en castellán y poder asina incorporase con normalidá a les clases ordinaries. Magar que’l cursu escolar 2004-2005 empieza güei en tolos niveles educativos non universitarios, l’aniciu de les clases produciráse’l xueves 9 de setiembre na Educación Infantil, Primaria y Especial, fecha que se retrasa al llunes 13 pa los alumnos de Secundaria. 31 d'agostu, 2004 0 FacebookTwitterPinterestEmail
Sociedá Llanes entama los trámites pa edificar n’El Sablón el primer palaciu de congresos del Oriente by asturnet 31 d'agostu, 2004 Llanes quier tener el so propiu gran equipamientu pa convenciones y eventos culturales. L’Ayuntamientu negocia yá con propietarios de terrenos averaos a la playa’l Sablón pa edificar enriba d’ellos el Palaciu de Congresos de la villa, que sedrá’l primer inmueble d’eses característiques nel Oriente asturianu ya incorporará un aparcamientu soterráu de grandes dimensiones. Según confirmó l’alcaldesa de Llanes, la socialista Dolores Álvarez, el Consistoriu entamó yá los trámites pa mercar les parceles elexíes y empezar, darréu los terrenos seyan propiedá municipal, el llargu procesu alministrativu y de construcción que culminará na edificación del palaciu. Llanes busca col nuevu equipamientu meyorar los sos atractivos turísticos y da-y puxu al renome que’l conceyu yá tien ente los visitantes qu’acuden a la llocalidá dende fuera d’Asturies, esplotando’l denomináu turismu de congresos como un ventaxosu motor del sector llocal de servicios, más allá de la temporada de veranu. Dos grandes opciones Anguaño, namás les dos principales ciudaes d’Asturies cuenten con equipamientos asemeyaos al que quier llevantar l’Ayuntamientu de Llanes. Uviéu acueye gran parte de los congresos y convenciones que se cellebren nel Principáu, emplegando l’Auditoriu ‘Príncipe de Asturias’ -con capacidá p’acoyer eventos pa ente 50 y 2.300 persones- como sustitutu’l futuru Palaciu de Congresos, que yá s’edifica nel barriu de Buenavista sobro un diseñu del arquitectu Santiago Calatrava. Pol so llau, Xixón cuenta con un palaciu de congresos nel recintu de la Feria Internacional de Muestres d’Asturies, na oriella drecha’l ríu Piles, un inmueble que cuenta con un salón d’actos con capacidá pa 800 persones, una sala de conferencies con un aforu de 200 asistentes y un espaciu polivalente de 600 metros cuadraos. 31 d'agostu, 2004 0 FacebookTwitterPinterestEmail
Emigración El 38 por cientu de los emigraos a otres comunidaes autónomes tien estudios de bachiller o superiores by asturnet 31 d'agostu, 2004 La comunidá asturiana nel esterior prepárase pa cellebrar los actos del 8 de Setiembre, Día d’Asturies, a la lluz d’estadístiques que delaten l’éxodu a la gueta de trabayu: Más de 25.000 ciudadanos con estudios de bachiller o títulu universitariu emigraron del Principáu a otres comunidaes autónomes ente 1991 y 2001, una cifra que supón el 38,6 por cientu de los emigraos nesi periodu, según un documentu de la Sociedá Asturiana d’Estudios Económicos ya Industriales (Sadei). En términos abolutos, l’estudiu de Sadei cifra en 65.524 el númberu d’asturianos qu’emigraron a otres comunidaes na década referida, nun procesu que se desbocó en tornu a 1997 y con especiales efectos nes grandes ciudaes del Principáu, que ganen población por mor de la llegada d’asturianos procedente d’otros conceyos o d’inmigrantes estranxeros, pero pierden cada añu más de 2.000 habitantes que cuelen d’Asturies p’afincase n’otres llocalidaes del Estáu. Esi ye’l casu de Xixón y Uviéu, principales ‘esportadores’ d’asturianos a otres comunidaes autónomes, con 2.495 y 2.218 persones en 2001, respectivamente, y siguíes de cerca por Avilés, que nesi mesmu añu vio colar a otros 1.194 vecinos. De les cuenques del Nalón y el Caudal, pol so llau, salen cada añu unos mil emigrantes hacia fuera d’Asturies -si s’estrapola el datu de Sadei pal añu 2001-, mientres que les comarques d’oriente y occidente proporcionen un fluxu más discretu d’emigración, perbaxo les 600 persones. Madrid, destín principal Por destinos, los asturianos de la nueva emigración marchen preferentemente pa Galicia, Castiella y Lleón y la Comunidá Valenciana, con un puxu creciente de les islles Canaries dende mediaos de los años noventa y el llideralgu claru de Madrid, comunidá pa la que cuelen unos 1.200 asturianos cada añu y na que’l Principáu cellebrará los prósimos 18 y 19 de setiembre los actos del primer Día d’Asturies itinerante nel esterior. Coles actividaes yá en marcha al rodiu les cellebraciones del 8 de Setiembre en comunidaes como la vecina Castiella y Lleón, y a una selmana de qu’entame el programa oficial d’actos con epicentru en Mieres, el Centru Asturianu de Bruseles ta acabante confirmar al conceyu de Llangréu como’l protagonista d’honor de les sos cellebraciones, que conmemoren amás el vixésimu aniversariu de la entidá y prollongaránse a partir del 11 de setiembre. Datos íntegros del estudiu na web de Sadei 31 d'agostu, 2004 0 FacebookTwitterPinterestEmail
Plástiques El Certame d’Arte de L.luarca pieslla les sos puertes tres de premiar a Ernesto García y Marcos Morilla by asturnet 30 d'agostu, 2004 Les artes plástiques faen les maletes en L.luarca. La capital de Valdés pieslla güei les puertes del so 35 Certame Nacional d’Arte, que premió a los creadores asturianos Ernesto García y Marcos Morilla d’ente un total de 170 obres presentaes a concursu y busca yá superar esa cifra de participación na prósima edición. Nacíu como un certame d’acuarela y óleu, el concursu valdesanu dio-y cabida esti añu al xéneru de la videoinstalación y seleccionó 38 obres pa la so esposición na sala municipal ‘Álvaro Delgado’. D’elles, resultaron ganadores les fotografíes ‘Como nosotros somos, vosotros seréis’, obra d’Ernesto García, y ‘Nocturno’, de Marcos Morilla. Dambos autores recibirán un premiu de 3.600 euros y verán circular les sos obres por esposiciones que los organizadores del certame entamarán na prósima temporada, col envís de promocionar a los ganadores del concursu. Na llista d’artistes esbillaos pa colgar les sos creaciones nel certame que güei tranca les puertes figuren, ente otros, Rebeca Menéndez, Raquel Miranda, José María Mellado, Santos Monestina, Fidel Pena, Lara Ríos, Ana Vila, Carmen Rosa y Ayumi Nakai. 30 d'agostu, 2004 0 FacebookTwitterPinterestEmail
Música Alejandro Sanz regresa a Uviéu pa presentar el so pop d’éxitu énte unos 9.000 espectadores by asturnet 30 d'agostu, 2004 Nueve mil siguidores d’Alejandro Sanz preparen el so desembarcu en San Llázaru. L’artista d’orixen andaluz, ún de los cantautores en llingua castellana más vendíos nel mercáu internacional, movilizará esta nueche a esa cifra d’espectadores nun conciertu que supón el so regresu a Uviéu y nel que se movilizará un equipu de 300 técnicos pa garantizar el bon desendolcu del espectáculu. Coles primeres incondicionales asitiaes yá na puerta d’accesu al recintu p’asegurase un puestu na primer fila, l’Ayuntamientu ultima un dispositivu especial de seguridá que se traducirá en mediu cientu de vixilantes d’una empresa privada disribuyíos nes entraes, la prohibición d’aparcar nes inmediaciones del complexu deportivu de San Llázaru, l’allugamientu d’una cubierta ignífuga enriba’l suelu y la presencia d’equipos sanitarios y de bomberos n’estremaos puntos del recintu. Na escena, Alejandro Sanz cantará énte’l públicu uvieín dende una plataforma de 27 metros de llargor y un pasiellu qu’entra na zona’l públicu, con una illuminación concebida pa tresformar la escenografía en distintos ambientes acordies con cada tema y apoyáu por tres pantalles xigantes que-y facilitarán la contemplación del espectáculu a los espectadores más alloñaos del escenariu. L’artista andaluz culmina güei n’Uviéu un intensu mes nel qu’ufrió trece conciertos, y enfila setiembre cola previsión d’actuar n’otres ocho ciudaes. El conciertu d’esta nueche abre’l programa musical de Samatéu, que continuará’l domingu cola actuación de los arxentinos Les Luthiers ya inclúi conciertos, ente otros artistes, de Fran Perea, Estopa, El Canto del Loco, Melendi, Andy y Lucas y mala Rodríguez. Web oficial d’Alejandro Sanz 30 d'agostu, 2004 0 FacebookTwitterPinterestEmail
Sociedá La Xunta pola Defensa de la Llingua tilda de “irresponsable” a Areces por postergar la coficialidá by asturnet 30 d'agostu, 2004 Una irresponsabilidá hestórica, frutu d’una visión “acomplexada y provinciana”. Asina interpreta la Xunta pola Defensa de la Llingua Asturiana les declaraciones nes que’l presidente autonómicu, el socialista Vicente Álvarez Areces, postergó la coficialidá del asturianu “pa nun tratar de reforzar lo que nos separa de los demás”. Nun comunicáu difundíu esta mañana, la Xunta deduz que les pallabres del presidente, asoleyaes nuna entrevista publicada’l pasáu domingu nel diariu ‘La Nueva España’, faen prever que la política llingüística qu’Areces ta dispuestu a liderar sedrá “acomplexada y curtia”, acordies cola “mentalidá antiasturiana” que la entidá de defensa de la llingua atribúi a la cúpula dirixente’l PSOE asturianu. Nesti sen, la Xunta pola Defensa de la Llingua albidra que les declaraciones del presidente’l Principáu pretenden “empuercar” el debate sobro la posible inclusión de la coficialidá del asturianu na prósima reforma del Estatutu d’Autonomía, y fáenlo, na opinión de la Xunta, dende “argumentos tramposos”, asegurando que la oficialidá diba provocar confrontación na sociedá asturiana. Lloñe d’esti argumentu, la Xunta pola Defensa de la Llingua reivindica l’idioma asturianu como un “elementu de xuntura ya identidá” y fai un llamáu a esixir los mesmos drechos que yá tienen reconocíos otros idiomes del Estáu. El procesu contrariu, camienta la entidá de defensa’l patrimoniu llingüísticu, fai responsables a los sucesivos Gobiernos asturianos de la desapaición de la llingua autóctona. Artículu d’opinión: “¿Medalles d’Asturies?” 30 d'agostu, 2004 0 FacebookTwitterPinterestEmail
Sociedá El Parlamentu autonómicu retoma l’actividá nun cursu políticu decisivu pa la normalización del asturianu by asturnet 30 d'agostu, 2004 L’asturianu afronta una preba decisiva pa la so sobrevivencia. La Xunta Xeneral del Principáu retoma mañana l’actividá depués de les vacaciones de veranu y abre un cursu políticu nel qu’habrán determinase l’usu de la llingua na futura televisión autonómica, la postura de los grupos políticos sobro la oficialidá na inminente reforma del Estatutu d’Autonomía y l’aprobación y desendolcu del Plan de Normalización Sociollingüística. Na xornada inagural de mañana, de momentu, una xuntanza de los portavoces parlamentarios decidirá l’orde del Plenu institucional que va cellebrase’l 7 de setiembre con ocasión del Día d’Asturies y debuxará les primeres llinies formales del denomináu ‘debate sobro l’estáu de la rexón’. A partir d’esa cita, la maquinaria política echará a andar y deberá analizar importantes asuntos sociollingüísticos. El director xeneral de Promoción Cultural y Política Llingüística, Carlos Madera, prevé que’l Plan de Normalización -el documentu qu’estructura y planifica la política llingüística’l Gobiernu hasta 2007- tea llistu pa entrar en vigor nos prósimos meses. El testu, que’l director de la Oficina de Política Llingüística, Ramón D’Andrés, quier ver vixente como mui tarde nos primeros meses de 2005, empezará ser analizáu darréu polos altos cargos de la Conseyería de Cultura, y el momentu y el mou de la so aprobación dirán bastante de les intenciones del Gobiernu autonómicu pa cola llingua asturiana. Col alderique de fondu sobro la reforma l’Estatutu d’Autonomía -na que l’asturianu xuégase bona parte’l so futuru en función de si se declara o non idioma cooficial-, los políticos podrán definir amás la proporción en que la llingua asturiana va emplegase na futura radiotelevisión pública asturiana, cuyes primeres emisiones regulares tán previstes pa mediaos de 2005. El nomamientu’l conseyu d’alministración, les directrices del Executivu y el propiu interés de los trabayadores del ente sedrán claves nesti aspectu. Nel horizonte debúxense asinamesmo puntos d’inflexón que puen entainar la marcha de la normalización llingüística fuera les puertes del Parlamentu. Dos d’elles son la creación de nuevos servicios municipales de promoción del asturianu y l’interés de pas y alumnos na matriculación de los escolinos na asignatura de Llingua Asturiana, cuyu currículu ta a puntu de ser aprobáu pol Conseyu de Gobiernu. 30 d'agostu, 2004 0 FacebookTwitterPinterestEmail
Fiestes El rock de Pereza prendió, con una enérxica puesta n’escena, la traca final de les fiestes de Llugones by asturnet 30 d'agostu, 2004 Rock desnudu y vitamínicu. La banda Pereza presentó anueche les sos credenciales en Llugones y desplegó una intensa puesta n’escena que llevó al públicu a dexase somorguiar nun ‘crescendo’ qu’abre la traca final de les fiestes patronales de Santa Isabel. L’intérprete Chus Pedro Suárez pesllará güei el programa festivu, qu’inclúi amás un desfile de carroces, el repartu’l bollu y fueos artificiales. Pocos espectadores nel parque de la Paz, inda cola resaca fresca del exitosu conciertu que’l grupu Marea protagonizó na nueche’l sábadu nel mesmu escenariu y con un orbayu calquín qu’insistió en cayer dende la salida a escena’l grupu lideráu por Rubén Pozo y Miguel Leiva, acabante aportar a Asturies depués d’un llargu viaxe dende La Seu d’Urgell. Salieron y nun escatimaron enerxíes. Los primeros acordes de la banda, fichada pola discográfica RCA y rodada nuna xira qu’entá va prollongase hasta finales de setiembre, sacaron al públicu d’un hómidu pigazu y foron enriedándose cada vez más rápido hasta dar cola receta’l baille abiertu. Pa cuando llegó una estirada y remocicada versión de ‘Música ligera’ con set de percusión desbocáu, l’ambiente en Llugones yá yera’l propiu d’un conciertu de rock que se permitió poques concesiones a la calma. Con más metros cuadraos pa blincar y revolvese que na so anterior visita a Asturies, na xixonesa sala Albéniz, los integrantes de Pereza amosaron cómo repetir un patrón de directu ensin cayer na galbana o na comodidá y desatáronse a partir de la mitá’l recital nuna folixa que dacuando taba más enriba l’escenariu que nel prau del parque. “Nun hai nada meyor que tener una banda de rock and roll”, sentenciaron los músicos madrilanos, y lliáronse -homenaxe a Babylon Chat incluyíu- a nun-yos dar fuelgu a les guitarres nun tramu final qu’apostó por una popularidá segura, encadenando ‘La bruja Avería’ (de ‘La Bola de Cristal’), ‘Voy a pasármelo bien’ y ‘Yo pienso en aquella tarde’, tema que’l grupu rueda como’l principal éxitu del so segundu y más reciente discu editáu, ‘Algo para cantar’. Al final, remate d’un conciertu col que los propios músicos dixeron tar mui conformes nos camerinos, especialmente depués d’un grave problema de monitorización que la banda sufrió nel so conciertu de La Seu d’Urgell, carretera y manta y clima idénticu pa la cabera xornada de les fiestes, que se pesllarán esta medianueche con una descarga de fueos artificiales. Web oficial de Pereza 30 d'agostu, 2004 0 FacebookTwitterPinterestEmail
Gastronomía Los criadores d’oveya xalda recibirán cien mil euros pa garantizar la continuidá de la raza by asturnet 29 d'agostu, 2004 Un total de 103.000 euros pa garantizar la continuidá de la oveya xalda y meyorar el so potencial gastronómicu. Representantes de l’asociación de criadores d’esa raza animal (Acoxa) y de la Conseyería de Mediu Rural y Pesca firmaron esta mañana un conveniu n’Uviéu que tendrá aplicación nos prósimos tres años y que busca financiar la sobrevivencia óptima de la oveya xalda asturiana. “Si güei la carne de corderu xaldu ye de primera calidá, agora va dase-y tovía mayor seguridá al consumidor de lo que ta comiendo”, felicitóse’l responsable de l’asociación de criadores na firma l’alcuerdu, José Antonio Álvarez, pa quien el conveniu suscritu esta mañana con Mediu Rural supón un importante emburrión pa la pervivencia d’una raza cuyu censu baxó enforma n’Asturies dende la década de los años cincuenta. L’Asociación de Criadores d’Oveya Xalda (Acoxa) agrupa a casi sesenta productores enfotaos en caltener y meyorar la comercialización de la singular oveya asturiana, caracterizada físicamente por tener la tiesta y les oreyes pequeñes, el rau curtiu y con pates fines de pezuñu duru. L’alcuerdu rubricáu ente los criadores y l’Alministración autonómica, que va desendolcase baxo la supervisión de técnicos del Principáu, valdrá asinamesmo pa mantener un bancu de xermoplasma que permita favorecer biolóxicamente la continuidá de la oveya xalda. Web de l’Asociación de Criadores d’Oveya Xalda 29 d'agostu, 2004 0 FacebookTwitterPinterestEmail